وعد مدبولي اللي هينهي أزمة الدولار فى مصر.. التعليمات وصلت البنك المركزي

من ساعات اعلن الدكتور مصطفى مدبولى رئيس الحكومة عن وعد لو اتحقق هينهي على أزمة الدولار فى مصر وهيحل أكتر من 90% من مشاكل المصريين اليومية وتقدر تقول كده انه هيقلب الوضاع فى مصر رأسا على عقب.. فيا ترى ايه الوعد اللى قطعه رئيس الحكومة على نفسه؟ وهل ممكن يتحقق ولا لأ ؟ ولو الحكومة فعلا تقدر تنفذ الوعد ده ايه اللى خلاه تتأخر لغاية ما الأمور توصل للوضع الصعب اللى بنعانى منه بقالنا حوالى سنتين؟ 
 

 
امبارح مجلس الوزراء أصدر بيان مهم جدا محدش خد باله منه أو ركز معاه أوى مع ان البيان تضمن وعد حكومي ممكن يغير قواعد اللعب فى سوق صرف العملات وكمان فى سوق السلع اليومية.. وفى البيان ده  أكد رئيس مجلس الوزراء مصطفى مدبولي ان الشغل الشاغل للحكومة في الملف الاقتصادي حاليا هو الوصول لسعر موحد للدولار على المدى القصير وانه بيتم العمل على ده بكل بقوة وخلال فترة قريبة جدا مش هيكون فيه فوضى فى سوق صرف العملات امام الجنيه 
رئيس الحكومة كان واضح وصريح جدا وقال ان الحكومة حريصة على تحفيز المستثمرين الجادين من خلال حوافز حقيقية واكد أنه بيقابلهم بنفسه لتذليل العقبات وتيسير الإجراءات وبيدي تعليمات دايما بمنح أولوية للمنتج المحلي في التعاقدات الحكومية.
تصريحات مدبولي جت بعد ايام من تصريحات ليه قال فيها أن أزمة الدولار فى مصر عابرة وهتنتهى قريب جدا وان التفكير حاليا فيما بعد نهاية الزمة وازاى هيتم توسيع مشاركة القطاع الخاص فى الناتج المحلي.
طب الكلام ده كله معناه ايه ؟ 
بص يا سيدي الحكومة خلاص مش هتسمح بالفوضى االموجودة فى سوق صرف العملات الأجنبية وهتتدخل بقرارات جريئة وحاسمة من خلال البنك المركزي لضبط السوق ده وتوحيد سعر الصرف يعنى الدولار سعره فى البنك يكون زي سعره فى أى حتة تانية ونقضي تماما على السوق السودا للعملة وعمليات المضاربة اللى بتتم على الدولار واللى خلت سعره فى ايام قليلة يقفز باكتر من 50% من السعر الرسمي 
وده هيحصل امتى وازاى ؟ 
امتى .. رئيس الحكومة جاوب على السؤال ده وقال ان ده هيتم فى وقت قريب أوي .. ازاى بقا دي اللى فيها تفاصيل كتيرة وتحركات اكتر بتتم فى ا الكواليس.. والتحركات دي بيقودها ويشرف عليها البنك المركزي بالتنسيق مع الحكومة.. ولازم نكون عارفين ان عشان تقضي على فوضى سوق الصرف وتنهي تماما على السوق السودا للدولار .. لازم البنوك توفر سيولة دولارية والدولار يكون متاح فى القطاع المصرفي لى حد يطلبوا ومع ازمة شح العملة الأجنبية اللى بتعاني منها مصر البنك المركزي شغال على خطط وأفكار لزيادة السيولة الدولارية بعيدا عن المصادر التقليدية للدولار وفيه تحركات مهمة جدا تمت الأيام اللى فاتت هيكون ليها نتايج ايجابية على السوق السودا وهتساهم بشكل كبير فى انخفاض دولار السوق الموازية