علشان تشتري عربية مش قدامك إلا الطرق دي
مافيش حد مانفسوش يشتري عربية يقضي بيها مشاويره ويخلص من هم المواصلات وخاصة لو رجلك طويلة وبتتعب من الزنقة بتاعة الميكروباص.. طيب علشان تشتري عربية تروح بيها شغلك .. مشاويرك.. تعمل اية.
كوباية الشاي الجميلة وتعالى نقولك على الطريقة.
أكيد أي حد مننا محتاج «عربية» تساعده على السفر والرحلات، ويقضي بيها مشاويره أو يروح بيها شغله، لكن بيواجه مشكلة في الفلوس والتمويل، والحل الغالب أنه يشتري بالتقسيط المريح وعلشان كدا هانقولك على الطريق.
عندك مثلا البنك الأهلي اللي بيوفر قرض لدعم السيارات بتقسيط يوصل ل ١٠ سنوات وبأقل المصاريف الإدارية.
والبنك الأهلي بيعتبر من أهم المصارف اللي بتساعد على تمويل ودعم السيارات واللي قروضه بتتباين حسب نوع وحداثة السيارة، يعني مثلاً بيقدم قرض بيبدأ من ٢٠٠٠٠ ألف جنيه وحتى مليون جنيه في حالة أنك عايز تشتري عربية ملاكي حديثة وبيكون سعر الفايدة عليها ٨.٥٪ متناقصة، والتقسيط على ٧ سنين بشرط تحويل المرتب.
وتقدر برضوا من نفس البنك تاخد قرض يصل ل مليون جنيه علشان تشتري عربية ملاكي حديثة، بنسبة فايدة ٩.١٤٪ ومدة سداد بتوصل ل ٩ سنين، وكمان بدون تحويل الراتب، ومن غير أى مقدم والتقسيط حتى ٧ سنين.
والبنك الأهلي كمان بيقدم قروض على السيارات الصيني، واللي بيوصل قيمة القرض عليها ل مليون جنيه، ومدة تقسيط ٧ سنين، بس لازم تدفع مقدم ٥٠٪ من قيمة السيارة، وبضمان تحويل المرتب.
وبالنسبة لقروض السيارات المستعملة تقدر دلوقتي برضو تاخد قرض من البنك بفايدة ٣٪ متناقصة، بس بشرط وجود وعاء ادخاري، والتقسيط بيوصل حتى ١٠ سنين، ومن غير مقدم خالص، بس يكون سنك مايكونش أقل من ٢١ سنة ومش أكبر من ٦١.
ولأصحاب المهن الحرة، تقدر تشتري سيارة جديدة وبفايدة ١٧.٢٥٪ ومدة تقسيط تصل ل ٥ سنين.
وعلى مدة قدرها ٩٠ شهر مدة تقسيط.. تقدر تشتري عربية من خلال بنك ناصر الاجتماعى.. ودا متاح للعاملين بالحكومة وقطاع الأعمال العام والقطاع الخاص المؤمن عليهم وأصحاب المعاشات.. وكمان أصحاب الأعمال الحرة.. وذوي الاحتياجات الخاصة للمدنيين والعسكريين.
أما بالنسبة لخطوات الحصول على قرض السيارة من بنك ناصر فدا بيتطلب سداد 25% من عرض السعر كمقــــدم للســـيارة.
والميزة في القرض دا أنه بدون حظر بيع في حال تحويل مرتب أو معاش.
طبعا القروض الشخصية ممكنة برضوا في أنك تاخد القرض وتشتري بيه اللي أنت عايزه وحسب إمكانياتك تختار الأنسب.
دول اسهل بانكين ممكن تشتري منهم سيارة ملاكي
