لو أنت عايز قرض شخصي 2024 فـ "الفيديو" دا ليك.. الخطوات بالتفصيل
الميزة في القروض الشخصية .. أنها اتعملت مخصوص علشان تناسب جميع احتياجاتك .. واللي من خلالها تقدر تشتري عربية.. بيت.. عايز تعمل عملية بعد الشر.. تجوز الواد.. أي حاجة من دول.
كمان من المميزات الخاصة بالقروض الشخصية.. أنها بتكون بنسبة فائدة أقل من نسبة الفائدة على القروض الخاصة بالسيارات والعقاراات.. وعلشان كدا هانقول تعمل اية بالظبط علشان تحصل على قرض شخصي.
طبعًا هاتفطر.. وتصحى الصبح.. وتطلع على أي فرع من فروع البنوك اللي قريبة من بيتك.. وتبدأ في إجراءات القرض.
نحب نقل لحضرتك أن الكلام دا غلط.. ومالوش أي أساس من الصحة.. أنت قبل ما تروح البنك لازم تقرأ الأول وتعرف اية مميزات القرض في البنك الفلاني عن القرض في البنك الفلاني وفترات السداد ونسب الفايدة.. واية الأنسب ليك.
المهم.. لما يقع اختيارك على البنك.. هاتروح الفرع.. وأول ما تدخل باب البنك.. هاتلاقي موظف الاستقبال فى وشك.. مبتسم كدا وشيك وبيقولك .. اتفضل يا فندم.. قول طلباتك.. هاتقوله وبكل بساطة أنك عايز قرض شخصي بمبلغ كذا وليكن مثلًا 200 ألف جنيه.
الموظف فى الوقت دا إما يحولك إلى الموظف الاستعلامات.. أو هايقولك بنفسه أولًا.. اية هو الحد الأقصى للقروض الشخصية فى البنك.. واية هي الضمانات.. واية هي فترات التقسيط والفوائد.. وهكذا.
وموظف البنك هايبدأ يتكلم معاك فى الحاجات دي بالترتيب أو من غير ترتيب حسب نوع البنك أو تخصصه.. لية عايز تاخد قرض من البنك.. اية هي الضمانات اللي عندك لو البنك هايوافق على أنه يقدملك القرض.. وكمان الشروط اللي مفروض تكون عندك علشان تستلم قرض من البنك.. وموظف البنك هايشرحلك القروض اللي هو بضمان الراتب.. وعلشان تاخد القرض دا.. فلازم تكون موظف فى القطاع العام أو القطاع الخاص.. ويكون سنك طبعًا أكبر من 21 سنة ومعاك مفردات مرتب.
وتقدم بقى الأوراق المطلوبة واللي هي صورة البطاقة الشخصية وإيصال مرافق حديث.. والايصال حديث يعني مايكونش مر عليه 3 شهور لسه جديد يعني.. وكماان تعهد من جهة العمل.. والتعهد دا معناه ان المكان اللى انت شغال فيه يكون ملزم بأنه مايقطعش مرتبك لحد نهاية القرض.
وبعد لما الموظف يشرحلك اية المطلوب وكله تمام.. تقوم بقى تحضر نفسك لتجهيز الـحاجات المطلوبة دي.. ودا بعد ما تقول سبب مقنع لموظف البنك أنك هاتعمل اية بالمبلغ اللى هاتستلمه.
وبعدين يا صديقي.. تروح تحضر الأوراق اللى قالك عليها دي كلها.. وتسجلها فى ورقة علشان ماتنساش.. وتبدأ تجيب صورة من البطاقة الشخصية وإيصال المرافق سواء ميه أو غاز بقى أو كهربا.. وكمان تجيب مرادفات مرتب من جهة العمل وتعهد منهم بتحويل الراتب على البنك.. وبعد ما تجمع الورق دا.. تروح على الموظف تاني.. وتقدمله كل الأوراق اللي طلبها وتقوله تاني على سبب الاقتراض وبعد كدا هايحددلك الوقت فى حالة القبول أو الرفض واللى بياخد عدد من الأيام ويتم التواصل معاك علشان تستلم المبلغ اللى أنت طالبة.. ومبروك عليك القرض.
وبنقول لحضرتك تاني.. القروض تاخدها لو أنت في أمس حاجة ليها غير كدا أبعد عنها وعن أقساطها وفوايدها.
