هتوصل لـ 2 مليار دولار.. خطط الحكومة لاستعادة تحويلات المصريين بالخارج
تحويلات المصريين بالخارج واحدة من اهم مصادر العملة الاجنبية في مصر، ونقصها في الفترة الاخيرة كان واحد من اهم اسباب ازمة مصر من نقص العملات الاجنبية ومنها الدولار وكانت سبب اساسي في وجود السوق السودا في مصر في تجارة العملة.. الحكومة في الفترة الاخيرة عملت مبادرتين لتحفيز المصريين العاملين بالخارج لعودة تحويل وصرف عملات البلاد العاملين فيها للبنوك الرسمية وعدم بيعها في السوق السودا، يا تري اية ابرز المبادرات اللي عملتها الحكومة لعودة تحويلات المصريين بالخارج لصرفها من البنوك الرسمية.. وعائدات المبادرات دي اية... واية الجديد فيها .
الايدي العاملة المصرية معرفة بمهارتها في كل دول العالم، والمصريين حاليا بقوا معروفين ومطلوبين بالاسم في كل دول العالم، وكانت تحويلاتهم من العملات الاجنبية المختلفة علي مدار السنين اللي فاتت مصدر مهم من مصادر العملات الاجنبية في احتياطي البنك المركزي من العملات الاجنبية، لكن مع تحرير سعر صرف الجنية المصري مقابل الدولار الامريكي وظهور السوق السودا في تجارة العملة، بدأت تحويلات المصريين العاملين بالخارج تاخد طريق ثاني غير الطريق الرسمي في البنوك وهو بيعها في السوق السودا للاستفادة من فارق السعر عن السعر الرسمي بالبنوك، وفي سماسرة بقوا عتاولة في الموضوع ده وبقوا يسافروا لدول مخصوص زي السعودية لجميع العملات الاجنبية من المصريين هناك بسعر السوق السودا قبل وصولها لمصر .
بيانات البنك المركزي، بينت تراجع تحويلات المصريين العاملين في الخارج بنسبة %26 في الفترة بين يوليو 2022 لشهر مارس 2023، وانخفضت لـ 17.5 مليار دولار مقابل 23.6 مليار دولار في نفس الفترة من العام اللي قبله، في الوقت اللي بتعاني فيه مصر من نقص كبير في العملات الاجنبية ومنها الدولار.
طيب اية اللي عملته الحكومة علشان ترجع تحويلات المصريين للطرق الرسمية؟.
الحكومة اعلنت عن مبادرتين لعودة تحويلات المصريين للطرق الرسمية اولهم مبادرة "سيارات المصريين في الخارج" واللي كانت بتدي الحق للمصريين في الخارج استيراد عربية للاستخدام الشخصي بدون أي جمارك أو رسوم بشرط وضع قيمة الجمارك والرسوم في حساب وزارة المالية المصرية بالدولار ويستردها بعد 5 سنوات بالجنيه المصر وبسعر صرف الدولار في تاريخ الاسترداد.
المبادرة الثانية اللي اطلقتها الحكومة هيا مبادرة تسوية موقف التجنيد للمصريين في الخارج مقابل تحويل 5 آلاف دولار أو يورو لكل واحد عايز يستفيد من المبادرة وفتحت باب التسجيل على مواقع للمصريين المقيمين في الخارج اللي حل عليهم الدور في سن التجنيد من عمر 19 وحتى 30 سنة، وكمان اللي عدوا سن 30 لتسوية موقفهم التجنيدي، واشترط عدم تجديد جوازات سفرهم للمصريين إلا بعد تسوية المواقف التجنيدية لهم.
طيبة اية الجديد في مبادرة سيارات المصريين في الخارج؟.
وزارة المالية اعلنت أن مجلس الوزراء وافق على مد العمل بمبادرة استيراد سيارات المصريين بالخارج لثلاثة أشهر كمهلة إضافية أخيرة لتوسيع قاعدة المستفيدين من هذه التيسيرات، وده بعد الاقبال الكبير اللي شهدته المرحلة الثانية للمبادرة، وتضاعف عدد المسجلين في أول شهرين من المرحلة الثانية أكثر من 3 مرات مقارنة بالمرحلة الأولى.
محمد معيط وزير المالية، اكد أن الطلبات المسجلة فى أول مرحلتين رفعت سقف التوقعات لارتفاع الايردات الي 2 مليار دولار، خصوصا ان صلاحية مبادرة استيراد سيارات المصريين بالخارج بتوصل لـ 5 سنوات، وضريبة جمركية مخفضة، وبتدي الحق للمالك الأول انو يستورد السيارة بدون ما يكوت متقيد بسنة الصنع، وممكن كمان اكثر من فرد في الاسرة الواحدة يستفيدوا من تيسيرات استيراد السيارات بشروط توافر الشروط اللي اقرتها الوزارة.
