عمرك سألت نفسك يعني إيه احتياطي نقدي؟ وبيفيد البلد بإيه؟وإيه خطورة انخفاضه؟

  
من ساعات أعلن البنك المركزي ارتفاع صافى الاحتياطيات الأجنبية إلى 35.173 مليار دولار فى نهاية شهر نوفمبر 2023 مقارنة بنحو 35.102 مليار دولار فى نهاية أكتوبر 2023 بارتفاع قدره 71 مليون دولار.. فيا ترى ايه هو الاحتياطي النقدي؟. . وبيتكون من ايه؟ .. وايه فايدته للاقتصاد؟ وهل فيه خطورة لما ينخفض؟ وليه الدول بتحاول بكل الطرق انها تزود احتياطياتها؟ وليه هو مهم فى مصر بصورة اكبر؟  
 

من بداية أزمة نقص العملة الأجنبية فى مصر بعد اندلاع الحرب الروسية الاوكرانية واكيد حضرتك بتسمع وبتتابع بيانات البنك المركزي الخاصة بحجم الاحتياطي النقدي من العملات الأجنبية.. بس عمرك سألت نفسك ايه هو الاحتياطي ده ؟ والبنك المركزي بيجيبوا منين؟   
بص يا سيدي .. الاحتياطي النقدي معناه ببساطة انه الدولة يكون عندها مخزون من العملات الأجنبية، سواء دولار أو إسترليني أو يورو.. وبتكون الفلوس دي محفوظة في البنك المركزي للدولة.
ممكن حد يسأل ويقول هو الاحتياطي النقدي بيجي منين وازاى بتستفاد منه الدولة؟
الاحتياطي النقدي بيتكون لما كل اللي بيخرج من مصر وكل اللي بيخش مصر من عملة الفرق بينهم يطلع.. ولو كان الفرق بينهم زيادة في العملة مش نقص فدا بيكون عندي «حصالة» فلوس واللي بتتسمى «احتياطي نقدي».
حلو اوى.. طبعا هاتسأل تاني وتقول.. طيب واية اللي بنستفيده من كده؟ وهل الدولة بتحط الاحتياطي كدا على جنب  وماتستفادش منه  بحاجة؟
لأ طبعا في إفادة.. وهي أن الدول بتستثمر في الفلوس الاحتياطية دي في مشاريع سريعة الربحية.. يعني ماينفعش تستثمره في العقارات مثلا علشان الأرباح بتتأخر.. امال اية... الفلوس دي الدول بتشغلها برة في بنوك أوربا مثلا لو كان العائد عليها كبير وممكن تشتري بيه كمان أسهم وسندات وتستفيد من نسبة الفايدة اللي بتقدمها المصارف العالمية.
بس كدا.. هي دي كل مميزات الاحتياطي النقدي؟
لأ طبعا لسه في مميزات تانية مهمة، وهو أن الاحتياطي دا بيحافظ على أموال المودعين.. يعني لو لا قدر الله بنك من البنوك تعرض لأزمة أو سرقة مثلا.. فالبنك المركزي للدولة بيروح بسرعة مقدم فلوس من الاحتياطي النقدي علشان فلوس المودعين ماتروحش.
ولازم نكون عارفين أن الاحتياطي النقدي دا بيكون له دور  مهم جدا في الاقتصاد القومي،  وأي دولة بتحدد عليه قرارات وسياسات اقتصادية مهمة، لأنه بمثابة معيار لقوة أو ضعف الدولة اقتصاديا سواء على الصعيد الدولي أو الإقليمي 
يعني لو كان حجم الاحتياطي النقدي لأي دولة عالي فبتكون الدولة قادرة علي انها تدبر اتفاقيات للاقتراض من المؤسسات الدولية والإقليمية طالما هي عندها احتياطي نقدي قوي، وكمان بيمثل ضمانة للدولة أمام الجهات والمؤسسات دي.. مصدر ثقة يعني
طب الاحتياطي النقدي فى مصر بيتكون من ايه؟ .
الاحتياطي النقدي لمصر بيتكون من غطاء نقدي من العملات الأجنبية بالإضافة لاحتياطيات من الدهب المودع في  خزائن البنك المركزي المصري
وتكمن أهمية الاحتياطي النقدي كمان  في قدرة الدولة علي تدبير احتياجاتها من السلع الاستراتيجية والمنتجات الطبية والأدوية والمواد الخام اللي بتستخدم في الصناعة والإنتاج المحلي، لفترات طويلة وخصوصا في فترات الكوارث الطبيعية والحروب والاضطرابات السياسية والأمنية.