هو يعني اية تعويم 2024؟؟ ولية مصر بتلجأ للتعويم؟؟ ومين المستفاد والخاسر من التعويم؟؟

بنسمع كلام كتير اوي بس للأسف من غير ما نعرف مضمونه.. خاصة المصطلحات الاقتصادية اللي بالنسبة لناس كتير مكلكعة.. تلاقي حد يقولك سعر صرف وتعويم مرن وحر.. وأنت ولا فاهم حاجة من دول.

بس العيب مش على المتلقي العيب على القائل لأنه لازم يحدد مرداف المصطلحات اللي ممكن تكون مش معروف مضمونها لدى الناس.

بس احنا مش هانسيبك لوحدك كدا.. لأ هانعرفك يعني اية تعويم وبالتفصيل

أولًا كدا.. يعني اية تعويم.. واية أنواعه؟؟

بص يا فندم.. مبدئيًا كدا لازم تعرف أن التعويم دا .. هو أسلوب فى إدارة السياسة النقدية،

كلام معقد.. نبسطها.

بص يا فندم.. التعويم دا يعني البنك المركزي يسيب سعر صرف العملة ومعادلتها مع العملات الأخرى، يتحدد وفقاً لقوى العرض والطلب فى السوق النقدية، ودا بيتحدد وفقًا لمستوى تحرر الاقتصاد الوطني للدولة و كفاية أدائه و مرونة جهازها الإنتاجي.

وعلشان تفهم  كلامنا دا.. لازم لازم نتكلم الأول عن أنواع التعويم

أول نوع من أنواع "التعويم" هو "التعويم الحر".

والتعويم الحر دا .. يعني أن البنك المركزي يسيب سعر صرف العملة يتغير ويتحدد بحرية مع الزمن بحسب قوى السوق والعرض والطلب، وأن دور البنك المركزي يكون مقتصر على محاولاته في التأثير فى سرعة تغير سعر الصرف، و ليس الحد من ذلك التغير.

والنوع دا بيتم الاعتماد عليه غالبًا في الدول الرأسمالية الصناعية المتقدمة، زي الدولار الأمريكي و الجنيه الاسترلينى و الفرنك السويسري، ودي دول بالمناسبة منتجة وبتتحكم بشكل كبير في السوق العالمي.

طيب النوع التاني من التعويم.. فهو اسمه التعويم المدار.. ودا المقصود بيه أنه يتم ترك سعر الصرف يتحدد وفقًا للعرض والطلب بس مع تدخل البنك المركزى كلما دعت الحاجة إلى تعديل هذا السعر مقابل بقية العملات، و دا بيكون استجابة لمجموعة من المؤشرات زي مقدار الفجوة بين العرض والطلب فى سوق الصرف، و مستويات أسعار الصرف الفورية و الآجلة، والتطورات فى أسواق سعر الصرف الموازية.

طيب لية مصر.. والدول بشكل عام بتضطر تعمل تعويم؟؟

بص يا فندم.. وفقًا للأسس والنظريات الرأسمالية.. فمسألة خفض قيمة العملة بيخلي الحصول على قيمة الأشياء فيها أضعف.. ودا بيساعد في ضخ أموال ساخنة للاقتصاد.

كمان مسألة خفض العملة.. يعتبر تكنيك بتعتمده بعض الدول علشان يتم رفع قيمة المواد المستوردة ودا يخلي الناس تستغنى عن المواد دي.. وبالتالي تقل وتيرة الطلب العالي. لكن المشكلة هنا بتكون مع الدولة الخاضعة يعني اللي  بتعتمد على الواردات بشكل رئيسي، وبالتالي بيقع على كاهل المواطنين توابع الخفض بزيادة كبيرة في أسعار المواد الأساسية والتضخم وخفض قيمة المعيشة وزيادة الفقر.

ومن أهم الأسباب اللي بتخلي الحكومة تحرر سعر العملة.. أو تعوم الجنيه.. هو مسألة مواجهة الميزان التجاري المختل وارتفاع قيمة الواردات عن الصادرات. وكلما نجحت دولة في معالجة هذا الاختلال دا بيأثر في تقليص العجز التجاري.

وبالمناسبة في دول بتستفيد من تحرير العملة.. زي الصين مثلًا.

لأن مع خفض قيمة العملة.. زي ما قولنا سعر الأشياء بيقل وبالتالي بتزداد درجة التنافسية على منتجات الدولة في السوق العالمي، ودا بيدفع المستثمرين للقدوم ودفع أموالهم للحصول على الأصول والحصص بأسعار أرخص.

ودا مصر اللي بتعمله.. وهو أنها تقدم تسهيلات كبيرة للمستثمرين.. وبتحرير سعر الصرف بيتم زيادة التصدير للخارج.

السؤال الأهم المتعلق بـ لية مصر ماحررتش سعر الصرف لحد دلوقتي.. هانعرفه في الحلقات الجاية تابعونا.