الجرام بـ5 آلاف جنيه.. الدهب هيوقف لغاية فين

 ياترى الدهب رايح لغاية فين وليه التوقعات بتقول إنه لسه هيزيد وايه آخره رفع الأسعار وهل هيجي وقت الدولة توقف التداول وانتي الأمور ممكن تخرج عن السيطرة وصحيح جرام الدهب هيوصل 5 آلاف وامتي
 

ناس كتير مش مصدقة اللي بيحصل في سوق الدهب والصاغة والأسعار اللي كل بترفع ووصل الجرام 21 نهاردة 3090 جنيه في أول التعاملات، والحقيقة اللي بيحصل في الأسعار دا حكم السوق وشوية مخالفات بسيطة لكن فعلا الدهب في العالم سعره بيرفع كل يوم ودا عشان اسباب كتير منها الدولار والأحداث العالمية واللهفة من البنوك المركزية في العالم على تخزين وشراء المعدن الأصفر لأنه أداة تحوط مهمة جدا.
وفي مصر ممكن تضيف اسباب تانية لارتفاع الدهب منها قلة المعروض وزيادة الطلب بشكل كبير وبخصوص نقص المعروض هنا بتحصل مخالفات من بعض كبار تجار الصاغة واللي بيعملوا زي أي تاجر سلعة بيعمل لما يلاقي إقبال كبير عليها وهو إنه بيحجب جزء منها عن الناس خاصة لو فيه قلق في الأسواق وبكده بيضمن يكسب اكتر بأقل تكلفة ويضمن إنه عنده رصيد دهب.
طيب ارتفاع أسعار الدهب دي هتستمر لغاية امتي.. السؤال دا جاوبت عليه شعبة الدهب نفسها من شوية وقالت إن لسه الأسعار بتزيد  لأن فيه  ارتفاعات في البورصة العالمية، بعد تثبيت الفائدة في البنك الفيدرالي الأمريكي، و زيادة في الطلب عن المعروض، بجانب الأزمات الاقتصادية والحروب المستمرة، وتداعياتها في مصر توقف استيراد الذهب الخام من الخارج، أحد العوامل التي تسببت أيضًا في زيادة أسعار، يعني نفس الكلام اللي قلناه لحضراتكم.

وعلى فكرة شعبة الدهب قالت حاجة مهمة أنه لولار مبادرة الحكومة للمصريين بالخارج بدخول الدهب إلى مصر، بدون جمارك كان الجرام خرج عن السيطرة يعني تقدر تقول كده أنه كان هيدخل على 5 آلاف جنيه للجرام الواحد .. ودا لأن الدهب اللي دخل مع المصريين بالخارج عمل توازن شوية في السوق وحسب اخر احصائيات المصريين تقريبا دخلو 3 طن ونص دهب ودي كمية كبيرة جدا وتخيل لو مش موجوده في السوق كانت الأسعار راحت فين.
والغريبة إنه رغم ارتفاع الأسعار الكبير لكن لسه خبراء الدهب بينصحوا الناس في الاستثمار فيه، لأنه الملاذ الآمن.. وهو استثمار طويل المدى، وليس قصير المدى يعني هتشتري وتحزن لحوالي 3 سنين وكل ما قعد كل ما المكسب زاد .. طيب امتي الحكومة توقف التداول في سوق الدهب.. عشان نبقي عارفين بردو كل حاجة وليها قواعد وطول مافيش مخالفات كبيرة وواضحة مش هيتم وقف التداول وخاصة إن الأسعار عالمية وفيه طلب على السلعة فالحكومة هتسيبه عرض وطلب واللي معاه يشتري واللي معهوش ما يلزموش واهي الناس بتستثمر.

وبنفكركم في النهاية إن مجلس الوزراء المصري، وافق  على مد العمل بالقرار رقم 1801 لسنة 2023، الخاص بمنح إعفاء جمركي لواردات الذهب من الجمارك، وذلك لمدة 6 أشهر تنتهي في 10 مايو 2024 يعني لو محصلش مد للمبادرة تاني والاسعار رجعت ترفع تخيل بقى سعر الدهب هيوصل كام ساعتها.