سدد كل ديونك وريح بالك.. كل تفاصيل قرض سداد المديونية من البنوك المصرية

هو انت هاتفضل في الهم بتاع الديون دا كتير.. يعني مش ناوي تسدد ديونك بقى وتخلص من القصة دي.. طيب اية رأيك لما اقولك على أسرع طريق من خلاله هاتخلص على ديونك دي نهائي.. مافيش مليم هايتبقى عليك.

مافيش حاجة متعلقة بالفلوس ماعملتهاش البنوك.. من الألف للياء .. قروض تلاقي.. شهادات تلاقي.. استثمار في شهادات خاصة بصناديق الذهب كله سعادتك.

بس يا أخي الديون دي حاجة مرهقة اوي.. حمل كدا على النفس البشرية.. ويا بخت اللي حياته مافيهاش ديون.

طب أنا النهاردة هاكلمك على عدد من القروض تسدد بيها كل ديونك اية رأيك.

هاتقولي.. قرض . ما هو دا دين برضوا وقسط.

عندك مثلا .. قرض سداد المديونية من بنك ناصر الاجتماعى ودا قيمته بتبلغ ١٠ آلاف جنيه.. هو قرض صغير شوية بس كفيل بأنه يسدد ديون قليلة عليك.

الميزة بقى في القرض دا أنه إجراءاته سهلة خالص.. يعني تخلصه في ساعة زمان ومتاح لكل الناس سواء الخريجين أو ربات البيوت أو أصحاب المعاشات أو الموظفين.

نعلى شوية ب ال level .. ونقولك على قرض تاني من بنك القاهرة .. واللي برضوا بيقدم شروط سهلة وبسيطة وبسعر فائدة تنافسي.

القرض دا يا فندم قيمته كحد أدنى تبدأ من 20 ألف جنيه.

والحد الأقصى لقيمة القرض هي 750 ألف جنيه.

والفائدة على القرض دا هو ٢٠٪ متناقصة سنويا وبتقل قيمة القسط كلما زادت النسبة المسددة من القرض.

المهم أن سن المقترض يكون عند 21 سنة ولا يزيد عن 60 سنة للموظفين، ولا يزيد عن 65 سنة لأصحاب المهن الحرة.

المهم أنك تقدم علشان القرض دا صورة من بطاقة الرقم القومى بس تكون سارية.. وكمان إيصال مرافق حديث (كهرباء – ماء – غاز) للعميل أو قريب من الدرجة الأولى، بشرط وجود استهلاك فعلي لم يمر عليه أكثر من 3 أشهر.

وكمان تقدم سجل تجاري لم يمر عليه أكثر من 3 أشهر  لو كنت من أصحاب الأعمال.. ورخصة مزاولة المھنة في حالة أصحاب المھن الحرة.

وفي البنك التجاري الدولي تقدر كمان تاخد قرض سداد المدينة واللي بتصل قيمته ل ٧٥٠ ألف جنيه وتقدر تسدده على ٥ سنين بشرط أنك تكون ملزم بأنك تسدد ٥ آلاف جنيه قسط شهري.

والقرض دا سعر العائد عليه تنافسي.. وكمان لو سددته مرة واحدة مش هايتحسب عليك أي رسوم.