مين بيدير السوق السودا للدولار؟ وفلوسها بتروح فين؟

هو مين اللى بيدير السوق السودا للدولار؟ وفلوسها بتروح فين بالظبط ؟ وإيه آليات تحديد سعر العملة الأمريكية في السوق الموازية؟  وايه اللى بيخلى سعر الدولار يقفز قفزات جنونية ؟ وايه اللى بيخليه ينهار بسرعة الصاروخ؟

في اليام اللى فاتت ومع الهبوط الكبير فى سعر دولار السوق الموازية بعد ما سعره كان سجل مستويات قياسية ووصل الى اكتر من 70 جنيه .. ناس كتير بدأ تسال هو مين اللى بيدير السوق السودا فى مصر .. وامتى بدأت تظهر.. والفوس اللى بيتم تداولها بعيد عن القطاع المصرفي بتروح فين .. وازاى اصلا المضاربين بيحددوا سعر الدولار يعنى امتى ممكن يزيد وامتى ممكن ينخفض وغيرها كتير من الأسئلة اللى هنحاول نجاوب عليها فى الفيديو ده

وأول سؤال هو ايه حكاية السوق السودا وامتى ظهرت فى مصر؟

وخلونا نقول لحضراتكم ان فيه تاريخ سري طويل للسوق السوداء للعملة الصعبة في مصر وكتير اتسببت في أزمات مباشرة على الاقتصاد والمواطنين، لأن السوق دي غير شرعية وعامل رئيسي في الضغوط التضخمية وارتفاع أسعار السلع الاستراتيجية.

والسوق السودا للدولار  ظهرت لأول مرة في مصر بعد حرب 1967 وما تلاها من حرب الاستنزاف وصولا إلى حرب أكتوبر 1973، ودي الفترة اللي عانت منها مصر من ندرة حقيقية للدولار بفعل نقص موارد العملة الصعبة سواء السياحية أو عائدات قناة السويس التلي تم إغلاق المرور بيها لظروف الحرب.

ومن السبعينيات لم تهدأ تعاملات السوق السوداء إلا خلال فترات قصيرة عند وجود ثبات في سعر صرف العملة وعند قيام المركزي بدوره بمنح الأفراد والشركات حرية الحصول على النقد الأجنبي وكانت الفترات دي  بين 1991 و1997، وبين 2005 و2009، وخلال النص التاني من 2017 حتى عام 2020، وبخلاف الفترات دي كان فيه نشاط كبير للسوق السوداء

طب مين اللى بيحرك السوق السودا للدولار حاليا؟

أكبر محرك للسوق السودا هما المستوردين اللى بيستوردوا السلع اللى عاوزاها السوق فى مصر ودول في كافة القطاعات بيحتاجوا كميات كبيرة من الدولار سواء كانوا مستوردين السلع الغذائية أو السلع المعمرة أو السيارات وبيلجأ أغلبهم إلى مصدرين أو شركات سياحة عندها حصيلة دولارية يشتروها بعيدا عن البنوك اللى بسبب أزمة شح العملة ما بتقدرش توفر كل طلبات المستوردين

وبدأت قطاعات جديدة تلجأ للسوق السوداء لتوفير احتياجاتها من السيولة وده دفع بعض اللاعبين الجدد للدخول في سوق الدولار والتربح من الأزمة في مقدمتهم العاملين في شركات الصرافة.. وكمان معظم تجار الدهب

طب ودول بيجيبوا دولاراتهم منين ؟

فيه كمية كبيرة من الدولار فى السوق السودا معظمها جاى من المصريين العاملين فى الخارج واللى توقفوا عن ارسال تحويلاتهم عبر البنوك والقنوات الرسمية بسبب الفجوة الكبيرة بي السعر الرسمي للعملة المريكية وسعره فى السوق الموازية وفيه مضاربين وتجار عملة منتشرين فى كل حتة فى مصر تقريبا ودول اللى بيلموا الدولار من الناس وبيسلموه للتجار الكبار اللى بيوردوا للمستوردين

وازى بيتم تحديد سعر الدولار السوق السودا ؟

عشان السوق دي مشرسمية فالتسعير فيها عشوائي ومفيش معيار واضح وثابت لتحديد سعر العملة وبيتم التسعير غالبا بناء على مدى توافر العملات الأجنبية والكميات المتداولة خارج البنوك وده يفسر ليه الدولار سعره فى السوق السودا انهار بمجرد خبر واحد عن صفقة هتبرمها الحكومة بقيمة 22 مليار دولار