قبل نهاية 2023 .. الدولار يتلقى أكبر ضربة خلال آخر 3 سنوات
من بعد بداية الغزو الروسي لأوكرانيا الدولار حرفيا مسح الأرض بكل عملات العالم وكان ماشي زي القطر السريع بيدهس أي عملة تقف في طريقه ولا كان عامل اعتبار لا ليورو ولا إسترليني ولا ين ولا يوان ولا حتى روبل وخلال ال 3 سنين اللى فاتوا وبسبب سياسة الفيدرالي التشددية في مواجهة التضخم والارتفاعات الكبيرة في سعر الفايدة الأمريكية حقق الدولار اكبر مكاسب ليه وسط تراجع قيمة كل عملات العالم تقريبا.. بس قبل أيام من نهاية 2023 واضح ان الدولار بدأ يفقد عرشه وواضح اننا هنشوف تراجع ليه الفترة الجاية خصوصا في ظل التوقعات القوية بتخفيف السياسة النقدية للفيدرالى الأمريكي وخفض الفايدة الأمريكية.. فيا ترى ايه اللى بيحصل للدولار ؟ وليه أقوى عملة في العالم بتتراجع؟
رغم بعض الصعود اللى حصل للدولار في الساعات الأخيرة لكنه ما زال في طريقه لإنهاء عام 2023 على أول خسارة سنوية من 2020 قدام اليورو وسلة من العملات التانية وده بعد كتير من التقارير والبيانات اللى بتتوقع بدء مجلس الاحتياطي الفيدرالي خفض أسعار الفائدة في مارس على أقرب تقدير.
وبتتركز التساؤلات لعام 2024 حوالين امتى ممكن الاحتياطي الفيدرالي يبدأ خفض أسعار الفائدة، وما إذا كان الخفض الأول لسعر الفائدة هيهدف لتجنب الإفراط في تشديد السياسة النقدية مع انخفاض التضخم أو بسبب تباطؤ النمو الاقتصادي الأمريكي.
ومن وقت ما أطلق الفيدرالي الأمريكي دورته لتشديد السياسة النقدية في أوائل 2022 كانت التوقعات المرتبطة بمقدار الحاجة لرفع الفائدة هي المحرك الأساسي لقوة الدولار الأمريكي قدام سلة عملات العالم ومنها اليورو والجنيه الإسترليني وليوان الصيني والين الياباني والروبل الروسي وغيرهم من العملات التانية
ولكن مع تواتر البيانات الاقتصادية اللي بتشير إلى استمرار تباطؤ التضخم في الولايات المتحدة تحول تركيز المستثمرين للموعد اللى ممكن يبدأ فيه الفيدرالي خفض أسعار الفائدة
واكتسبت التوقعات دي زخم بعد الميل للتيسير في اجتماع البنك الفيدرالي حول السياسة النقدية في ديسمبر
وصعد الدولار مقابل سلة من العملات 0.13 % إلى 101.32 نقطة مرتفع من أدنى مستوى في خمسة شهور عند 100.61 اللي سجله يوم الخميس اللى فات .
ورغم كده لسه مؤشر الدولار بيتجه لتسجيل خسارة بنسبة 2.10 % خلال 2023 وبانخفاض بنسبة 4.62 % خلال الربع الأخير من السنة وده أسوأ أداء خلال عام كامل .
وانخفض اليورو 0.19 % إلى 1.10 دولار ليسير دون أعلى مستوى في 5 شهور عند 1.11 دولار اللي وصل ليه الخميس وبيتجه اليورو نحو تحقيق مكاسب بنسبة 3.04 % في 2023 وده أول عام إيجابي للعملة الأوربية الموحدة من 2020.
ومن المتوقع أن يسجل الدولار مكاسب سنوية بنسبة 7.56 % مقابل الين الياباني ولا تزال العملة اليابانية تتعرض لضغط من السياسة النقدية فائقة التيسير اللى بيتبناها بنك اليابان المركزي .
ويعد الفرنك السويسري أحد أفضل العملات أداء هذا العام حيث خسرت العملة الأمريكية 8.99 % أمام العملة الفرنسية وده أسوأ انخفاض من 2010.
