حصري ومفاجأة.. قرارات جديدة من البنك المركزي للتخلص نهائيا من أزمة الدولار والسوق السوداء

أزمة الدولار طالت وصعبت الأيام على الناس والدولة وبقت مش معقولة ولا يمكن السكوت عليها اكتر من كده لان حتي لو كان فيه أزمة حقيقية في الدولار لكن اللي خلاها مصيبة هي ناس استغلت دا ونزلت تلم وتضارب وتخزن ومش مهم الأسعار تولع ولا الناس مش قادرة تشتري.. لكن دوام الحال من المحال وخلاص الطوفان قرب وكل استغل وتاجر بقوت الناس هيتحاسب واللي كسب جنيه هيرجعه عشرة.. ليه بنقول كده وايه اللي حصل واللي جاي
 

 
اوعي تفتكر إن الدولة ساكتة على السوق السوداء ولا تجار العملة وعاجبها الوضع دا لأن مفيش حكومة عاوزة تعيش في أزمات كل يوم بتزيد ولا حكومة عاوزة اللي بنته في سنين تيجي عصابات تهده في شهور.. بالعكس لولا الدولة كانت واقفة بقوة كان زمان مفيش حاجة اسمها جنيه أصلا وكان زمان الناس حرفيا مش لاقية تاكل لأن سعر الدولار كان هيضرب في 100 بالنسبة لأسعار دلوقتي ..

لكن الجديد إن فيه مفاجآت من العيار التقيل جاية في الطريق وزي ماقلت مصدر مصرفي رفيع المستوى لبانكير  إن  البنك المركزي المصري بيستعد للمواجهة الحاسمة في أزمة سوق الصرف بكامل جوانبها يعني مش بس السوق السودا ولا تجار العملة لكن المنظومة كلها وبقرارات ثورية كمان ودا هيكون مع بداية السنة الجديدة وحسب المصدر القرارات هتشمل سعر مستوى سعر الفايدة وعلى مستوى سعر الصرف لحل المشكلة من جذورها وخلاص مش هيبقي فيه سعرين للدولار في البلد. ودا عشان المركزي عاوز يصلح الخلل في الأسواق ويعالج التشوهات وعشان يجيب استثمارات ضخمة للبلد ودا لأن مصر مظلومه جدا في الملف مقارنة بحجم الفرص اللي عندها ودا لأنه مش ممكن الاقتصاد هيجذب استثمارات أجنبية مع وجود سعرين للعملة.

مش كده وبس دا كمان وحسب معلومات بانكير البنك المركزي المصري عنده خطة محكمة وشاملة بخصوص سعر الصرف والقضاء على السوق السوداء  يعني مش بس قرارات،  وغالبا زي ما قلنا بداية تنفيذ الخطة الحاسمة زي ما قلنا بحزمة قرارات يعني هيكون مجموعة من القرارات اللي بتكمل بعض ومش مجرد قرار وبعدها قرار تاني ودا بيورينا قد ايه المركزي بيشتغل على حل المشكلة واكيد وصل في النهاية للخطة السرية اللي هيبدأ تنفيذها اول السنة يعني خلال أيام قليلة .

طيب ممكن حد يقولي يبقى اكيد المركزي هياخد قرارات صعبة زي التعويم مثلا .. هرد على حضرتك واقولك مش شرط يكون فيه تعويم لكن لو حسبناها بالعقل وربطنا الأمور ببعضها هتلاقي إن السر في التوقيت واكيد الحكومة وصلت لحلول جذرية لفيلم الدولار طيب هو مثلا إيه اللي هيحصل في أول السنة.. معانا العضوية الرسمية لبريكس ودخول اتفاقيات تبادل العملات مع دول كتير حيز التنفيذ جايز دا يكون ليه علاقة بتوقيت تنفيذ خطة المركزي.. ومش عاوزين ننسي إن البنك المركزي المصري عنده أدوات كتيرة جدا يقدر يستخدمها في أوقات معينة، زي  مثلا قرار وقف بطاقات الخصم وممن كمان يلغي التعامل على فىات معينة من أوراق الدولار غير اللي موجوده في البنوك وعن طريق السريال نامبر زي ما عملت امريكا كده في الدولارات المجمدة واللي لغت التعامل عليها وغير حاجات تانية كتير ممكن تخلص البلد نت كابوس للدولار وماكنش ينفع تتنفذ قبل كده لكن  جي وقتها دلوقتي.