البنك المركزي يتحرك.. قرارات جريئة وحاسمة بعد وصول الدولار الى 56 جنيه
فى الساعات الأخيرة فيه قفزات مش طبيعية فى سعر الدولار بالسوق السودا.. قفزات لا ليها علاقة بالعرض والطلب ولا ليها علاقة بأي أسباب اقتصادية منطقية وكل الحكاية شوية تجار ومضاربين بيلعبوا بالسوق وبيعملوا كل اللى هما عاوزينوا لغاية ما الأمور قربت تخرج عن السيطرة.. وعشان كده البنك المركزي بدأ يتحرك للقضاء على فوضى سوق الصرف ووضع نهاية للسوق السودا للعملة.. فيا ترى البنك المركزي هيعمل ايه ؟ وايه الخطوات اللى ممكن ياخدها عشان يعيد الانضباط لسوق الصرف ؟ وهل ممكن يعمل اجتماع استثنائي خلال الأيام الجاية بخصوص أسعار الفايدة وكمان سعر الصرف؟
اللي بيحصل فى السوق السودا للعملة صعب يستمر ومفيش دولة فى العالم عاوزة تدخل استثمارات أجنبية ممكن تسمح بالفوضى الموجودة فى سوق الصرف ووجود أكتر من 5 أسعار للدولار السعر الرسمي والسعر فى السوق الموازية وسعر الدهب وسعر العربيات وسعر الأجهزة المنزلية يعنى من الآخر كل واحد بيعر العملة الأمريكية بمزاجه.. وده وضع غلط ومش هيخلى اى مستثمر يفكر ابدا انه ييجي مصر لأنه كده لا هيعرف يحسب هيصرف كام ولا ممكن يكسب كام والحل الوحيد هو القضاء على السوق السودا وتوحيد سعر صرف الجنيه مقابل العملات الأجنبية
والبنك المركزي بالتعاون مع الحكومة شغال على الملف ده وفيه اكتر من سيناريو مطروح للتعامل مع الأزمة أولهم تحرير سعر صرف الجنيه لسد الفجوة الكبيرة بين السعر الرسمي للدولار فى البنوك واللى بيتدال عند حدود 31 جنيه والسعر فى السوق السودا واللى وصل فى الساعات الأخيرة الى 56 جنيه
طب لو حصل تعويم جديد ممكن سعر الدولار فى البنوك يوصل لكام ؟
وفقا لأكتر من تقرير صادر عن مؤسسات تمويل دولية فسعر الدولار فى البنوك مرشح يوصل من 40 الى 45 جنيه على نهاية الربع الأول من 2024 بس صعب يحصل تعويم للجنيه للمرة الرابعة فى اقل من سنتين الا لو البنك المركزي وفر سيولة دولارية يقدر يستخدمها كغطاء للسيطرة على السوق لأن من غير السيولة دي محدش يقدر يتوقع ممكن سعر الدولار يوصل لفين
طب لو فيه تعويم ده ممكن يحصل امتى ؟
بص وفقا للجدول المعلن فاول اجتامع للجنة السياسة النقدية فى البنك المركزي هيكون فى شهر فبراير الجاى لكن لو الأمور استمرت بالشكل اللى احنا شايفينوا فممكن بنسبة كبيرة يكون فيه اجتماع استثنائي للجنة هيتم فيه تحريك سعر الفايدة وطرح شهادات استثمار بعائد هيكون ضخم جدا للسيطرة على السيولة الموجودة فى السوق وكمان لامتصاص السيولة اللى هتنتج عن فك شهادة ال 25% .. ومع تحريك سعر الفايدة بنسبة كبيرة ممكن يكون فيه تحريك لسعر الدولار لأن زي ما قولنا لحض1راتكم اللى بيحصل ده صعب جدا يستمر وليه مخاطر كبيرة على الاقتصاد المصري
