ارتباك وقلق في السوق السودا.. يوم الحساب قرب

فى الساعات الأخيرة حصل ارتباك واضح فى السوق السودا للدولار والمضاربين وتجار العملة اختفوا تماما وتنفيذ عمليات البيع والشراء تراجع بشكل ملحوظ وحتى صفحات السوشيال ميديا اللى بتهتم بتداول العملات الجنبية الأدمن بتوعها اختفوا ومفيش تحديثات بتتم لأسعار العملات.. فيا ترى ايه اللى بيحصل فى كواليس سوق الصرف الموازية ؟ وايه علاقة اللى بيحصل بالضربات الأمنية اللى بتعملها الأجهزة الأمنية للقبض على المتورطين فى تداول النقد الأجنبي خارج السوق الرسمية ؟ وهل نشوف قريب نهاية للسوق السودا فى مصر؟

الأجهزة الرقابية والأمنية نشطة جدا فى الايام الأخيرة وبترصد وتتابع كل كبيرة وصغيرة بيتحصل فى سوق صرف العملات الأجنبية وبدأت تلاحق المضاربين وتجار العملة اللى بيضاربوا على الدولار واللى بيتلاعبوا بسعر العملة المريكية وخلوا سعرها يوصل الى حدود 60 جنيه وده طبعا سعر مش عادل ولا حقيقي ولا بيعبر عن القيمة الحقيقية للجنيه المصري لكن طبعا تجار العملة بيستغلوا ازمة نقص الدولار وبيحاولوا يحققوا اكبر قدر من المكاسب

طب الأجهزة عملت ايه عشان تواجه ده ؟

فيه ترحكات بتتم فى اكتر من اتجاه اولا على صفحات التواصل الاجتماعي اللى بتنشر اخبار السوق السودا والتجار المنتشرين لشراء العملة الأجنبية ودول تم رصد عدد كبير منهم والأجهزة الأمنية  ألقت القبض على مجموعة من تجار العملات والمتورطين فى تداول النقد الأجنبي خارج البنوك وتم ضبط كمية كبيرة من الدولارات مع المقبوض عليهم وفيه كمان تحرك بيتم على الأرض لرصد الحيتان الكبار والقبض عليهم وكلنا شفنا وتابعنا أخبار القبض على واحد من كبار حيتان الصاغة والدهب المتورط فى تجارة العملة وفى اشعال ازمة الدولار

حد ممكن يسأل ويقول والدولارات اللى بيتم ضبطها بتروح فين ؟

ده سؤال مهم جدا وعشان الناس تكون متطمنة.. فيه قانون بينظم عملية التعامل مع المضبوطات والأحراز فى قضايا العملة وغسيل الأموال وتجارة المخدرات والآثار وأى مبالغ بيتم ضبطها بيتم التعامل معاها وفقا للقانون ومن خلال محاضر الضبط الرسمية وفى حالة دولارات السوق السودا المبالغ المضبوطة بيتم تسليمها للجهات المعنية فى البنك المركزي وبتدخل فى الاحتياطي النقدي من العملات الأجنبية

وهل الملاحقات اللى بتتم ممكن تقضى على السوق السودا للدولار فى مصر؟

اللى بيحصل بين الحكومة والمضاربين وتجار العملة يشبه لعبة القط والفار وطول الوقت فى شد وجذب بين الطرفين الدولة بتحاول تسيطر وتقضى نهائيا على السوق السودا وتجار العملة وحيتان الدولار بيحاولوا يرجعوا ويمارسوا ألاعيبهم ويحققوا ثروات كبيرة لكن الدولة بتضرب بيد من حديد ومش هتسيب حد وكله هيتحاسب وقريب جدا هيتم الاعلان عن ضربات قوية جدا لتجار العملة الكبار

طب والدولة هتعمل ايه فى موضوع تارجع تحويلات المصريين فى الخارج ؟

الحقيقة ده واحد من اصعب الملفات اللى بتتعامل معاها الدولة ومصر فى اخر سنة خسرت حوالى 10 مليار دولار من تحويلات المصريين فى الخارج سطا عليها عصابات الدولار وعشان كده فيه توجيهات من القيادة السياسية باغلاق الملف ده فى اسرع وقت ممكن بس المواجهة الأمنية لوحدها مش كفاية فى الملف ده لأن المعركة اتنقلت خارج مصر وعشان كده البنك المركزي هو اللى بيدير المسألة من خلال ادوات السياسة النقدية والأوعية الادخارية اللى هيطرحها خلال ايام قليلة وهتكون فيها عوايد كبيرة وشهادات بالدولار وحوافز غير مسبوقة لاستعادة ثقة المصريين فى الخارج واعادتهم لارسال تحويلاتهم عبر القنوات الرسمية من خلال القطاع المصرفي بدل سرقتها من عصابات الدولار واعادة ضخها فى السوق السودا