انفجار في دولار السوق السوداء و مهزلة في الذهب

متابعينا الكرام  على منصات بانكير أهلا وسهلا بكم وجولة جديدة لأهم الموضوعات والتقارير اللي قدمتها وحدة أبحاث بانكير على مدار اليوم النهاردة الثلاثاء 26 ديسمبر 2023

منصات بانكير قدمت تقارير مهمة جدا النهاردة عن أخر التطورات الاقتصادية والبداية من أزمة الدولار واللي طالت وصعبت الأيام على الناس والدولة وبقت مش معقولة ولا يمكن السكوت عليها اكتر من كده.

الجديد بقى إن فيه مفاجآت من العيار التقيل جاية في الطريق وزي ماقال مصدر مصرفي رفيع المستوى لبانكير  إن  البنك المركزي المصري بيستعد للمواجهة الحاسمة في أزمة سوق الصرف بكامل جوانبها يعني مش بس السوق السودا ولا تجار العملة لكن المنظومة كلها وبقرارات ثورية كمان ودا هيكون مع بداية السنة الجديدة وحسب المصدر القرارات هتشمل سعر مستوى سعر الفايدة وعلى مستوى سعر الصرف لحل المشكلة من جذورها وخلاص مش هيبقي فيه سعرين للدولار في البلد. ودا عشان المركزي عاوز يصلح الخلل في الأسواق ويعالج التشوهات وعشان يجيب استثمارات ضخمة للبلد ودا لأن مصر مظلومه جدا في الملف مقارنة بحجم الفرص اللي عندها ودا لأنه مش ممكن الاقتصاد هيجذب استثمارات أجنبية مع وجود سعرين للعملة.

مش كده وبس دا كمان وحسب معلومات بانكير البنك المركزي المصري عنده خطة محكمة وشاملة بخصوص سعر الصرف والقضاء على السوق السوداء  يعني مش بس قرارات،  وغالبا زي ما قلنا بداية تنفيذ الخطة الحاسمة زي ما قلنا بحزمة قرارات يعني هيكون مجموعة من القرارات اللي بتكمل بعض ومش مجرد قرار وبعدها قرار تاني ودا بيورينا قد ايه المركزي بيشتغل على حل المشكلة واكيد وصل في النهاية للخطة السرية اللي هيبدأ تنفيذها اول السنة يعني خلال أيام قليلة .

وحدة بانكير قدمت تقارير عن شلة المنتفعين واللي خربوا سوق الدهب لدرجة إن منصات الدهب وقفت نشرالتسعير لوقف التلاعب بالاسعار..

كلنا شايفين الدهب ولع ازاي وسعر جرام 21 اللي المصريين بيشتروه بكميات كبيره داخل على 3300 بالمصنعية وازاي جنيه الدهب امبارح زاد 700 جنيه في 24 ساعة فطبيعي اللي بيحصل في السوق مش طبيعي وبيهدد بخروج الأمر عن السيطرة وعشان كده منصات تجارة الدهب والمجوهرات وقفت نشر الأسعار عبر الإنترنت، و تسعير الدهب بالأسواق المحلية، نتيجة عدم الاستقرار.

خبراء اقتصاد فسرو قرار منصات تجارة الدهب والمجوهرات عبر الإنترنت، بوقف حركة تسعير المعدن بالأسواق المحلية، بأنه نتيجة عدم الاستقرار، وتعرض السوق لعمليات تلاعب واسعة من يوم الأحد اللي فات وبدليل إن ارتفاع الأسعار تزامن مع العطلة الأسبوعية والسنوية للبورصة العالمية واللي المفروض الأسعار فيها تستقر لغاية ما البورصة العالمية تشتغل وتشوف اتجاه الأسعار .

الخبراء شايفين إن المضاربين بقوا يستغلوا العطلات الرسمية للتلاعب في أسعار الدهب، وده من خلال تداول الدهب بسعر الدولار في السوق الموازية فوق 52 جنيهًا للدولار الواحد، ودا  لا يعكس السعر الحقيقي للدهب عالميًا ومن هنا جت موجة الارتفاع المبالغ فيها وطبعا  التلاعب بأسعار الدهب بيضر  بمنظومة صناعة وتجارة الدهب كلها  في مصر، وهيكبد صغار التجار خساير لا يمكن تعويضها.
سعيد إمبابي، المدير التنفيذي لمنصة «آي صاغة» لتداول الدهب والمجوهرات عبر الانترنت، كشف  مفاجأة لما قال إن فيه شلة منتفعين بيهدروا مقدرات البلد في ظروف صعبة تمر بيها مصر، وخلق حالة من الهلع بين المواطنين لزيادة المبيعات.

ولسه معاكم في سوق الدهب ونصيحة  رجل الأعمال المهندس نجيب ساويرس للاستثمار المضمون ونصيحته لاي حد بيفكر يشغل فلوسه

الملياردير المصري نجيب ساويرس، معروف إنه من اشطر رجال الأعمال في مصر والمنطقة في الاستثمار في الدهب بالذات ودا لأنه تفكيره سابق عصره وسابق الأزمات وفي عز الدهب ما كان رخيص ساويرس استثمر في الدهب بشكل كبير عالمياً وقال ساعتها إنه هو الاستثمار الافضل وفعلا اتحققت نبؤته وكسب مكاسب خيالية بعد أزمات الدهب في الشهور الأخيرة.

ساويرس طلع من ساعات وقال نصيحته بخصوص أفضلية الاستثمار في 2024 ما بين الدهب والعقارات و قال نجيب ساويرس إنه بيفضل التوازن في الاستثمار بين الدهب والعقارات يعني نظرية ماتحطش البيض كله في سلة واحدة ودي نظرية اقتصادية ناجحة جدا ومنطقية وتحديدا لما يكون فيه تقلبات في السوق.
،وقال ساويرس: "أي واحد عاقل يقول أنا عندي 100 جنيه، يحط 20 -30 في الذهب، و20-30 في العقار، و10-20 في السندات" واتكلم عن نفسه وتجربته وقال نا اخترت أبقى حاطط 50% في الذهب، لأنه بشوف الدنيا بتقلب، والعالم كل يوم فيه حرب جديدة.. في غزة وليبيا والسودان وأوكرانيا".

التقرير الأخير اللي قدمته منصات بانكير كان بخصوص سعر الدولار في السوق السودا واللي قفز الى 53 جنيه.. 
والحقيقة ارتفاعات الدولار بالسوق الموازية جت بعد ساعات من قرار عدد من البنوك المصرية بوضع قيود إضافية على استخدام البطاقات الائتمانية في المعاملات الدولارية وكمان بعد ما قررت لجنة السياسة النقدية للبنك المركزي المصري في اجتماعها،يوم الخميس الإبقاء على سعر الفائدة زي ما هو.

ارتفاعات دولار السوق السوداء مدفوعة كمان بتوقعات تعويم الجنيه فى الربع الاول من 2024  وده بعد ما رفع بنك HSBC توقعاته لسعر الدولار مقابل الجنيه في بداية السنة الجديدة والتوقعات دي بتشير إلى خفض متوقع لقيمة العملة مما يعني أن سعر الدولار ممكن يتراوح بين 40 و45 جنيه