زيارة الأخبار السعيدة.. ماذا يفعل محافظ البنك المركزي في واشنطن؟

من ساعات وصل الى العاصمة المريكية واشنطن وفد مصري رفيع المستوى بيضم محافظ البنك المركزي حسن عبدالله ووزير المالية محمد معيط ووزيرة التعاون الدولي رانيا المشاط في زيارة مهمة هيلتقي خلالها الوفد بعدد من المسئولين فى الادارة الأمريكية وعلى رأسهم وزيرة الخزانة بالااضفة الى لقاءات فى واجتماعات في غاية الأهمية مع مسولي صندوق النقد الدولي.. فيا ترى ايه الملفات اللى هيناقشها الوفد المصري فى واشنطن ؟ وايه الأخبار السعيد اللى جاية من هناك؟ وهل الزيارة تنجح فى اقناع مسئولي صندوق النقد برفع قيمة قرض ال 3 مليار؟ وايه موقف الادارة الأمريكية وباقي الشركاء التانيين فى الصندوق؟

في الساعات الأخيرة استقبلت وزيرة الخزانة الأمريكية  جانيت يلين وزير المالية ووزيرة التعاون الدولى ومحافظ البنك المركزي على هامش زيارتهم للولايات المتحدة الأمريكية  لاجراء محادثات مع صندوق النقد الدولي بشأن مساعدة تمويلية إضافية لمصر والوصول الى نقاط اتفاق فيما يتعلق بالمراجعة الأولى والتانية اللى كان المفروض يتموا فى شهر مارس وسبتمبر اللى فاتوا.

وأرجأ صندوق النقد الدولي صرف حوالي700 مليون دولار كانت متوقعة في 2023، لكنه قال في ديسمبر اللى فات إنه بيجري محادثات لتوسيع برنامج قيمته 3مليار دولار لمصر نظرا للمخاطر الاقتصادية الناجمة عن الحرب بين إسرائيل وغزة.

طب يا ترى ايه اللى هيحصل فى ملف قرض ال 3 مليار ؟

تقدر تقول كده بنسبة كبيرة ان مصر خلاص حصلت على الضوء الخضر من جانب الصندوق لمضاعفة القرض وحصول مصر على 6 مليار دولار مش 3 زي ما كان الاتفاق القديم بيقول

والصندوق حاليا بقا متفهم دور مصر وموقفها المهم فى ملف الصراع فى الشرق الأوسط وانها لعبت دور مهم وفعال فى ملف القضية الفلسطينية وقدمت كل الدعم والمساندة لأهالى قطاع غزة وانها كانت حلقة وصل بين كل الاطراف

طب وايه موقف التعويم ةهل الصندوق لسه مصمم عليه ؟

المفاجأة ان المسئولين فى صندوق النقد الدولى ما فتحوش أصلا موضوع التعويم مع وفد الحكومة فى الاجتماعات اللى تمت وأكدوا ان الهدف الرئيسي هو مساعدة مصر على مواجهة التضخم اللى ارتفع لمستويات قياسية فى الشهور الأخيرة كمان المسئولين فى الصندوق ما اتكلموش عن اى شروط جديدة للموافقة على رفع قيمة القرض

وبنسبة كبيرة حتى لو فيه تحريك لسعر الصرف فده هيكون قرار الحكومة بالتنسيق مع البنك المركزي لضبط فوضى سوق الصرف ومش هيكون ليه أى علاقة بالصندوق ولا بالشروط اللى بيقولها وطالبها قبل كده

طب وامتى بعثة الصندوق هتيجي مصر؟

حاليا بيتم التنسيق بين وزارة المالية والمسئولين فى الصندوق لتحديد موعد الزيارة وبنسبة كبيرة الزيارة هتحصل قبل نهاية الربع الول من 2024 وهيتم خلالها اجراء المرجعتين الاولى والتانية مع بعض ووقتها مصر هتتسلم على الأقل 700 مليون دولار وهتصرف باقى الشرايح تباعا

طب امتى ممكن أزمة الدولار فى مصر تخلص؟

من ساعات المستشار سامح الخشن المتحدث باسم مجلس الوزراء طلع فى تصريحات تلفزيونية وأكد أن أزمة الدولار فى مصر إلى زوال هتنتهي قريب جدا وأعلن ان الحكومة بتعمل على حل المشكلة من جذورها من خلال العمل على جذب الاستثمارات الأجنبية وتشجيع المكون المحلي.

متحدث الحكومة كشف إن برنامج الطروحات ييستهدف مشاركة القطاع الخاص وقال انه خلال فترة صغيرة هيتم الاعلان عن طروحات جديدة لشركات مملوكة للحكومة هيتم دخول القطاع الخاص فيها وان الحكومة بتستهدف الوصول بنسبة القطاع الخاص في الاستثمارات إلى 65‎%‎.

الخشن اتكلم بصراحة ووضوح عن أزمة الدولار اللى بتعانى منها مصر من مارس 2022 ولحد دلوقتي وقال ان أزمة الدولار حصلت بسبب الأزمات العالمية وهروب الأموال من الدول النامية للدول المتقدمة وأكد ان فيه إجراءات لمعالجة الموضوع بشكل كامل من خلال جذب المزيد من الاستثمارات الأجنبية والاستمرار في برنامج الإطروحات

وبعيدا عن كلام المتحدث باسم مجلس الوزراء اوعا تفتكر ان الحكومة واقفة تتفرج على أزمة الدولار ومبتعملش حاجة ومستسلمة للأمر الواقع.. واوعا تفتكر كمان ان البنك المركزي مبسوط باللى بيحصل في السوق السودا للدولار أو انه راضي عن المضاربات اللى بتتعمل في سوق العملة.. وده لأن  الحكومة والبنك المركزي ومعاهم جهات تانية كتيرة في الدولة شغالين ليل نهار عشان يقفلوا الملف ده نهائيا.

والحكومة بتحاول بكل الطرق انها تقضى على الأزمة دي بشكل نهائي لأنها عاملة مشاكل كبيرة جدا .. مشاكل في عجز الموازنة .. ومشاكل في ارتفاع مستوى معيشة المصريين ومشاكل في التضخم ومشاكل في الديون يعنى من الآخر كده أزمة نقص العملة الأجنبية منغصة عيشة الحكومة وبتقضي على اى محاولات اصلاح او تطوير بتحاول مصر تنفذها في اخر سنتين.