ليه مصر خصصت 50 مليار جنيه لدعم السياحة؟.. مش التعليم والصحة أولى؟!
يا ترى ليه الحكومة أعلنت عن تخصيص 50 مليار جنيه لدعم السياحة؟ وازاى الحكومة سايبة التعليم والصحة وبتدعم السياحة والترفيه برقم ضخم زي ده ؟ ومش المفروض السياحة هى اللى تجيب دخل اضافى للدولة مش نصرف عليها؟ وهل فيه شروط للدعم ده ولا كل واحد هياخد اللى عايزه بمزاجه؟
فى اجتماعه الأخير وافق مجلس الوزراء على مبادرة جديدة لدعم القطاع السياحى بقيمة 50 مليار جنيه لبناء أو إنشاء وتشغيل غرف جديدة أو الاستحواذ على غرف مغلقة.
واستعرض المجلس حزمة الحوافز المقترحة لتشجيع قطاع السياحة على الإسراع فى التوسع فى الاستثمار فى بناء الغرف الفندقية ضمن مُبادرة دعم القطاعات الإنتاجية.
وتم التأكيد خلال الاجتماع، على أن العائد من الاستثمار فى إنشاء غُرف فندقية جديدة هيدعم الاقتصاد القومي، لأن كل 15 ألف غرفة فندقية تساهم فى تحقيق ضريبة قيمة مضافة بين 1 و2 مليار جنيه تقريباً، وحوالى 2 مليار جنيه ضريبة أرباح تجارية وصناعية إلى جانب توفير حوالى 45 ألف فرصة عمل جديدة “مباشرة وغير مباشرة” مع بدء تشغيل الغرف
وهيتم تحديد حجم الائتمان المتاح لكل شركة فى ضوء حجم أعمالها والقواعد المصرفية المنظمة، على ألا يتجاوز الحد الأقصى المستخدم المسموح به لكل شركة بين 1 و 2 مليار جنيه للعملاء المرتبطين، شريطة أن تكون معاملات كل شركة مع بنكين بحد أقصى، من البنوك المشاركة بالمبادرة.
وهيتم توجيه المبلغ الخاص بمبادرة السياحة الجديدة، وحده الأقصى 50 مليار جنيه، لبناء أو إنشاء وتشغيل غرف جديدة أو الاستحواذ على غرف مغلقة، على أن يتم الحصول على إفادة صادرة من وزارة السياحة والآثار بأن الغرف بالفعل كانت مغلقة فى تاريخ لا يقل عن 12 شهر على الأقل قبل بداية السحب، على أن تكون الغرف المذكورة فى نطاق مناطق القاهرة الكبرى، والأقصر، وأسوان، والبحر الأحمر، وجنوب سيناء، والساحل الشمالي.
وهتكون بداية السحب من المبالغ المخصصة للمبادرة اعتباراً من أول يناير 2024 وحتى 31 ديسمبر من نفس العام.
حد ممكن يسأل ويقول .. يعنى الدولة سايبة القطاع الخدمية المهمة زي الصحة والتعليم وبتدعم رجال الاعمال اللى بيشتغلوا فى السياحة؟
بص يا سيدي.. حزمة الدعم الجديدة المقدمة من الحكومة هتساهم فى زيادة موارد الدولة من العملة الأجنبية بالإضافة كمان إلى المساهمة فى خفض معدلات البطالة كنتيجة مباشرة لتحفيز القطاع الخاص على تنمية استثماراته
يعنى الدولة مع كل جنيه بتدفعوا فى دعم السياحة بيرجعلها 10 وبالعملة الصعبة كمان يعنى ده مش رفاهية ولا حاجة ده قطاع حيوي مهم مصر محتاجة ليه جدا الفترة الجاية خصوصا وان الارقام اللى حققها كبيرة مش صغيرة
كمان مين قال لحضرتك ان الدولة بتدعم السياحة وناسية التعليم والصحة بالعكس التعليم والصحة هما أكتر قطاعين مخصص ليهم دعم فى الموازنة العامة والدولة بتوليهم اهتمام خاص وبالتالى مفيش تعارض ما بين انك تدعم السياحة وفى نفس الوقت تواصل دعم قطاعات حيوية وهمة للمصريين زي الصحة والتعليم.
طب ايه شروط الاستفادة من المبادرة؟
يشترط لطلب الاستمرار فى الاستفادة من المبادرة أن العميل يكون ملتزم فى السداد طبقاً لشروط القرض مع البنك وكمان بيحظر على أى عميل أن يقوم باستخدام أى من الائتمان المتاح يله تحت المبادرة فى سداد أية مديونيات تانية مستحقة عليه فى تاريخ العمل بالمبادرة أو أثناء تنفيذ المبادرة للقطاع المصرفي.
وهيتم وضع الآليات التنفيذية للمبادرة بالتنسيق بين وزارة المالية وكل من البنك المركزى المصرى ووزارة السياحة والآثار وغيرها من الأطراف المعنية.
وبيتضمن الشق التاني من المبادرة الإشارة إلى أنه هيتم منح المشروعات الاستثمارية اللى بتُقام بعد العمل بقانون الاستثمار رقم 72 لسنة 2007، وفقاً للخريطة الاستثمارية حافز استثماري خصما من صافى الأرباح الخاضعة للضريبة، ومن بينها المشروعات السياحية اللى بيصدر بتحديدها قرار من المجلس الأعلى للاستثمار.
و تم استعراض عدد من الشروط لاستحقاق الحوافز بما يضمن حوكمة الإجراءات ومنها وضع آلية لالتزام الشركات ببيع نسبة 40% من الإيرادات المحققة بالعملة الأجنبية من خلال القطاع المصرفي والحصول عليها بالسعر الرسمي طوال مدة تقديم الدعم وهو 5 سنين، وأن يحصل المستفيد من المبادرة على الدعم المقدم بعد تقديم رخصة التشغيل، واقتراح مد مهلة تقديم رخصة التشغيل إلى 30 يونيو 2026 لإتاحة الفرصة لزيادة الطاقة الفندقية.
