مش هرحمكم.. مدبولي يبشر تجار السكر والسجاير بـ ليلة سوداء

أخيرا الحكومة قررت تتحرك وتواجه تجار الأزمات باجراءت غير مسبوقة.. ايه اللي قاله مدبولي في مجلس النواب نهاردة وإزاي هيواجه التجار وهل الاسعار هتزل تاني ولا خلاص

النهاردة الدكتور مصطفي مدبولي رئيس مجلس الوزراء عمل اجتماع رؤساء اللجان النوعية بمجلس النواب، ضمن استكمال اللقاءات الدورية لبحث الملفات الصعبة قدام الحكومة ومحتاجة تدخل النواب واتكلم في حاجات كتيرة بتهم الناس وأولها السوق السودا اللي بدأت تنتشر في اسواق السلع وحجبها ورفع سعرها.
وأعلن مدبولي إن الحكومة صبرها نفد مع تجار الأزمات وقررت فرض اجراءات وآليات استثنائية للتعامل مع الممارسات غير القانونية ودا لأن البلد بتمر بفترة استئنائية صعبة جدا، وإن هيكون فيه ضبط للسوق رغم تشجيع الدولة وتبينيها سياسة الاقتصاد الحر والعرض والطلب وعدم التحكم في الأسواق لكن اللي بيحصل ملهوش علاقة بقوانين السوق لكن الموضوع تحول لتجارة سودا ومكاسب واحتكار واسعار كل ساعة بحال والمواطن في الاخر هو اللي بيحاسب على طمع التجار.

لغاية هنا مدبولي مكشفش عن الاجراءات اللي الحكومة هتاخدها لإعادة الانضباط للسوق والأسعار والفوضى اللي بتحصل وواضح كده إن الحكومة  مش هترحم حد الفترة الجاية وإنها هتضرب بيد من حديد وواضح كمان إن هيكون فيه تسعير إجباري للمنتجات الغالية والسلع الرئيسية ودا بيوضحه كلام مدبولي عن تبني الحكومة للسوق الحر لكن لما الأمور تخرج عن السيطرة يبقى لازم الحكومة تدخل وتفرض قرارها حتي لو ضد مباديء السوق الحر.

رئيس الحكومة في اجتماعها تطرق للظروف الصعبة اللي مصر بتعاني منها والحجم الهائل من الأزمات الاقتصادية والسياسية واللي بيحصل حوالينا وإن أولوية الحكومة دلوقتي تأمين وتوفير المتطلبات الأساسية للدولة والاحتياجات والسلع الأساسية للمواطنين وإن البلد شافت وعاشت صدمات كبيرة وخطيرة وقدرت تقف في وشها بداية من جائحة كوفيد-19، وبعدها الأزمة الروسية الأوكرانية، والتضخم الكبير اللي بيعاني منه العالم كله، بالإضافة إلى الصراع العنف حاليا في قطاع غزة، واللي وصفه مدبولي إنه الأقوى والأعنف من ساعة حرب 1967.

الواضح في كلام رئيس الحكومة إن مصر بتعيش أيام صعبة وإنها بتواجه مافيا خطيرة في السوق وجشع تجار ومافيا بتحرك الشارع وثقافة طمع غير مسبوقة وعشان كده الدولة اتحركت بدري ورفعت السقف الزمني لاحتياطي السلع الاستراتيجية بتعليمات مباشرة من الرئيس السيسي لأنه كان عارف اللي هيحصل وإن أقل مدة للاحتياطي 6 شهور عشان مصير الناس مش لعبة وفي نفس الوقت نقدر نقول إن الايام الجاية سودا وصعبة على تجار الأزمات.