الجنيه ينتفض أمام الدولار

أخيرا الجنيه رجع  وبقاله صوت زي زمان.. وقال أنا عملة قديمة وليا تاريخ ومش بتهزم بسهولة لا قدام دولار ولا سوق سودا ولا بيتفرق معايا اشاعات وتوقعات.
اللي حصل امبارح وهيحصل النهاردة بيقول إن الجنيه رجع فعلا ينافس الدولار وكمان يصعد بقوة قدام العملة الأمريكية ويتقدم 18 مركز مرة واحدة في الأسواق الغير شرعية.
اللي حصل لو مش متابع الدولار نزل في ساعات من 73 جنيه كاقصى زيادة لمستوى 55 جنيه تقريباً يعني حوالي 18 جنيه مرة واحدة ودا في يوم واحد.
امبارح وممكن النهاردة يكونوا أسعد أيام في تاريخ الجنيه المصري في السنتين اللي فاتوا لأنه اتعرض لهبوط كبير في قيمته وضعفت قوته قدام الدولار ودا لأسباب كتير جدا الجنيه نفسه ملهوش علاقة بيها زي ظهور السوق الموازية وجشع التجار وعصابات الدهب والمحتكرين والحرب الروسية الأوكرانية وأحداث غزة وغيرها وغيرها.
اللي جاي بيقول إن الجنيه راجع اكتر قوة قدام العملات كلها وإنها مسألة وقت عشان يستعيد قوته الشرائية تاني وإذا كنا شفنا الدولار بينزل قدام الجنيه بكرة هنشوف اللحلوح المصري هو اللي بيصعد قدام الدولار وقانون العرض والطلب هو اللي هيحكم المباراة النهائية بين الجنيه والدولار.