أول حاجة هيعملها السيسي في الولاية الجديدة؟

يا ترى ايه اول حاجة هيعملها السيسي في الولاية الجديدة؟ وايه أول ملف هيشتغل عليه عشان يرد الجميل لملايين المصريين اللي انتخبوه؟ وازاي هيعوض الناس على صبرهم وتحملهم للاجراءات الصعبة والقاسية اللي خدتها الحكومة في السنين اللي فاتت؟ ويا ترى هيعمل ايه في ملف الأسعار والأزمات الصعبة زي أزمة السكر والرز والبصل وغيرهم من السلع الاستراتيجية في حياة المصريين؟ 
 

 
الرئيس السيسي أكتر واحد في مصر عارف المصريين استحملوا قد ايه وعارف أن الاسعار حرقت جيوب الناس والوضع بقا صعب وفوق تحمل كتير من الشعب وعشان كده السيسي شغال ليل نهار وبنحاول يسابق الزمن عشان يحل أزمة الدولار اللي هي أم المشاكل دي كلها ولو فعلا نجح في حلها تقدر تقول ان كل المشاكل اللي بنعاني منها هتنتهي وده لأن معظم احتياجاتنا بنستوردها من بره واستيراد  يعني دولار يعني ضغط على الجنيه وفرصة للسوق السودا للعملة.
وعشان كده أول ملف السيسي هيشتغل عليه فورا ويمكن حتى من قبل الإعلان عن نتيجة الانتخابات الرئاسية بشكل رسمي هو وضع نهاية لأزمة نقص العملة وشح الدولار والقضاء على السوق السودا للعملة.
والرئيس السيسي نفسه كان وعد قبل كده ان أزمة الدولار هتبقا تاريخ زيها زي أزمات كتير مرت على مصر

طب السيسي هيعمل ده ازاي؟
السيسي شغال فى الملف ده على شقين شق خارجي وشق داخلي.. الشق الخارجي بيحاول من خلاله يحسن العلاقات مع مؤسسات التمويل الدولية ويزود برامج التمويل الممنوحة لمصر لجذب سيولة دولارية كبيرة وده اللي حصل مثلا مع صندوق وقدر السيسي يقنع المسئولين هناك بأهمية دعم مصر لدورها المهم والحيوي في منطقة الشرق الأوسط وده وضح جدا في أزمة غزة والدور المهم والحيوي اللي لعبتوا مصر في الهدنة وفي إدخال المساعدات لأهالي غزة.. ومن هنا أدرك المسئولين أهمية مصر ومكانتها ولغة الصندوق تجاه مصر اتغيرت ١٨٠ درجة وبدأنا نسمع كلام عن ضرورة دعم مصر والنهضة باقتصادها وان تعويم الجنيه وتحرير سعر الصرف مش أولوية والأهم محاربة التضخم 
وفيه معلومات مؤكدة دلوقتى عن رفع برنامج التمويل لمصر من ٣ إلى ٦ مليار دولار 
ومع الصندوق السيسي بيراهن على دعم اروبا لمصر في حاجتين مهمين جدا الأولى المنحة اللي أعلن عنها الاتحاد الاوربي لمصر بقيمة ١٠ مليار دولار والتانية إعادة جدولة ديون مصر واسقاط بعض الفوايد والقروض.. ودي خطوة مهمة هتخفف الضغط على مصر وهتوفر مليارات الدولارات اللي بيتم استخدامها في سداد التزامات خارجية.
وطبعا كل ده بجانب دعم اخواتنا في الخليج وشفنا ازاى السعودية والامارات وقطر والكويت جددوا ودايعهم في البنك المركزي.. وفي الايام الجاية هيضخوا استثمارات بالملايين لا نعاش الاقتصاد المصري.
طب ده على المستوى الخارجية.. إيه بقا اللي بيعول عليه السيسي داخليا لحل أزمة نص العملة؟
فيه خطة منظمة للتعامل داخليا اولها تقليل فاتورة الاستيراد لأقل حد ممكن ووقف استيراد اي منتج ليه بديل محلي 
كمان فيه اهتمام ملحوظ من الرئيس السيسي بتوطين الصناعة المحلية وده هيخلي الاستيراد يتراجع بشكل ملحوظ وكمان هيوفر ملايين من فرص العمل
واخر حاجة بيعول عليها السيسي ملف الطروحات الحكومية وده هيتم من خلاله بيع عدد من الشركات المملوكة للدولة لصناديق استثمار عربية واجنبية وده هيدخل مليارات الدولارات وهيحل أزمة نقص العملة بشكل كبير