جنيهات مصر الجديدة.. مشروع البنك المركزي اللي هيخلص على أزمة الدولار

يا ترى ايه حكاية الجنيه الرقمى ومؤشر الجنيه  اللى البنك المركزي بيدرس اصدارهم خلال الفترة الجاية؟ وايه الهدف من اصدار الجنيهين فى التوقيت ده بالتحديد ؟  وايه الفرق بين الجنيهين في الاستخدام؟ وايه علاقتهم بحل أزمة الدولار وشح العملة الأجنبية؟وازاى هيتم استخدامهم وتداولهم سواء فى الأسواق أو البنوك أو باقي القطاعات المالية؟

 
فيه افكار كتيرة جدا البنك المركزي بيفكر فيها لحل أزمة الدولار والقضاء على الفوضى الموجودة في سوق الصرف واللي خلت الدولار بقا ليه حوالي ٥ أسعار.
ومن أهم الافكار اللي هيكون ليها دور قوي في القضاء على السوق السودا للدولار وأزمة شح العملة الجنيه الرقمي ومؤشر الجنيه اللي بنسبة كبيرة هيتم الانتهاء منهم في ٢٠٢٤.
وخلونا نشرح لحضراتكم ايه اللي بيحصل في الكواليس. 
البنك المركزي المصري بيدرس حاليا إصدار "الجنيه الرقمي" بالتعاون مع صندوق النقد والبنك الدوليين وده فى اطار خطط المركزي لتعزيز التحول إلى الاقتصاد الرقمي وتوسيع نطاق المدفوعات الإلكترونية الفورية بين الأفراد والشركات من غير الحاجة لوسيط.

طب ايه هو الجنيه الرقمي ؟ 
العملات الرقمية للبنوك المركزية عموما زي "الجنيه الرقمي"... بتكون عبارة عن نسخ رقمية من النقود الورقية اللى بتصدرها البنوك المركزية وبتنظم العمل بيها ودي بتكون عملات مستقرة زيها زي العملة الورقية او المعدنية مش متقلبة زي العملات المشفرة 
يعنى باختصار الجنيه الرقمي ده هيكون زيه زي الجنيه العادي الفرق الوحيد ان تداول الجنيه الرقمي هيكون فى المعاملات والمدفوعات الالكترونية يعنى مش هيكون عملة تتمسك فى الايد ولكن عملة ليها قيمة مماثلة لقيمة الجنيه والقيمة دي هتكون قيمة اسمية فى حساب العميل يقدر يشترى بيها احتياجاته. 
طب الجنيه الرقمي هيتم استخدامه ازاى؟

"الجنيه الرقمي" هيُتاح استخدامه عبر "أجهزة الموبايل في التحويلات والتجارة وتبادل الأموال بين الأفراد والمؤسسات، وهيعمل على تقليل إصدار العملات الورقية ولسه الدراسات شغالة على تطوير الفكرة وتعظيم الاستفادة منها وتوسيع استخداماتها

وبكده هينضم الجنيه المصري إلى أكتر من 100 عملة رقمية صادرة عن بنوك مركزية بتمر حاليا بمرحلة البحث أو التطوير، وفيه عملتين صدروا بشكل رسمي هم عملة نيمارا في نيجيريا، اللى أُصدرت في أكتوبر 2021 و"ساند دولار" في جزر البهاما، اللي ظهر لأول مرة في أكتوبر 2020، بحسب بيانات صندوق النقد الدولي.

ومن الدول اللى أعلنت مؤخرا عن اصدار عملات رقمية من عملتها الوطنية دولة الامارات العربية الشقيقة اللي أعلنت عن استراتيجية لإطلاق عملتها الرقمية وتعاقدت مع شركتين لتقديم خدمات البنية التحتية والتكنولوجية للمشروع
وإصدار العملة الرقمية في مصر بيأتي ضمن خطة حكومية شاملة لزيادة الشمول المالي وتوسيع نطاق المدفوعات الإلكترونية وكان من ضمن المشروع ده اطلاق الدولة شبكة المدفوعات اللحظية في مارس 2022 وهي منظومة وطنية تربط كافة البنوك العاملة داخل مصر ببنية تحتية رقمية واحدة من خلال تطبيق "إنستا باي" على الموبايل واللى بيربط بين الحسابات لدى البنوك المختلفة ويتيح التحويل اللحظي بينها وبين بعضها فى لحظات معدودة من غير العميل ما يحتاج يروح بنوك ولا يقف فى طوابير ولا يعطل مصالحه.

طب ده الجنيه الرقمي وعرفنا قصته.. إيه بقا حكاية مؤشر الجنيه؟
مؤشر الجنيه مشروع ضخم جدا كان تم الإعلان عن البدء فيه في شعر اكتوبر ٢٠٢٢ في المؤتمر الاقتصادي ومصر من وقتها بتبحث مع البنوك المركزية في دول كتير تفاصيل المشروع
ومؤشر الجنيه باختصار هدفه تحرير العملة المصرية من سيطرة الدولار وربطه بسلة من العملات زي الجنيه الاسترليني واليورو والين واليوان بجانب بعض المعادن النفيسة زي الدهب والنحاس وغيرهم
طب ايه أهمية مؤشر الجنيه؟
زي ما قولنا لحضراتكم من شوية اهم حاجة هيعملوا مؤشر الجنيه أنه هيفك الارتباط مع الدولار وهيخلي قيمة العملة المصرية تتحدد بناء على سلة من والعملات يعني الدولار سعره ينزل يطلع الجنيه مالوش دعوة وده هينهي تماما على المضاربة في الدولار وهيقضى على فوضى سوق الصرف