هاتاخد أعلى فايدة.. اية هي أفضل حسابات التوفير في البنوك 2024
حساب التوفير 2024. فلوس بتجبلك فلوس.. وتقدر تسحبها وقت ما أنت عايز.. النهاردة هانعرف اية هي أفضل حسابات التوفير في البنوك.. وأنت تختار بنفسك.. وأية الفرق بين حساب التوفير والشهادة
البنوك المصرية بتتبارى في تقديم العديد من المنتجات المصرفية.. علشان تقدر تجذب شرائح جديدة من العملاء.. ومن بين المنتجات اللي بتقدمها البنوك المصرية حسابات التوفير.
وطبعا أنت اختيارك بيستقر على أعلى الفوائد اللي بتقدمها البنوك المصرية على حسابات التوفير.. ودا بيكون بعائد شهري ثابت.
أول بنك معانا هو البنك الأهلي الكويتي واللي بيقدم حساب توفير بنسبة فايدة بتصل ل 15%.. وتقدر تاخد العائد بتاعك بنظام شهري.. بس ماتقدرش تفتح الحساب إلا لما يكون بتقدم ٥ آلاف كحد أدنى علشان تفتح الحساب.
وكمان في بنك إسكندرية تقدر تفتح حساب توفير بلس بمعدل فائدة أقل بنسبة ١٪ عن البنك الأهلي الكويتي واللي الفايدة عليه هي 14%.. ودا أي حد يقدر يفتح فيه حساب توفير لأن الحد الأدنى لفتح الحساب هو 500 جنيه بس.
وفي بنك التنمية الصناعية تقدر تفتح برضوا حساب توفير بمعدل فائدة بيصل ل لـ12%.. وتاخد العائد كمان شهريا .. والبنك دا علشان تفتح من خلاله حساب توفير لازم يكون الحد الأدنى هو 5000 جنيه.
وفي بنك قناة السويس تقدر تفتح حساب توفير Elite .. واللي بيقدم فايدة مقدارها من 1.5 - 9.5%.. ودا دورية صرف العائد برضوا بيكون شهري والحد الأدنى لفتح الحساب هو 5000 جنيه.
بينما في حساب التوفير بلس بيقدمه البنك العربي الافريقي الدولي.. واللي أطلق حساب توفير جديد بسعر عائد يتراوح من 18% إلى 20%، ودا بيعتبر أعلى عائد على حسابات التوفير في القطاع المصرفي المصري.
واللي تقدر تفتح حساب فيه بحد أدنى 5 آلاف جنيه، بينما يتم احتساب العائد بحد أدنى 50 ألف جنيه رصيد متبقى في الحساب.
السؤال بقى هو اية الفرق بين الشهادة وحساب التوفير
بص يا فندم .. في الشهادات البنوك بتقدملك العائد مقابل إيداع مبلغ من المال في فترة زمنية محددة .. ولو العميل سحب جزء من المبلغ المودع قبل المدة المحددة اللي غالبا بتكون ٦ شهور بيتم خسارة العائد المحدد سلفا.
وهيتم تحديد الحد الأدنى لاحتساب العائد وفقا لكل بنك،
كمان شهادات الادخار بتدي إمكانية لعملاءها إمكانية الاقتراض بضمان الشهادة، وبيكون العائد شهريا، وربع سنويا ونصف سنويا وسنويا.
أما حسابات التوفير فبتقدم للعميل عائد مقابل رصيد العميل في الحساب في نهاية كل شهر، ومابيشترطش ربط قيمة من المال لفترة زمنية محددة زي شهادات الإدخار، وبيتم تحديد قيمة احتساب العائد على الرصيد المتبقى في حساب التوفير وفقا لكل بنك، وبيكون العائد شهري، وربع سنوي ونصف سنوي وسنوي.
