بأمر السيسي مفاجآت سارة في قانون البناء.. أخيرا هتبني براحتك
أخيرا قانون التصالح هيطبق والناس هترجع تبني بعد 3 سنيبن وقف حال والشباب مش عارف يبني بيت يتجوز فيه في الصعيد وبلاد الأرياف في بحري.. لكن خلاص العقدة اتحلت بقرار رئاسي وكمان بتسهيلات كبيرة جدا.. تعالوا نشوف ايه اللي حصل في الأيام الأخيرة والمصاريف كام والأماكن اللي حددها القانون
أخيرا وبعد سنين الناس تعبت فيها قانون البناء بقي جاهز على التنفيذ .. مصادر في وزارة التنمية المحلية وهي المعنية بمتابعة تنفيذ القانون في القرى والمدن كشفت لبانكير عن تفاصيل جديدة بخصوص العمل على اللايحة التنفيذية لقانون البناء بعد تصديق الرئيس عبدالفتاح السيسي على القانون، وتوجيهاته من الأول بالتخفيف عن المواطنين في الأسعار والرسوم ودا سبب إنه رجع أكتر من مرة لمجلس النواب عشان يتم تعديله.
المصادر قالت كمان إنه بعد الانتهاء من وضع اللايحة التنفيذية هيتم إرسالها إلى لجنة المحليات ولجنة الإسكان بمجلس النواب لمراجعتها بشكل نهائي وبعد كده هيتم بدء العمل بالقانون واللي هتتنشر كل تفاصيله طبعا دا غير إنك تقدر توصل الوحدة المحلية في القرية أو المركز وتسأل عن التفاصيل.
المفاجأة بقي اللي كشفتها المصارد بتقول إنه هتكون فيه انفراجة كبيرة عند بداية تطبيق القانون على أرض الواقع ومن المفاجآت دي هيتم فتح تراخيص البناء داخل عواصم المدن والأحياء بعد وقفها لمدة 3 سنوات، ودا غير القرى والكفور والنجوع طبعا.
مش كده وبس ده كمان هيتم تعديل اشتراطات البناء القديمة وهيكون فيه تسهيلات جديدة على المواطنين في الاشتراطات اللي بتتناقش بشكل نهائي دلوقتي وإن أصحاب المباني اللي حصلت على نموذج 10 ت تقدر دلوقتي تستكمل طابق واحد وفق نص القانون.
نيجي للنقطة الأهم واللي الناس بتسأل فيها دايما وهي رسوم التصالح بعد صدور اللائحة التنفيذية للقانون.. شوف ياسيدي الطلبات اللي خدت موافقة ومدفعتش الرسوم كاملة، هتكمل دفع بقية الرسوم للحصول على نموذج 10، ومش هيتم تحديد أي زيادة جديدة في الرسوم عليهم.
وفيه مفاجأة تانية كمان بتقول إنه بعد صدور اللايحة التنفيذية وتطبيق القانون هيتم فتح باب التصالح لمدة تحددها الحكومة، وهتكون أسعار التصالح في مخالفات البناء كما هي بحد أدنى 50 جنيه وحد أقصى 2500 جنيه للمتر، وهيتم إقرار خصم 5% إذا تم تقسيط المبلغ على مدار 5 سنوات وفي حال الدفع الفوري، بالإضافة إلى خصم ما تم دفعه من غرامات في الأحكام القضائية.
