السيسي هيفوز .. بس الموضوع مش سهل

لو سألت أي حد في مصر مين هيكسب انتخابات الرئاسة مش هيفكر ثوانى وهيقولك السيسي طبعا وبفارق كبير جدا في الصوات عن أقرب منافس ليه.. ودي حقيقة لا تقبل الشك ولا الجدل.. يعنى لو بصينا للـ 4 مرشحين اللى بيخوضوا الانتخابات مش هتلاقي حد فيهم عمل إنجازات زي اللى عملها السيسي والـ 3 الباقيين حتى تاريخهم في الحياة السياسية مش كبير ولا ليهم مواقف أو حتى أفكار واضحة ممكن تقيمهم عليها.. يعنى من الآخر الموضوع مسألة وقت مش أكتر وهيتم اعلان السيسي ريسا للجمهورية في ولاية جديدة.. لكن الولاية مش هتكون سهلة خالص والسيسي نفسه عارف ده أكتر من أي حد تاني فى مصر.. فيا ترى ايه أبرز التحديات اللى هتقابل السيسي في ال 6 سنين الجاية ؟ وازاى ممكن يتعامل مع التحديات دي ؟ وهل الوقت والامكانيات ممكن يسعفوه لتحقيق أحلامه لمصر والمصريين؟ 
 

النهاردة بدأ المصريين التصويت في الانتخابات الرئاسية اللي هتستمر 3 أيام مع توقعات كبيرة ومؤكدة بفوز الرئيس عبد الفتاح السيسي بفترة رئاسية تالتة، في وقت بتكافح فيه الدولة للخروج من أسوأ أزمة اقتصادية بنعيشها من سنين طويلة. 
وأكتر مكلة شاغلة الناس في مصر هي ارتفاع تكاليف المعيشة مع ارتفاع التضخم إلى مستويات قياسية خلال الصيف بعد 3 تخفيضات في قيمة العملة أدت إلى انخفاض قيمة الجنيه المصري إلى النص تقريبا .
قانون على يوم 18 ديسمبر هنكون عرفنا بشكل رسمي مين ريس الجمهورية واللى هو السيسي زي ما كلنا عارفين.. بس فيه أزمات ومشاكل كبيرة لازم يتم حلها  في أسرع وقت وده التحدى الكبير اللى هيواجه السيسي في الولاية الجديدة.

يعنى خد عندك مثلا أول حاجة بعد الانتخابات الرئاسية فيه توقعات لمؤسسات تمويل كبيرة بان هيكون فيه تخفيض جديد لقيمة العملة مع استمرار النقص الحاد في النقد الأجنبي وممكن جدا يكون التخفيض المتوقع هو الأكبر بالنظر إلى السوق السوداء المحلية اللي بيتم فيها تداول الجنيه بسعر أضعف بكتير من سعره الرسمي
وتخفيض قيمة العملة أو تعويم الجنيه هيزيد من الضغوط المعيشية على المستهلكين وهيخلى أسعار السلع تقفز قفزات جديدة 
طب السيسي بيفكر في الملف ده ازاى ؟ 
السيسي أعلن موقفه من التعويم بشكل واضح وصريح في شهر يونيو اللى فات لما اكد ان مصر بتطبق سعر صرف مرن لكن لو ده هييجى على حساب الناس وخياة المصريين مش هيعمل كده حتى لو ده تعارض مع شروط صندوق النقد الدولي .. يعنى من الآخر السيسي مش مع تخفيض قيمة العملة ورافض بشكل حاد مسألة تعويم الجنيه مرة رابعة خصوصا ان ال 3 مرات اللى فاتوا لما حصل تعويم مفيش مشاكل اتحلت وأزمة نقص العملة بتزيد مش بتختفي 
طب لو اضطر للتعويم .. السيسي هيعمل ايه ؟ 
السيناريو ده مطروح بقوة لأن وارد الأزمة تستمر ويكون التعويم امر لا مفر منه ومالوش بديل وعشان كده البنك المركزي والحكومة بيحاولوا يجمعوا أكبر قدر من السيولة الدولارية عشان لو حصل تخفيض في قيمة الجنيه يقدروا يتحكموا في سوق الصرف ويمنعوا القفزات الجنوينة اللى بتحصل في سعر الدولار بعد اى تحريك في سعر الصرف. 
وخد بالك برضوا ان التعديل المتوقع لسعر العملة هيساعد السلطات الحكومية على المضي قدما في برنامج صندوق النقد الدولي البالغ 3 مليار دولار وده كمان هيمهد الطريق أمام زيادة محتملة في القرض إلى أكتر من 5 مليارات دولار.

طب ايه التحديات التانية اللى هتواجه السيسي في الولاية الجديدة؟ 
موضوع غزة واللى بيحصل على حدودنا ومحاولات تهجير الفلسطينين الى سيناء واحد من اخطر التحديات اللى هتواجه السيسي ومصر بتتعرض لضغوط غير مسبوقة في الملف ده لكن السيسي أعلن بشكل واضح موقف مصر الثابت والتاريخي الرافض لتهجير الفلسطيين ومحاولات تصفية القضية الفلسطينية على حساب مصر.