شخصية مفاجأة.. مين هيشكل الحكومة الجديدة

 
ياترى مين اللي هيشكل الحكومة الجديدة وهل مصر محتاجه دم جديد في الوزراء وايه مصير مدبولي وهيروح وهو السيسي لازم يعني يشكل حكومة جديدة
 

خلصت الانتخابات الرئاسية والمصريين كالعادة كسرو التوقعات الخبيثة وخرجوا بالملايين عشان يصوتوا في الانتخابات اللي. اتقالت أنها محسومة.. وزي عادتهم بردوا المصريين طلعوا وانتخبوا لكن كمان احتفلوا قدام اللجان واتحولت محيطات اللجان لمهرجانات فنية وشعبية مش مهم  هيعملوا ايه لكن اهم حاجة المصري بيحتفل في عز همومه وبيضحك في قمة زعله  وفي نفس الوقت هو اذكي شعب على وش الأرض لانه خرج زي ما قلنا بأعداد ضخمة وكمان احتفل في بهجة قدام اللجان ودي كانت رسالة شعبية مقصودة للناس اللي قاعدة بره تنظر وتهاجم الدولة والرئيس وتشوه في كل حاجة حلوة.. طلع المصريين بالملايين عشان يردوا على الإعلام المضلل ويقول إن المصريين مع السيسي على الحلوة وعلى المرة وفي الشدة والكرب الشعب درعه الواقي..

لما تكون الحكاية حكاية وطن ما ينفعش فيها تقف في النص ولما يكون الأمن القومي المصري هو المستهدف ما ينفعش تقعد ساكت ودا اللي عمله المصريين طلعوا بالملايين يقولوا للرئيس السيسي كمل احنا معاك وهنستحمل ارتفاع الأسعار وصعوبة المعيشة وكل حاجة تتعوض إلا البلد في الظروف اللي حوالينا دي من كل حتة.

المصريين قالوا كلمتهم للسيسي وهي تكليف عظيم من شعب عظيم وبعد يوم 18 ديسمبر وهي معاد اعلان النتيجة بشكل رسمي مصر  هتكون بدأت مرحلة جديدة من البناء والتطور والتنمية مرحلة هتبني على اللي اتعمل في البلد من نهضة 
.. نعم فيه مشاكل كتير لكن لا تقارن باللي كان ممكن يحصل لو المشروعات والتنمية دي ماتعملتش.. فيه فرق بين التعثر والسقوط.. وبين المشاكل وبين الكوارث.. وبين الصعوبات والفوضى.

ولأن لكل مرحلة رجالها احتمال كبير الرئيس السيسي وزي ما جرت العادة يكلف بتشكيل حكومة جديدة في مصر بعد ما حكومة الدكتور مصطفى مدبولي عملت اللي عليها ومفيش حكومة في العالم معاها عصاية سحرية بتقول للشيء كن فيكون لكن كله بيجتهد على قد الظروف اللي قدامه.. لكن مين ياترى اللي ممكن يبقي رئيس وزراء خلفا لمدبولي.. في الحقيقة الاسماء كتير ومصر مليانة خبرات وفي الحكومة الحالية اكتر من اسم يقدر يشيل المسؤولية زي الوزير كامل الوزير وزير النقل واللي اسمه مطروح بقوة بسبب الانجازات اللي تمت في قطاع النقل في مصر وبسبب قوة شخصيته وخلفيته العسكرية الصارمة ومعروف مين هو. كامل الوزير.
كمان فيه الدكتورة هالة السعيد وزيرة التخطيط ودي اسم تقيل واتطرح قبل كده لتولي الوزارة بسبب خبرتها وطريقتها في إدارة شؤون وزارته وأيا كان الأسم فأكيد هيجي حد بدم جديد ويكمل المشوار.. أما بخصوص مصير الدكتور مصطفى مدبولي فالرئيس السيسي بيعمل حاجه مهمة جدا من فترة وهي كل كفاءة مصرية او مسؤول كبير ادي وظيفته على كامل وجه مش ييفرط فيه ولا في خبرته وبيعينه في منصب استشاري عشان الدولة استفاد من ثروة الفكر والخبرة والتخطيط اللي جمعها المسؤول السابق علي مدار سنين بدل ما تخطفهم دول تاني استفاد بخيراتهم زي ما كان يحصل قبل السيسي.