عصابات التنقيب.. كلمة السر في جنون اسعار الدهب.. مفاجآت الساعات الأخيرة

ياترى إيه اللي كشفته الساعات الأخيرة وايه اللي بيحصل في سوق الدهب وايه علاقة ارتفاع الأسعار بعصابات التنقيب والدهابة وازي سعر الدهب بيتحدد من الصحراء الشرقية.. مفاجآت من العيار التقيل هتعرفوها معانا في الفيديو ده.. خليكم معانا للآخر.

لأن سعر الدهب العالمي بيستقر أو بينزل الفترة اللي فاتت وفي نفس الوقت الأسعار في مصر بتولع والمفروض تمشي مع السعر العالمي وكتير مننا فاكرين إن إللي بيحصل في سوق الدهب سببه الدولار ودا مش كل الحقيقة لأن الضربات الأمنية الأخيرة كشفت مفاجآت صادمة عن إللي بيحصل في سوق الدهب والتداول والتهريب والتنقيب غير الشرعي.
الحكاية بدأت لما الداخلية مسكت اول الخيط وكان القبض على امبراطور الدهب روماني عيسى ومعاه الملياردير هشام الحاذق وشخصية أجنبية مشبوهة .. روماني اتقبض عليه وهو بعد رحلة مشبوهة من أسوان ولما الأمن داهم بيته لقي عنده 160 كيلو دهب مش مدموغ يعني الحكومة متعرفش عنه حاجة ولا دفع رسوم ولا ضرايب ومن هنا بدأت المعلومات تكشف تفاصيل خطيره منها أن روماني واحد من شبكة كبيرة اووي على مستوى الجمهورية بتضم تجار دهب ورجال أعمال وعصابات تنقيب عن الدهب في الصحراء الشرقية.

شوية شوية وخليك معانا عشان متوهش في التفاصيل الأمن وصل لأطراف جديدة في اكتر من عصابة واتقبض على 10 تجار من أباطرة الدهب على دفعتين واعترفوا أنهم متعاونين مع عصابات التنقيب وتهريب خام الدهب وأنهم بياخدوه منهم بأسعار بأقل من النص لانه مصدره غير قانوني ومش مدموغ وبعدها بيسيحوه ويدمغوه بطرق غير مشروعة ويبدأو يخزنوه عشان المعروض يقل نتيجة الطلب الكبير على الدهب وبعدها يبدأو يطرحوه الدهب اللي متهرب من عصابات التنقيب أو الدهابة.
الداخلية اقتحمت محلات في الصاغة والجمالية واكتشفت الدهب الغير مشروع وإن الدمغات عليه مزيفة ومش بتاعة مصلحة الدمغة والموازين التابعة لوزارة التموين.. ومن هنا بدأت تكتشف أخطر شبكات لتداول الدهب بعيد عن عيون الحكومة وإن فيه عصابات كتير شغالة في التنقيب والتهريب والتحكم في سوق الدهب وضيعت على الدولة ملايين الجنيهات دمغة وضرائب غير رفع سعر الدهب في الصاغة والايام الجاية فيه عصابات جديدة هتوقع في المصيدة.