الفلوس المشبوهة واللي تحت البلاطة غرقت الصاغة.. ايه اللي بيحصل

اللي بيحصل دا جنون.. دا كان أفضل تعليق من تاجر دهب على اللي بيحصل في السوق والصاغة والراجل العجوز واللي قضى عمره في الصاغة قال اللي بيحصل ده فيه حاجة غلط ومش قانوني ودي فلوس مشبوهة لأن صحابها بيشتروا باي تمن..
اللي قاله التاجر العجوز في الصاغة فعلا هو اللي الحقيقة لأن محدش بيرمي فلوسه ويشتري جرام ب4الاف جنيه وبكميات كبيرة غير لو فلوسه مركونة أو مشبوهة ومش قادر يوديها البنك ولا يشغلها في مشروع عشان محدش يقوله من اين لك هذا ويروح في س وج واخرتها سجن ..

سوق الدهب دلوقتي بقي فرصة لاي فلوس جاية من حرام وتجارة ممنوعة أنها تستخبي في الصاغة وتتغسل وسط الفوضى اللي حاصلة و النهاردة كل حاجة غلط بتحصل في سوق الدهب بداية من الفلوس المشبوهة لغاية الفلوس المزورة الللي دخلت على الخط لحد الدهب المغشوش اللي بيتباع وفي النهاية الضحية هو المواطن اللي راح يشتري عشان صدق إشاعات التجار.

والسؤال اللي بيتقال حاليا هي الدولة فين من اللي بيحصل.. الإجابة الدولة موجودة وبتحاول عل قد ما تقدر لكن في النهاية مش هتقدر توقف حركة السوق لانه عرض وطلب واللي معاه قرش محيره يروح الصاغة ويشتري سبايك مضروبة ويطيره.