الصورة مش سودا والبلد فيها خير.. أخبار حلوة هتقلب موازين الأزمات على الأرض

هو صحيح الصورة سودا والواقع يخوف والجاي صعب.. لا دا مش حقيقي بالمرة والاقتصاد المصري قوي جدا وإلا كانت البلد انهارت لكن لسه الخير موجود ومشروعات واخبار حلوة على الأرض بتقول إن مصر هتعدي كل أزماتها بخير رغم التحديات اللي بره واللي جوه . عاوز تعرف ازاي خليك معانا وهنقولك
 

لينا سنتين بنتكلم عن أزمات في أزمات.. دولار وسوق سودا وارتفاع أسعار السلع والخدمات وصعوبة المعيشة وتضخم وتعويم ودهب سعره بيطير واخبار سلبية كل يوم ومنصات وكتائب إلكترونية لتنشر اليأس على مدار الساعة لكن نصر عمرها ما كانت بلد شر ولا مجاعة بالعكس طول عمرها سلة الطعام في افريقيا والخلافة الإسلامية وكانت بتغيث الشعوب من الجوع والكوارث والخير هيفضل فيها ليوم القيامة.
بنقول كده عشان الناس اللي بتسود الصورة وبتنكد علينا بكرة وبتقفل الدنيا في عيون الشباب وهنقول كل حاجة كويسة عشان الناس تعرف إن بكرة افضل من النهاردة.. اول حاجه لازم نفكركم بيها إن مصر في عز الأزمة وذروتها عندها سلع استراتيجية واكتفاء ذاتي من سلع كتير.. آه ممكن سعرها يغلي لكن مفيش سلعة اختفت ولا الناس قطعت بعض عليها وكفاية تبص في أي سوق شعبي وانت تعرف إن البلد دي مليانة خير وفيه سلع كتير أسعارها مناسبة وكمان مصر استفادت جدا من الأزمة في تجنب أسبابها في المستقبل زي تقليل الاستيراد والاعتماد على المنتج المحلي وزيادة وتيرة توطين الصناعة الوطنية ورفع جودتها ودا واضح جدا في الفترة الأخيرة وكمان مصر بدأت تزود الاستيراد عشان تقلل الفجوة بين التصدير والاستيراد وهي أزمة مصر من سنين طويلة وأنها سوف استهلاكي اكتر منه منتج ودا خلاها دائما تحت رحمة الدولار عشان تستورد اكل وشرب وسلع استراتيجية ولوازم انتاج.
كفاية نقولك في يونيو للي فات لوحده انخفضت قيمة الواردات ب5 مليار دولار في شهر واحد وفي نفس الوقت الصادرات زادت 12% في وقت الأزمة ب35 مليار دولار ودا بيقول إن مصر تقدر تقلب المعادلة في الملف الاصعب وتقليل واردات معناه تقليل الاعتماد على الدولار وبالتالي سعره هينزل قدام الجنيه وقوته الشرائية هترجع تزيد لو مشينا في نفس الطريق.
كمام مصر ربنا أداها ثروات كل يوم بتكتشفها زي مناجم الدهب الضخمة اللي ظهرت في الفترة الأخيرة وطرح مناطق واسعة جدا للتنقيب وكلها فيها بشاير وآخرها اكتشاف منجم ابو مروان بالصحراء الشرقية باحتياطي استراتيجي 290 ألف طن وبجانب منجم السكري الضخم ومع اكتشاف بقية المناجم مصر هتبقي عندها ثروات دهب زي النفط في الخليج وفي علوم الاقتصاد الدهب يعني دولار بالظبط ودا ملف كفيل يقلب المعادلة بردو.
كمان عندنا اكتشافات بترولية ضخمة في منطقة النرجس وإعلان شركة شيفرون دخول حقل ضخم السنة الجاية الضخمة ولسه الاكتشافات شغالة وبخلاف دا كله عندنا ملف واعد في الاستثمارات ومشروعات بمليارات الدولارات في خليج السويس ومنطقة قناة السويس وجبل الزيت وطاقة الرياح وتقدر ترجع لجوجل وتشوف حجم المشروعات اللي بتتعمل في المناطق دي وغيرها وباستثمارات عربية وأجنبية ودا كله غير شبكة الموانئ وخطوط التجارة الدولية اللي مصر عملتها وهتخليها مركز إقليمي للتجاره الدولية كل ده وحاجات تانية كتير بتقول إن مصر بلد قوي اقتصاديا والجاي هيكون خير ووفرة.