اصطياد السفن تهديد للامن القومي.. أول تحرك مصري في باب المندب
ايه اللي بيحصل في مضيق باب المندب وايه علاقته بالأمن القومي المصري وازاي بيهدد قناة السويس ومصر هتتحرك ازاي عشان تمنع الخطر على خطوط التجارة العالمية
بعد اندلاع الأحداث في قطاع غزة في أول أكتوبر اللي فات والعالم كله بيعيش في ترقب وفوضي وجماعة الحوثي استغلت دا وبدأت في استهداف السفن التابعة لدولة الاحتلال سواء اللي بتعود ملكيتها للكيان المحتل أو رايحة المواني بتاعته وكان آخرها استهداف ناقلة نفط نرويجية كانت رايحة
وقال المتحدث العسكري باسم الحوثيين يحيى سريع في بيان، إن الجماعة استهدفت الناقلة بصاروخ بحري بعد أن رفض طاقمها الاستجابة للنداءات التحذيرية.
وقال كمان إن الجماعة منعت، خلال اليومين الماضيين، مرور عدة سفن استجابت لتحذيرات، ولم تلجأ لاستهداف السفينة النرويجية المحملة بالنفط إلا بعد رفض طاقمها كافة النداءات التحذيرية.. طبعا دا تطور خطير جدا ودا لأنه مهما كانت الأسباب الممرات الدولية ليها حصانة وحرمة ويمنع استهدافها حتي في الحروب المباشرة وحتي قناة السويس المصرية مصر منقدرش تقفلها من نفسها إلا في حالات ضيقة جدا زي يكون مثلا عندها حرب مباشرة وساعتها ممكن تضطر ساعتها تقفلها ومحدش يتكلم معاها لكن في العادة الممرات الدولية البحرية بتخضع للقانون الدولي اللي بيضمن حرية الملاحة بأمان.
طبعا استهداف السفن في مضيق باب المندب ليه تأثير مباشر على قناة السويس وعلى النقل والممر البحري الأهم في العالم وفعلا ارتفعت تكاليف النقل على السفن المارة من باب المندب بعد خطف وتهديد وقصف السفن في المضيق المؤدي لقناة السويس ودا غير تأثيره على عدد السفن المارة بالمجري الملاحي وتأثر إيرادات قناة السويس واحنا ما صدقنا الإيرادات تقفز في ذروة أزمة الدولار.
طبعا العالم مش هيسمح بتهديد الممرات البحرية ومصر مش هتوقف ساكتة وهتتحرك في الوقت المناسب علشان تحافظ على مصالحها الاقتصادية وعلى سمعة قناة السويس وحماية التجارة الدولية.
