السيسي يحسم الأمر مع صندوق النقد.. ومفاجأة بـ مليار دولار للمركزي المصري

متابعينا الكرام في كل مكان أهلا وسهلا بيكم ولايف جديد لأهم الأحداث والتقارير اللي عرضتها وحدة أبحاث وتقارير على مدار اليوم الخميس 30 نوفمبر 2023 وأخر التطورات في أسواق الدولار والدهب والأسواق
 

البداية معانا النهاردة من البنك المركزي المصري واللي أعلن عن خبر سار بخصوص تجديد وديعة إماراتية بمليار دولار.. وطبعا قرار التمديد جاي في وقت مهم جدا بتواجه فيه الحكومة المصرية ازمة في نقص الدولار.

وبخصوص التفاصيل اللي أعلنها البنك المركزي الوديعة الإماراتية تم مدها لغاية يوليو 2026، ومعروف إن مصر تلقت دعم قوي من دول الخليج العربي خلال العقد الأخير، في صورة ودايع دولارية لدى البنك المركزي، واستثمارات في عديد من شركات النفط والأسمدة، إلى جانب تسهيلات سداد لبعض المنتجات البترولية.

وتجديد الوديعة الإماراتية جاي بعد أيام من تجديد الكويت لوديعة بـ4 مليار دولار لدي البنك المركزي المصري في وقت الاقتصاد المصري بيمر بمرحلة صعبة وتجديد الودائع الخليجة صورة من صور دعم الدولة المصرية لمواجهة شح الدولار.

التقرير التالي اللي عرضته منصات بانكير فكان بخصوص تطورات الأحداث في غزة والجهود المصرية اللي بتم لفرض وقف دائم لاطلاق النار في الأراضي الفلسطينية.

وزي ما احنا عارفين إن رئيس جهاز المخابرات المصرية اللواء عباس كامل وصل العاصمة القطرية الدوحة ومعروف إن اللواء عباس مش بيتحرك غير للملفات التقيلة والمفاوضات الصعبة إللي عاوزة قرار ومش بيتحرك غير لما يكون عارف النتائج وواثق منها وعشان كده راح وهو عارف هيعمل إيه وعارف الرئيس السيسي عاوز إيه.

المهمة كانت صعبة جدا وهي فرض وقف إطلاق النار في غزة من الجانب الإسرائيلي ووقف كل عمليات القتال وكفاية لغاية كده ومصر مش هتصبر تاني على اللي بيحصل في فلسطين، وفعلا مصر قربت جدا من الوصول لأتفاق دايم لوقف الاعمال العسكرية وحسب تسريبات خرجت من الحكومة الاسرائلية نفسها وقالت إنها مش هتمانع وقف دايم لكن بعد الافراج عن كل الرهاين الاسرائليين والجنود.

وحدة أبحاث بانكير قدمت تقرير هام جدا النهاردة بخصوص اغتيال الجنيه وسر ارتفاع دولار السوق السودا رغم ابتعاد شبح التعويم..

وقال التقرير إنه في وقت أعلنت فيه الحكومة عن تحسن ملحوظ في السيولة الدولارية في البنوك وتوفير الدولار بكميات كبرة للمستوردين والشركات بيواصل دولار السوق السودا ارتفاعاته في اليام الأخيرة ووصل سعر العملة الأمريكية في السوق الموازية الى مستوى 50 جنيه وكمان بيزيد كل يوم عن التاني بشكل مش طبيعي ولا ليه مبرر منطقي على الاطلاق.
الواضح كده إن فيه مؤامرة على الجنيه لأن اللي بيحصل في أسواق العملة دا مش منطقي بدليل إن السوق السودا للدولار اتوحشت أكتر بعد إعلان رئيس الوزراء الدكتور مصطفى مدبولي قرب الوصول لسعر موحد للدولار أمام الجنيه وده تزامن مع تصريحات مهمة لفخري الفقي، رئيس لجنة الخطة والموازنة بمجلس النواب ونفي كل الأخبار المتداولة عن التعويم.

والمؤامرة على الجنيه بتأكدها بردوا تقارير كتير من مؤسسات التمويل الدولية لما قالت إن فيه زيادة كبيرة فى الضغوط على العملة المصرية اللي تراجعت دون مستوى 50 جنيه مقابل الدولار في السوق السوداء وان ده مش مبرر بالمقارنة بالمؤشرات الحكومية وإن اللي بيحصل دا محاولة لدفع الجنيه للتعويم بقوة ورغم عن السوق.

التقرير التالي معانا النهاردة بخصوص أزمة كبيرة ظلت ترند الأسواق على مدار الأيام اللي فاتت وهي أزمة ارتفاع أسعار السكر في الأسواق بشكل جنوني ووصلت لـ60 جنيه..

