بنخلف اكتر من الصين واليابان.. كلام صادم عن تأثير الزيادة السكانية على الاقتصاد

هو احنا لية مانحس بالتحسن على مستوى الاقتصاد بالرغم من أننا بنعمل مشاريع كتير.. وتنمية حرفيا في كل مكان.. مصانع وأراضي زراعية وبنية تحتية.. يلا بينا نعرف السبب

السؤال الأهم اللي بنتكلم عنه النهاردة هو احنا لية مابنحسش بالتحسن على مستوى دخل الفرد.

الاجابة ببساطة هي الزيادة السكانية..  لأن طول ما نسبة النمو السكاني كدة.. هيبقى صعب جدا ان الناس كلها يوصلها اثار التنمية في نفس الوقت.

والكلام عن أن الزيادة السكانية دي ثروة بس انتوا اللي متعرفوش قيمتها .. دة جهل وعته مصدره الإعلام والسوشيال ميديا اللي دمرت خلايا التفكير فى دماغ بعض الناس وحشيتها بخزعبلات وتخاريف.

لازم نوقف تكاثر الأرانب دة انشالله نعمل زي الصين ونفرض قانون بطفل واحد لكل اسرة ..  على فكرة الصين لمدة 37 سنة طبقت السيستم دة.

وفى 2015 الصين قامت بالغائه في 2015 وسمحت بطفلين..

لكن امتي لغت القانون ؟

لغت القانون لما الاقتصاد وقف على أسس قوية وأصبحت تاني أعظم قوة في التاريخ واصبحت ند لأمريكا مش وهى لسة بتبتدي اصلاحات متأخرة من 40 سنة زي مصر.

وكمان في كلام من نوعية .. شوف ألمانيا واليابان اللي عددهم ضخم جدا وبردو بيشجعوا الخلفة الكتير.

بردو دة جنون ومقارنة غير علمية ومتنفعش تتعمل من طالب ابتدائي. لان دي دول بتنقرض سلالتها وعدد من هم فوق الستين يمثلوا 33% من السكان وكبار السن اللي فوق ال45 تعدادهم أكبر من الشباب والأطفال.

عكس مصر تماما اللي الاطفال والشباب بيمثلوا 65% من السكان.

يعني لازم اليابان تلحق نفسها لأنها في طريقها للانهيار كمان بضعة عقود لو متحركوش من دلوقتي لأن القوة العاملة بتقل جدا.

وبالمناسبة .. اليابان تقلص عدد سكانها 1 مليون نسمة من 2008 ل 2014..  يعني نمو بالسالب ... او انكماش
يعني الناس اللي بتموت اكتر من اللي بتتولد..

إنما في مصر ف زاد عدد سكانها 13 مليون نسمة من 2008 ل 2014 .

عرفتم بقى السبب فين.