المهمة أوشكت على الانتهاء.. البنك المركزي يفجر أكبر مفاجأة

في الأيام الأخيرة بيواصل دولار السوق السودا ارتفاعاته القياسية وسجل مستوى فوق ال 60 جنيه بس يا ترى سألت نفسك هل ده السعر الحقيقي للدولار فعلا ولا فيه مضاربات بتتم على العملة الأمريكية وناس بتلعب لعبة قذرة ضد اقتصاد البلد؟ وازاى الدولار سعره فى البنوك ثابت ومستقر بقاله شهور وفى نفس الوقت بيزيد الزيادات الجنونية دي فى السوق الموازية؟ ةايه اللى بيجهز ليه البنك المركزي الأيام الجاية لحل أزمة نقص العملة والقضاء على السوق السودا للدولار؟

رغم ان سعر الدولار فى السوق السودا بيتم تداوله فوق ال 60 جنيه الا ان السعر العادل للجنيه وفقا لتقديرات الحكومة وكتير من خبراء الاقتصاد ما بين 32 الى 35 جنيه وده بناء على ان الجنيه مقيم بأقل من سعره بكتير فى السوق الموازية نتيجة نقص العملة الأجنبية وان مع نجاح الحكومة فى جمع سيولة دولارية سعر العملة الأمريكية هيتراجع وهيكون قريب من الارقام دي .. بس طبعا ده مرهون باجراءات وأدوات بتستخدمها الدولة وأجهزتها لضبط فوض سوق الصرف وتعوجيه ضربات قوية لتجار العملة والمضاربين

طب ايه الاجراءات اللى بيحضر ليها البنك المركزي للتعامل مع الوضع الصعب ده ؟

البنك المركزي بقالوا فترة طويلة بيحضر لواحد من اهم المشروعات اللى هتقضى على أزمة الدولار فى مصر والمشروع ده هو مؤشر الجنيه اللى تقدجر تقول عليه كده ده عصا موسى اللى هتلم كل تعابين السوق السودا وهتقضى على تجار العملة

حد هيسال ويقول .. ايه مؤشر الجنيه ده بقا ؟

بص يا سيدي مؤشر الجنيه ده مشروع كبير هيتم من خلال ربط الجنيه بسلة كبيرة من العملات الأجنبية  زي اليورو والاسترليني والين واليوان والروبل بالاضافة الى بعض المعادن النفيسة زي الدهب والفضة وغيرهم وبناء على المؤشر ده سعر الدولار هيفك ارتباطه بالجنيه وسعره هيتحدد بناء على قوته قدام سلة العملات الجديدة يعنى ببساطة الدولار مش هو اللى هيحدد سعر الجنيه وده تحول تاريخي فى العلاقة بين العملة المصرية والعملة الأمريكية وانجاز يحسب للبنك المركزي ولصناع السياسة النقدية

طب ولما هو المشروع ده مهم اوى كده ليه البنك المركزي متأخر فى تنفيذه ؟

المركزي مش متأخر ولا حاجة وكل الحكاية ان المشروع ده محتاج تنسيق على اعلى مستوى مع البنوك المركزية فى الدول اللى هيتربط الجنيه بعملاتها وفيه مفاوضات شغالةمع البنوك المركزية دي وبتتحط البنود الخاصة بالاتفقاقيات وبيتم مراجعتها بشكل دقيق وخلال فترة صغيرة هيتم الاعلان عن كل التفاصيل الخاصة بالمشروع

وايه آخر تطورات الاتفاق مع صندوق النقد الدولي ؟

زي ما قولنا لحضراتكم قبل كده فى فيديوهات تانية بعثة صندوق النقد وصلت مصر من فترة قريبة وبتعمل المراجعتين الاولى والتانية لبرنامج الاصلاح الاقتصادي لمصر وبعد ما تخلص المراجعتين مصر هتتسلم الشريحة التانية والتالتة ودول حوالى 700 مليون دولار .. وفيه مفاوضات شغالة دلوقتى لرفع قيمة القرض من 3 الى 6 مليار دولار والمفاوضات ماشية كويس وبنسبة كبيرة الصندوق هيدعم مصر وهيوافق على رفع قيمة القرض