أخطر 20 يوم في تاريخ مصر
بدون مبالغة مصر بتعيش أخطر أيام في تاريخها وهلال 20 اليوم الجايين حاجات كتير هتغير وملفات كتير هتتحسم.. ايه اللي هيحصل على في مصر وليه الأيام الجاية خطيرة والسيسي هيعمل ايه
لو بصينا على الظروف الصعبة والأحداث الكبيرة من هنا لغاية اخر الشهر هنعرف إن مصر في موقف لا تحسد عليه.. أول الملفات الخطرة وبتهدد الأمن القومي المصري هو اللي بيحصل في غزة ومش لازم نستهون بيه لأن اسرائيل بدأت بالفعل مخطط طرد الفلسطينيين من غزة من خلال حشرهم في شريط رفح جنوباً وإجبارهم على المغادرة وطبعا مفيش قدامهم غير مصر وبدأت اسرائيل المخطط بالاعلان عن خطة لإقامة منطقة عازلة بطول القطاع وهتستولي تقريبا على ربع مساحة القطاع وبتغط بقوة لإجبار الفلسطينيين على النزوح جنوبا تجاه رفح.. طبعا مصر موقفها حازم وصريح من رفض الخطوة الإسرائيلية اللي هي بمثابة إعلان مواجهة مباشرة مع القاهرة زي ما قال خبراء استراتيجين.
الملف التاني الخطير اللي بتعيشه مصر هو الانتخابات الرئاسية في الداخل واللي هتبدأ يوم 10 ديسمبر الجاري وطبعا كلنا عارفين حجم التربص والضغوط على الدولة من كل اتجاه لإحداث فوضى كبيرة في البلد والبداية كانت من الأسواق ورفع الأسعار وحجب الدولار وهو مخطط ماشي من شهور طويلة وكلنا عايشينه والمطلوب أن الانتخابات متعديش على خير وتسخين الشارع لأقصى درجة ممكنة ومرور الانتخابات على خير بقي مسؤولية مضاعفة على أجهزة الدولة اللي عليها حمل خطير جدا داخلياً وخارجيا وعليهم التعامل مع كل الاحداث في وقت واحد .
الملف الأخير اللي بتواجهه الدولة المصرية هو الوضع الاقتصادي والتضخم وارتفاع الأسعار في سلع كتير وسوق سودا للدولار والدهب ويوم 21 من الشهر الحالي لجنة السياسة النقدية في البنك المركزي المصري هتعقد أخطر اجتماعاتها وآخرها في 2023 وهتحسم فيه ملف التعويم والتضخم وأسعار الفائدة في وقت الأسواق مش مستحملة اي قرارات صعبة، لأن لو حصل المضاربين هيلاقوها فرصة لخلق حالة صعبة للأسر المصرية.
الرىئيس السيسي الله يكون بعونه بجد من أيام طويلة وهو بيدير ويتابع الأحداث في غزة عشان عارف بحكم خبرته الاستخباراتية بحجم الخطر اللي الإحتلال الإسرائيلي ناوي عليه وصاحب جدا لكل اللي بيحصل وبيوجه رسايل مفهاش لبس إن سيناء خط احمر وآخرها امبارح مع مستشارة الرىئيس الأمريكي جو بايدن واللي اجتمعت مع الرىئيس السيسي في الامارات ورجع وأكد أن تهجير الفلسطينيين من وطنهم غير مقبول بالمرة.
