هو في قرض بدون فوائد في مصر 2024؟؟ ويا ترى لو موجودة مكانها فين؟؟
يا رااااجل تخيل.. في دلوقتي في مصر قروض بدون فوائد.. يعني هاتاخد فلوس ولما تيجي تسددها مش هاتدفع مليم زيادة.. طبعًا بتقول .. هو في كدا... تعالى نشووووووووووف
بص يا فندم.. مبدئيًا كدا.. فاكر زمان لما كانت الناس تقول .. روح خد قرض حسن من الهيئة الفلانية أو البنك الفلاني.. والقرض الحسن دا يعني مبلغ مش كبير اوي .. بس تقدر تاخده وماتدفعش عليه مليم فوائد.
أهو القرض الحسن دا لسه موجود.. وفين؟؟ .. في وزارة الأوقاف المصرية.. واللي بتبلغ قيمته 15 ألف جنيه بس..
طبعًا المبلغ مش كبير.. بس أهو حاجة تفك الزنقة.. عايز تشتري حاجة بشكل عاجل.. في أزمة وعايز فلوس كدا يعني.
طيب القرض دا من حق مين.. يعني مين اللي ياخده؟؟
بص يا فندم.. القرض دا من حق أي موظف حكومي.. بس لازم يكون لسه في خدمته مقدار 3 سنوات قبل ما يطلع على المعاش.. وهو علشان قرض لذيذ كدا وسهل.. فاللي هايتم هو أن الوزارة هاتخصم من المرتب قيمة 300 جنيه بس في حالة تحويل الراتب.
والقرض دا بقاله فترة وممكن تدخل موقع الوزارة وتتأكد من الأوراق والإجراءات وغيره.
بس كدا؟؟؟
لأ.. لسه في تاني.
في قرض كمان بيقدمه بنك ناصر الاجتماعي.. واللي هايديك عشرة آلاف جنيه وبدون فوائد، بس هما هايخدوا منك بس مصاريف إدارية بسيطة، وتسدد على أقساط شهرية لمدة 3 سنوات وبيتم إعدامها حال وفاة المقترض بعد الشر يعني.
والفئات المستحقة لقرض بنك ناصر هما أصحاب المرتبات والمعاشات وورثة المعاشات.
بس علشان تاخد القرض .. لو أنت من أصحاب الرواتب.. لازم ألا تقل مدة الخدمة الفعلية عن 3 سنين- ولازم تقدم ضامن من العاملين بالجهاز الادارى للدولة– وتحول القسط أو المرتب على البنك.
خد معاك بس وأنت رايح البنك.. صورة بطاقة الرقم القومى للمقترض والضامن بس تكون ساريـــة.. وكمان لازم الـرقم التأمينى للمقتـرض والضامن وطبعًا لازم تقدم بيان بمفردات (مرتب أو معاش) للمقترض ومرتب الضامن.
طيب لو أنت بعد الشر يعني .. بعيد عنك.. بتمر بأزمة صحية عنيفة.. وعايز قرض من البنك علشان الأدوية والعلاج واللذي منه..
ففي برضوا.. قرض بيقدمه في بنك مصر.. واللي بيوفر قرض العلاج بدون فوائد وبقيمة تمويلية بتصل لـ 8 آلاف جنيه، وفترة سداد مقدارها 3 سنوات، مع دفع مصاريف إدارية 2% من إجمالي قيمة القرض.
أما عن الأوراق المطلوبة للحصول على القرض فهي شهادة طبية حديثة معتمدة من أحد المستشفيات التابعة لوزارة الصحة، وصورة الرقم القومي، وشهادة موثقة براتب العميل أو الضامن.
