كنز الكنوز.. مصر تنقب عن 100 مليار دولار في الصحرا
إيه الكنوز اللي على وش الأرض في الصحرا المصرية وايه الكنوز اللي في بطنها وإزاي مصر بتنقب وبتفتش على 100 مليار دولار في الرملة والصخور وازاي ممكن الكنوز دي تنسف أزمة الدولار وتخليه أرخص من الجنيه.. مفاجآت كتير هنشوفها معاكم في الفيديو ده
زي ما احنا عارفين مساحة مصر أغلبها صحرا سواء في الشرق أو الغرب أو في سيناء وزي اي صحرا في العالم مليانة كنوز بس عاوزة استثمارات وشركات متخصصة تدور على كل خام وتكتشفه ومتصدرهوش لكن ترجع تصنعه وتحوله لمنتجات نهائية وبعدها تصدره منتج وبكده سعره هيزيد 10 أضعاف، وبيقدر خبراء الاقتصاد قيمة المواد التعدينية اللي ممكن تستغلها مصر ب100 مليار دولار في السنة وده مبلغ كفيل يجيب الدولار الأرض.
وسط أزمة نقص الدولار اللي بيعيشها الاقتصاد المصري، طرح متخصصين وجيولوجيين وخبراء اقتصاد حلول كتيرة كفيلة تحل أزمة نقص الدولار عن طريق استغلال الموارد التعدينية واللي منها مثلا الرمال السودا في باطن الصحراء والطاقة الشمسية من سمائها، لتكون مورد لضخ مليارات الدولارات سنويا.
ومعروف إن مصر من أكتر الدول العربية ثراء في الرمال السوداء، واللي بتنتشر بطول سواحلها الشمالية بداية من مدينة رشيد ولغاية رفح بطول 400 كيلو متر كمان مصر عندها 11 موقع للرمال السودا بتضم 8 أنواع من المعادن التقيلة والنادرة وده حسب مركز المعلومات التابع لمجلس الوزراء .
أستاذ الجيولجيا الدكتور عباس الشراقي، قال إن الثروة التعدينية في مصر ضخمة ووفيرة زي الرمال السوداء والبيضاء والدهب لكن مش مستغلين بالشكل الأمثل وإن المصانع الي تم تاسيسها السنة اللي فاتت لاستغلال الرمال السودا لسه ما اشتغلتش ولما تشتغل الوضع هيتغير تماما لأن الرمال السوداء بيتصنع منها خامات الزيركون اللي بيستخدم في صناعة السيراميك بدل من استيرادها، كمان عندنا الرمال البيضاء واللي أكيد هتحقق طفرة هايلة في صناعة الخلايا الشمسية المصدر الأساسي في صناعة ألواح الطاقة الشمسية. وتصديرها لدول افريقيا.
كمان مصر محتاجة انتاج مكونات الطاقة الشمسية لتوطين محطات الطاقة الشمسية واللي هتوفر 5 مليار دولار سنويا في شكل ألواح طاقة شمسية فضلا عن توفير كميات مليارات المكعبات من الغاز وده غير إنه حسب الدراسات صناعة الخلايا الضوئية هيخلي مصر مصدر أساسي لدول أفريقيا اللي عندها ملايين الأفدنة من الصحراء، واللس بتعتبر مثالية لتوليد الطاقة من خلال الألواح الشمسية.
كمان سبق واتكلمنا عن ثروة معدنية تانية في باطن الصحراء الشرقية المصرية وهي خام الكوارتز، واللي ييصنع منه المجوهرات والساعات وأسطح المطابخ وغيرها، واللي للاسف بسنتوردها باكتر من مليار دولار في السنة.
ده غير إن مضر عندها اكتر من 100 موقع للدهب ورغم كده لسه جهود التنقيب مقدرتش تغطي كل المناجم في وقت البلد بتستورد كميات كبيرة من المعدن الأصفر كل سنة.. القصد الخبرا بيقولوا أن صحاري مصر ممكن تجيب عوائد 100 مليار دولار على أقل تقدير في السنة لو تم استغلالها بشكل مثالي والاهم بقي أن الدولة فعلا شغالة على كل الملفات دي وطرحت شركات عالمية للتنقيب عن الدهب وعملت مصانع للرمال السودا وقريب مصر هتستفاد من خير أرضها.
