مغارات الدولارات.. حكاية البنوك السرية في شقق الجمالية وأكتوبر وأسيوط

 

ايه اللي حصل في الجمالية وأكتوبر وحدائق اكتوبر وأسيوط .. وايه حكاية مغارات الدولارات اللي اتمسكت في الفترة الأخيرة.. شوفوا التفاصيل في الفيديو ده
 

زي ما احنا عارفين إن الأزمة الأخيرة في الأسواق والأوضاع الاقتصادية وظهور السوق السودا للدولار والمضاربة في الدهب خلت في ناس وتجار كتير يدخلوا على خط الأزمة ويستغلوها أسوأ استغلال ولأنها أسواق غير مشروعة تجار العملة والدهب معرفوش يخبوا الفلوس اللي كسبوها فين عشان مش هينفع يودوها البنوك أو يشغلوها في أنشطة واضحة فيها محاسبة ومن اين لك هذا وإجراءات قانونية هتودي في الاخر لمصادرة الفلوس وعشان كده حيتان الدولار والدهب قرروا يحتفظوا بيها في مغارات زي مغارات علي بابا لكن مش في الجبل وانما في شقق وقصور وفي غرف سرية محدش يعرف يوصلها يعني كل تاجر كبير في سوق العملة ولا الدهب كسب فلوس بطريقة غير شرعية قرر يعمل بنك سري خصوصي لنفسه لغاية ما يعرف يطلعها ويشغلها بالقطاعي يعني زي خزنة ناصر الدسوقي كده في الاسطوره.

الضربات الأمنية الأخيرة كشفت عن جزء كبير من المغارات دي واللي مليانه دولارات وعملات تانية وعملة مصرية واللي مصدرها الاسواق السودا وكانت الضربة الكبيرة لامبراطور الدهب روماني عيسى واللي وقع بكنز ثمين من الدهب 160 كيلو مرة واحدة كان مخبيهم في محلاته بالجمالية ودا غير الدولارات اللي اتمسكت معاه وبعدها الأمن اقتحم مغارة علي بابا في حداىق اكتوبر  ولقي فيها اكتر من 100 مليون جنيه ودولارات وريالات سعودي و جنيهات استرليني بعد ما أرشد عنها اتنين من تجار العملة اتقبض عليهم في الجيزة وكان معاهم عربية مليانة عملة أمريكية وقالوا احنا مجرد بنوصل الفلوس وقالوا على موضوع الخزنة السرية في جراج بعمارة في الحدايق وازاي معمولة على مساحة  كبيرة في الجراج تحت الارض ومخفية بحيطان وهمية وليها باب سرس ومش اي حد يكتشفها وفعلا الشرطة راحت الجراج ووصلت للمغارة السرية وكانت المفاجأة غرفة كاملة مليانة دولار وجنيهات من السقف للأرض وطلعت تبع حوت كبير شغال في العملة والصاغة.

المهم التحقيقات في مغارة الحدايق وصلت لاسم  رجل أعمال شهير  صاحب شركة كبيرة وشهيرة وإنه لتخصص في تجارة الدولار في الفترة الأخيرة وعمل ثروة ضخمة وغسل جزء منها والباقي شاله في المغارة السرية وكشفت مفاجآت لرجال التحقيق عن طريقة الاتجار في السوق السوداء للدولار وطرق التسلم والتسليم والبيع والشراء وأسماء اشهر التجار في السوق.

من القاهرة للجيزة للصعيد قدر الأمن يوصل لمغارات دولار في اسيوط وضبط فيها على حوالي 20 مليون دولار وجنيه وعملات تانية وطلع أصحابها اتنين من أكبر تجار العملة في الصعيد ودا بعد القبض على شركاء ليهم في محافظة الجيزة وطلعت أنها شبكة كبيرة بس متخصصة في السوق السوداء للدولار وجه قبلي.. القصد من كلامنا إننا نقول إن أي حد بيتاجر في حاجة غير مشروعة مسيره هيوقع وهيخسر كل حاجة بداية من الفلوس اللي قعد يجمعها شهور طويلة ولغاية حريته لما يتسجن واللي حصل بيقول إن الداخلية صاحية جدا ومش هتسيب التجار .