طلعة روح .. مولد الدولار هينفض امتى.. مفاجأة قريب اوووي

ياترى مولد الدولار هينفض امتى وازاي وليه كل مانقول الأزمة هتعدي ترجع تاني وايه الخطوات والمفاجآت اللي جاية في الطريق وبتقول إن هزيمة السوق السوداء للدولار قربت اوووي
 

شهور طويلة ومصر بتعاني من نقص في الدولار وهو سبب كل المتاعب الاقتصادية اللي الناس عايشة فيها وهو السبب الرئيسي في ارتفاع الأسعار المستمر وفي غلاء المعيشة وهو سبب انقطاع الكهرباء وهو سبب ظهور السوق السودا وتجار العملة والناصبين والمتاجرين في السلع واقوات الناس ولولا أن البلد شديدة وبتواجه على قد ما تقدر كان زمان المصريين مش لاقين ياكلوا حرفيا وكان الدولار طاح في الكل وانتهي زمن الجنيه من زمان.

الدولة حاربت ولسه بتحارب عشان توقف خروج اي أزمة عن السيطرة بجانب خطة تنمية لازم تستمر عشان البلد تطلع لقدام والتأخير يوم واحد بيفرق بعدين سنين في بلد عدده بيزيد كل ثانية وداخل على 2 مليون طفل بيتولد كل سنة يعني عدد سكان دول حولينا دا غير اللاجئين والأزمات اللي حولينا من كل ناحية وتحديات ملهاش أول من اخر

طيب ليه كل ما نقول أزمة الدولار هتتحل ترجع تاني.. عشان للاسف كل مرة بتحصل حاجة خارجة عن إرادة. الدولة وكل مرة تظهر أزمة جديدة في العالم ندفع احنا تمنها عشان لسه مقدرناش نكمل خطط الاكتفاء الذاتي من اكلنا وشربنا وعندنا فاتورة الاستيراد كانت قربت في سنة من السنين على 100 مليار دولار وفي وقت كل إيرادات الدولة المصرية من الدولار 99 مليار دولار دا غير اقساط الديون وفوايدها وكانت آخر أزمة ظهرت أحداث غزة في الشمال الشرقي واللي كان ليها تأثير كبير على السياحة واحنا في موسم راس السنة وغير اللي بيحصل في باب المندب وتهديد حركة السفن اللي جاية على القناة في وقت البلد قي في عرض دولار.

والحقيقة الأزمة الأخيرة جت في وقت قلنا خلاص السوق السوداء للدولار بتنتهي بعد اخبار الاتفاق الجديد بتاع صندوق النقد الدولي والدعم الأوروبي وتمديد أجل ودايع عربية وفعلا بدأ الدولار ينهار وينزل ل40 جنيه وكان مكمل في النزول لغاية ارتفاع الخطر من أحداث غزة
.
لكن لكل بداية نهاية وزي ما الدولار توحش وبقي غول بيبلع كل انجاز قريب جدا مصر هتخرج من الأزمة ومش بالكلام لكن بالفعل ودا من خلال عدد من الإجراءات القوية اللي بتحضرها الحكومة لتوفير الدولار بجانب قرض الصندوق ودخول مصر للبريكس بعد ايام قليلة وتقليل الاعتماد على الدولار وتقليل الاعتماد على التعاملات مع الدول خارج البريكس عشان. توفر اكبر كمية من الدولارات بالإضافة لتعظيم إيرادات الدولار من باقي قطاعات الاقتصاد زي الاستثمارات واللي مصر ماشية فيه كويس جدا رغم أزمة تعدد أسعار صرف الجنيه وقدرت منطقة قناة السويس الاقتصادية أنها تجذب حوالي 2 مليار دولار في سنة دا غير بقية الاتفاقيات اللي جاية وغير ملف الصناعة والتصدير واللي حصلت فيه طفرة كبيرة وكل دا بيقول إن مولد الدولار مهما طال فنهايته قريت جدا.