متى يطلب البنك من العملاء تحديث البيانات.. وازاى تتجنب عمليات النصب

ازاي نتجنب عمليات النصب.. وامتى تعرف أن اللي بيكلمك نصاب مش موظف في البنك.. يلا بينا نعرف

عمليات النصب باسم تحديث البيانات كتر اوي اليومين دول.. واللي بيحصل هو أن النصاب يبعت أو يتصل بعميل بنكي من رقم مجهول ويقوله:" يا فندم بنقوم بعملية تحديث شاملة ومحتاجين حضرتك تقولنا على رقم حسابك البنكي علشان نقوم بتحديث البيانات".

نحب نقول لحضرتك بقى إن.. أول ما تسمع الكلمتين دول أقفل السكة.. دا نصاب وعايز يسرق حسابك البنكي.

واحد هايقولي.. امال اية هي الطريقة اللى بيتم من خلالها تحديث البيانات للعملاء؟.. وامتى دا بيحصل؟ ولية أصلًا بيحصل تحديث؟.. يلا بينا نعرف

أولًا.. عميل البنك عمره ما بيتصل يقولك اديني رقم حسابك عايز أحدث بياناتك.. الكلام دا ما بيحصلشش

وأكيد الموظفين فى البنوك مش قاعدين فاضيين وجت فى دماغهم بالصدفة فكرة تحديث البيانات للعملاء..

اللى بيحصل.. أنك لما تيجي بتعمل أى معاملة بنكية من خلال فرع البنك أو من خلال ماكينة الـ ATM بتلاقي رسالة كدا ظهرالك على الشاشة وعليها ( عزيزي العميل يرجى التوجه إلى فرع البنك لتحديث البيانات) أو من خلال رسالة على الموبايل.. أنك تروح فرع البنك مخصوص علشان تقوم بعملية التحديث.. يعني الموضوع مش قصة شخص يتصل بيك من PRIVATE NUMBER.. ويقولك قولنا أو قوللنا على رقم حسابك وبيانات الحالية علشان نعمل تحديث.. دا نصاب طبعًا

طيب.. البيانات دي عبارة عن اية.. عبارة عن عنوان المراسلات اللي بينك وبين البنك.. لو حصل فى تغيير.. أو لو حصل ترقية فى شغلك وبالتالي اتغير منصبك الوظيفي أو أمور تانية تخص المعلومات بتاعتك فى البنك أو غيرت الرقم الخاص بيك.. أو ما يتعلق ببيانات الدخل السنوي الشهري لو فيها أى تطورات أو تغيررات.. وفى الوقت دا بيكون مطلوب تحديث بيانات العميل لدى البنك

حلو اوي كدا.. كلنا فاهمين لحد هنا.. لية بقى البنوك بتحدث بيانات العملاء؟

- بص يا صديقي.. أى بنك لازم لازم يكون عنده قاعدة بيانات سليمة وحديثة عن كل عملائه ودي بتكون بتوجيهات من البنك المركزي.. أنه بيسمح للبنوك أنها تعرف طبيعة معاملات العميل وتحميه.. وكمان تحاول بقدر الإمكان أنها تقدم الخدمات أو المنتجات البنكية اللى تناسبه واللى تكون فى مستواه.

وأحيانًا أحيانًا البنوك بتطلب تعمل تحديث للبيانات علشان بتكافح عمليات غسيل الأموال أو تمويل مكافحة الإرهاب أو المخدرات.. ودا بيحصل فى حالات استثنائية ولأشخاص بعينهم.. يارب يكون وضحت لحضرتكم لية البنوك بتحدث البيانات ونعمل اية لما تجيلنا رسالة من نصاب.. خلي بالك بقى من فلوسك