هل قناة السويس في خطر أمام مشاريع الممرات الأخرى؟
مايخفاش على حد المشاريع الأخرى اللي الدول بتحاول تنشأها ك بديل ل قناة السويس.. ودا بغرض تهديد أهمية مصر الكبرى والمرتبطة بالقناة.
وفي أحد المشاريع اللي بتنطرح بقوة دلوقتي وهي قناة بنجوريون.. ودا مشروع إسرائيلي بحت.. واللي في ناس شايفة أنه بيمثل تحدي ومُهدد لقناة السويس.
لكن الحقيقة أن القناة دي ولا غيرها هايمثل تهديد ل قناة السويس.. وتعالوا نشوف لية
الدول أصحاب التجارة العالمية الكبرى كل اللي عايزينه من الممرات المائية أنها تكون قصيرة منجزة.. غير مكلفة ودا اللي بيفرق قناة السويس عن أي ممر مائي آخر.
والفرق بين قناة السويس ومشروع بنجريون هو أن قناة السويس أقصر.. يعني قناة السويس طولها ١٩٣ كم، بينما أقصر نقطة بين خليج العقبة و البحر المتوسط طولها ٢٥٠ كم، ودي زيادة ٢٥٪ على الأقل لو جرى ربط البحرين بخط مُستقيم، ودا مُستحيل عمليًا وسياسيًا، والواقع إن طول قناة بنجوريون ممكن يقرب من ٣٠٠ كم في حالة تنفيذها.
كمان مسافة الإبحار بين الشرق والغرب أقصر عبر خليج السويس، من خليج العقبة، وبالتالي تكلفة الملاحة والرحلة الواحدة هتكون أعلى، لإن التكلفة التشغيلية للسفن أكبر مكون فيها هي تكلفة الوقود.. ودي ميزة في صالح قناة السويس عن مشروع إسرائيل المأمول.
كمان في حالة انشاء قناة إسرائيلية.. فهي مرتبطة بخليج العقبة ال مدخله ضيق للغاية، مقارنة ب مدخل قناة خليج السويس ومدخل خليج العقبة، مدخل خليج السويس في أضيق نقطة فيه ٢٥ كم، بينما الجزء الصالح للملاحة التجارية في خليج العقبة هي المنطقة بين جزيرة تيران شبه جزيرة سيناء، أو ما يُطلق عليه مضيق تيران، وال أعرض نُقطة فيه لا تتجاوز ٣ كم.
ولو جينا ل تقسيمات المناطق الاقتصادية في خليج العقبة، هتلاقوه متقسم بين أربع دول، هي مصر، السعودية، الأردن وإسرائيل، طيب السُفن ال هتعبر قناة بنجوريون في حال حفرها هتعبر المناطق الاقتصادية ل ٣ دول على الأقل منها في طريقها للخروج من خليج العقبة، بينما في قناة السويس فالسفن بتجري بس في مصر لوحدها.
وماتنسوش أن قناة السويس اتبنت من أوخر القرن قبل ال فات، وجابت تكاليفها الاستثمارية، بينما قناة بنجوريون هتكون لسة بتتبني، ودا معناه إنه قناة السويس عندها قُدرة كبيرة للغاية على المُنافسة بالسعر، بينما دا مش متاح للقناة الجديدة ال عاوزة تعوض استثماراتها.
طبعا المشاريع اللي الدول عايزه تأسس لها أيا كان الأمر فهو يستدعي مننا المزيد من التطوير في القناة علشان نتجاوز مرحلة قدرتهم على المنافسة لكن دا مايخلناش نقلق اوي على أهم ممر مائي في العالم.
