متشلش هم الريال.. خطوات وشروط تبديل العملة للحجاج والمعتمرين

في مشكلة كبيرة بتواجه المعتمرين وحجاج بيت الله الحرام حاليا بعد ما ربنا يكتب لهم زيارة البيت الحرام، وهي ازاي يجيبوا الريال السعودي اللي هيحتاجوه في السعودية وهما بيأدوا مشاعر الحج والعمرة للأكل والشرب والانتقالات والخدمات والهدايا وغيرها من لاوزام الحجاج والمعتمرين.. طيب اية هيا الطرق الموجودة قدام الحجاج والمعتمرين علشان يبدولوا العملة من البنوك.. والنسبة اللي المسموح بيها كام.. واية هيا الاجراءات اللي هتطلبها البنوك علشان تدي الريال..  لو عايز تعرف البنوك والاجراءات اللي هتحتاجها علشان تصرف الريال من البنوك شوف الفيديو ده للآخر.

البنوك حاليا بتمر بأزمة كبيرة في توفير العملات الاجنبية.. واحد من ضمن العملات دي هو الريال السعودي واللي بيزيد الطلب عليه في مواسم الحج والعمرة وبيحتاجه المسافرين للسعودية علشان يصرفوا منهم علي احتياجاتهم، وفي ناس كثيرة بتضطر تشتري من السوق السوداء وللاسف راحوا ضحايا نصب واشتروا باغلي من ثمنة الرسمي في البنوك بكثير، واغلبنا مش عارفين اية هيا البنوك اللي بتدي الريال للحجاج والمعتمرين واية شروطهم .

اية هيا شروط البنوك لتبدل الجنية المصري مقابل الريال للمعتمرين وحجاج بيت الله الحرام؟.
البنوك حاليا بتيح تدبير العملة للمسافرين بغرض العمرة والحج لعملائهم فقط بشرط يكون الحساب الشخصى للعميل نشط لمدة متقلش عن 3 أشهر، ووجود تذاكر طيران السفر مؤكدة السفر والعودة، وكمان جواز سفر ساريٍ، وصورة من تأشيرة السفر عليها تاشيرة عمرة.. وتقديم نموذج طلب بتبديل العملة بالفرع قبل السفر بـ48 ساعة على الأقل.. وبتكون حدود تبديل العملة باعلي نسبة فى كل مصرف وبحسب المتاح فيها من فئة الريال .
 

بنك مصر أتاح لعملائه إمكانية تغيير العملة المحلية بما يعادلها من الريال السعودى بحد أقصى 2000 ريال للمسافرين للعمرة وبيخصم مبلغ التبديل من الحساب الشخصى للعميل، اما بنك القاهرة فقدم خدمة تغيير العملة المحلية بما يعادلها من الريال السعودى بحد أقصى 1000 ريال، بشرط طلبها قبل السفر بـ 48 ساعة.

وكمان بنك أبو ظبى الإسلامى اتاح تبديل الجنيه المصرى بالريال السعودى في حال السفر لفريضة العمرة بما يعادل 200 أو 300  أو 500 دولار وفقا لتصنيف العميل بالبنك، اما بالنسبة لبنك الإسكندرية فاتاح تبديل العملة المحلية بما يعادلها من الريال السعودى بقيمة 600 ريال للعملاء العاديين ومن 1500 الي 2000 ريال لكبار العملاء، بشرط يكون الحساب نشط لمدة متقلش عن 3 أشهر.
ومن بنك الاسكندرية بنروح للبنك المصرى الخليجى اللي اتاح امكانية تبديل العملة للريال السعودى بما يعادل 250 دولار بشرط تقديم تذاكر طيران مؤكدة السفر والعودة .
اما البنك الزراعى فأتاح إمكانية تبديل العملة للريال السعودى بحد أقصى 2000 ريال لعملائه فقط، بشرط تقديم طلب للفرع قبل السفر بـ 48 ساعة، وتقديم جواز سفر مختوم وتذاكر الطيران مؤكدة السفر والعودة.

اما بالنسبة للبنك العربى الأفريقى الدولى فقدم خدمة تبديل العملة المحلية بالريال السعودى بشرط تقديم طلب قبل السفر بـ 4 ايام علي الاقل وبيكون الصرف وفقا لمبلغ الريالات الموجودة بالفرع.
ومن البنك العربي الافريقي الدولي بنروح للبنك الأهلي المصري اللي اتاح إمكانية تغيير العملة المحلية بالريال السعودى بشرط تقديم الطلب قبل السفر بـ 48 ساعة، وعلي حسب رؤية فروع البنك وظروف العميل وتصنيفه، واخيرا بنك المصرف المتحد حدد خدمة تبديل المحلية بالريال السعودى لعملائه فقط برضوا بشرط تقديم طلب للفرع قبل السفر بـ 3 ايام عمل، وحدد الحد الاقصي للتبدل وفقال لرؤية الموظفين بالفروع وظروف كل عميل .