ماكينة ال ATM هاتطلعلك دهب... تفاصيل أول تجربة لبيع الذهب إلكترونيا

ماكينة ال ATM بدل الفلوس هاتطلعلك دهب.. يعني تقدر تشتري سبيكة وأنت واقف مكانك.. يا ترى اية الحكاية.. يلا بينا نعرف

قولنا بدل المرة ألف أن شراء الذهب والاستثمار فيه هو الاستثمار الآمن في الوقت الحالي خاصة في ظل الظروف الراهنة اللي فيها اضطرابات كتير وسعر العملة كل شوية بتقل أمام الدولار.

قريب جدا أنت بقى تقدر تروح تشتري سبيكة دهب من ماكينة ال ATM ... ودا بعد ما أخيرا مصر أطلقت أول ماكينة ATM لبيع سبائك الذهب، واللي تم على هامش معرض نبيو الثالث للذهب والمجوهرات، ودا بعد ما شهد وزير التموين والتجارة الداخلية، الدكتور علي مصيلحي، إطلاق تلك الماكينة، في خطوة داعمة للتحول الرقمي بالبلاد.

وبالمناسبة المعرض الدولى للذهب والمجوهرات «نبيو»، يقام في مصر في نسخته الثالثة، في أرض المعارض بالتجمع الخامس واللي بيتم خلالها عرض تصميمات المجوهرات للمحليين بغرض ضخ دماء جديدة من المصممين المصريين في الأسواق.

المهم أن تجربة ماكينة ال ATM اللي هاتبيع الذهب دي تعتبر تجربة مختلفة للعملاء، لأنها بتيح للمواطنين حصولهم على سبائك ذهبية من خلال إيداع قيمة السبيكة.

وكمان في الماكينة تقدر  أنك تختار أحجام مختلفة بدءًا من جرام واحد كحد أدنى، ويتم تحديث الأسعار فيها على مدار الساعة.

ووفقا لتصريحات وزير التموين فالتجربة دي من المقرر أن يتم تعميمها في مناطق أخرى، موضحاً أن هناك نظاماً قوياً بشأن تأمينها.

طبعا الخطوة دي بتيجي في وقت بالغ الأهمية ودا مع تراجع قيمة الجنيه المصري أمام الدولار الأميركي، وفي ظل الضغوطات المتعلقة بارتفاع  الطلب المحلي على السبائك الذهبية؛ بغرض الادخار والاستثمار متوسط وطويل الأجل، علشان يتم الحفاظ على قيمة المدخرات.

بالمناسبة التكنولوجيا دي موجودة في عدة دول حول العالم واللي بدأت من حوالي عشرة أعوام، و تطبيقها حايساهم في  تعزيز وتطوير القطاع.

يعني حرفيا بدل ما تروح تشتري ذهب من مكان غير مضمون انت بعد فترة هاتشتري سبيكة من الدولة يعني أمان وضمان اكتر... وزي ما قولنا الخطوة دي منتظر تعميمها الفترة الجاية.