عرض التقرير اجراءات الحكومة لحل الأزمة بشكل جذري ومنها منح وزير التموين على المصيلحي مهلة للتجار لتخفيض سعر الكيلو وهدد إن ده لو محصلش الحكومة هتتدخل فورا وهتفرض تسعيرة جبرية خصوصا وان فيه تلاعب كبير بيحصل فى اسعار السكر
وبخصوص أخر تطورات الأزمة النهاردة حصل تطور مهم جدا مع إعلان الحكومة لأول مرة عن موعد نهاية الأزمة من خلال تعهد وزير التموين بإنهاء الأزمة بالتعاون مع القطاع الخاص قبل منتصف الشهر الجاي يعنى خلال اسبوعين بالكتير من دلوقتي.

طيب لو الأزمة ماتحلتش ايه اللي هيحصل .. حسب المعلومات المتاحة في حالة عدم الوصول إلى اتفاق بين الحكومة والقطاع الخاص وكافة الأطراف المعنية بمنظومة السكر، هيكون الحل الوحيد اللجوء إلى فرض التسعيرة الجبرية لفترة معينة ولأسباب معينة.. كمان وزارة التموين بتدور على حلول تانية زي خططها لاستيراد ما يتراوح من 400 إلى 500 ألف طن سكر خام في بداية 2024  والكمية المستوردة هتسد الفجوة بين حجم إنتاج واستهلاك السكر في مصر.

منصات بانكير عرضت النهاردة تقرير مختلف بيكشف عن وسيلة نصب جديدة لعصابات الدولارات وحذر التقرير المواطنين من الوقوع فيها..

اللي بيحصل ان فيه وسيلة جديدة بيتبعها عدد من النصابين علشان ياخدوا من الناس دولاراتهم وفعلًا فيه ناس كتير وقعت في الفخ وخسرت فلوسها بسبب عمليات النصب الإلكترونية دي.

وبخصوص التفاصيل .. ظهرت في الفترة الأخيرة عدد من التطبيقات على متجر IOS وجوحل بلاي.. بيتم عليهم عرض أسعار الدولار والعملات في السوق الموازية بشكل غير قانوني.. وطبعًا دول تطبيقات سمعتهم معروفة بالأمان والثقة.

المهم إن متجري جوجل وآبل لما التطبيقات تطلب منهم حاجات مماثلة زي إمكانية تغيير العملة وغيره بيطلبوا من التطبيقات دي تقديم مستندات قانونية تثبت إنهم بيمثلوا شركات مش مجرد أفراد.. ودا بغرض رفع التطبيقات على متجري جوجل وآبل.

الجديد بقى إنه تم اكتشاف إنها شركات وهمية ومش حقيقية وبيتم التواصل مع المواطنين بغرض تغيير الدولارات اللي معاهم ولما يتم الإرسال من قبل المواطن المالك للعمل الصعبة.. يكون الطرف التاني اختفى.

الفكرة إن التطبيقات دي مابتستخدمش كلمات زي السوق السودا .. أو السوق الموازي.. علشان جوجل ماتحظرهمش.. لكن بيتم استخدام كلمات معبرة تانية زي "سعر السوق - سعر البنك"، والزبون من دول  يدخل وهو مطمن ويبدأ في تحويل الدولارات.
 

التقرير الأخير والأهم اللي معانا في لايف النهاردة.. بخصوص تطور خطير في ملف صندوق النقد الدولي 
   
زي ما احنا عارفين إن الرئيس السيسي وصل النهاردة الى دولة الإمارات العربية الشقيقة للمشاركة في فاعليات مؤتمر المناخ cop28 .. وده مؤتمر دولي كبير جدا بيشارك فيه كبار المسئولين من كل دول العالم.. ومنهم طبعا مديرة صندوق النقد الدولى،  كريستينا جورجيفا اللى أدلت بتصريحات مهمة على هامش مشاركتها في القمة قالت فيها إن التعاون بين صندوق النقد ومصر مستمر ومثمر فى برنامج الإصلاح الاقتصادى.

كريستينا قالت إنها بتتمنى لقاء الرئيس عبد الفتاح السيسى فى مدينة دبى خلال مؤتمر الأمم المتحدة للمناخ COP28 لدعم التعاون المشترك، ومتوقع إن الصندوق الدولي هيعلن عن أخبار كويسة قريب جدا بخصوص زيادة قيمة القرض من 3 الي 5 مليار دولار بعد الدعم اللي أعلن عنه الاتحاد بـ 10 مليار دولار من ناحية ومن الناحية التانية إعادة جدولة ديون مصر لدول الاتحاد لتخفيف العبء عن الحكومة المصرية.