فلوسك في البنك في خطر.. تعمل اية لو البطاقة البنكية وقعت في أيد حد

لو البطاقة البنكية الخاصة بيك اتسرقت.. ماتحطش أيدك على قلبك واتقول الحقووووووووووني.. لأ أنت لازم تصحصح كدا وتركز معانا اوي في الكلام اللي هانقولك عليه في الفيديو دا

ماتقفش محتاس لو لا قدر الله بطاقتك البنكية اتسرقت.. لازم فورًا تبدأ في إجراءات وقف البطاقة البنكية.. ودا من خلال خطوات هانقولك عليهم دلوقتي.

طبعًا.. البطاقة البنكية هي أهم حاجة في محفظتك لأنها بتمثل جزء مهم من حياتنا علشان بنستخدمها بشكل يومي فى تعاملات كتير زي السحب والدفع عند الشراء أونلاين والسحب النقدي من أجهزة الصراف الآلي، وغيرها من الاستخداامات..

لكن فى حالة ضياعها بتكون وقتها فى مشكلة كبيرة جدا، لأن فلوسك اللى عليها بتكون مهددة بالسرقة خاصة لو السارق كان عارف الرقم السري.. وهنا لازم تتعامل مع الموقف بسرعة جدا وهو إنك تقوم بإبلاغ البنك اللى أنت تابع له بأن بطاقتك البنكية تعرضت للسرقة وأنها معرضة للاستخدام من قبل السارقين.

وفى أكتر من طريقة كمان علشان تبلغ عن فقدان بطاقتك البنكية، علشان يتم إيقافها فى أسرع وقت من غير حدوث أى مشكلة  تتعلق بسحب الأموال اللى عليها..

وأول حاجة أنك تقددر.. تستغل خدمة الإنترنت البنكي اللى أنت مشترك فيها.. وتقوم فورًا بالإبلاغ عن سرقة البطاقة البنكية علشان يتم إيقافها من البنك..

وتاني حاجة.. وهو أنك تقوم وبسرعة بالاتصال بمركز خدمة العملاء التابع للبنك وتتكلم مع ممثلي خدمة العملاء وتبلغهم بالمشكلة اللى بتواجهها وتعرفهم بالتفصيل أنه لازم يتم وقف البطاقة البنكية قبل استخدامها من السارق.

أو فى خيار كمان أنك تقوم بزيارة أقرب فرع من فروع البنك اللى أنت تابع ليه وتبلغ عن سرقة البطاقة أو فقدانها وأنك فى حاجة إلى إيقافها علشان ماحدش غيرك يستخدمها.

ودي يمكن أبرز الخيارات اللى ممكن تقوم بيها فى حالة أن بطاقتك البنكية اتعرضت للسرقة أو للفقدان.

كمان مهم أنك تحاول بعد كدا تتجنب أي محاولات السرقة أو الاستيلاء على الأرقام الخاصة بالبطاقة البنكية بمعنى أن الرقم السري الخاص بالدخول إلى الحساب البنكي.. يكون سر حربي ماحدش يعرفه.. يعني ماتروحش عند ماكينة الصراف الآلي وتبدأ في تسجيل عملية الدخول قدام كل الناس... هنا ممكن تستخدم جسمك في تغطية الجزء الخاص بعملية التسجيل.

خلي بالك لأن سرقة البطاقات البنكية أمر منتشر الفترة دي.. ومعرفة الرقم السري الخاص بيك هو الباب لسرقة فلوسك من الحساب الخاص بيك