مفاجأة من العيار التقيل هتقلب سوق الدولار.. خطوة غير متوقعة من البنك الأوروبي

إزاي مصر بقت سوق جاذب للاستثمارات العالمية وليه فجأة البنك الأوروبي قرر يتحرك في السوق المصرية وعلاقته بملف الطروحات الحكومية والدولار وعلاقته باللي بيحصل في غزة ودور مصر التاريخي

فاكرين لما قلنا إن مصر بمقاييس الاستثمار هي من أفضل الوجهات والاسواق في العالم اللي المستثمر يقدر يجي ويكسب ودا مش مجاملة لبلدنا لكن حسب قواعد الاستثمار مصر عندها فرص كتيرة في كل المجالات سواء صناعة او زراعة أو تعهيد ولوجستيات أو خدمات وشركات ناشئة واتصالات وكمان عندها عمالة كتيرة ورخيصة مقارنة بالعمالة بره ودا غير انخفاض قيمة العملة والطاقة بالنسبة للمستثمرين واللي هيضاعف أرباحهم وعشان كده فيه هجمة كبيرة من المستثمرين على مصر اليومين دول وسبق وقلنا في بانكير بالتفصيل حجم التدفقات الاستثمارية الخليجية على مصر.

الجديد بقي إن أوروبا دخلت على خد الاستثمار في مصر وبنفكركم بالـ10 مليار دولار اللي الاتحاد الأوربي قرر يساعد بيها مصر عن طريق استثمارها في مجالات معينة دلوقتي بقا البنك الأوروبي لإعادة الإعمار والتنمية "EBRD" الدكتورة قرر هو كمان يكون ليه نصيب كبير في السوق المصري وطبعا دا بنك زي اي بنك أهم حاجة عنده المكسب وفي نفس الوقت يخدم أهداف الدول اللي بتملكه وهي كل اوروبا ودا باين من أسمه.

المهم البنك الأوروبي لإعادة الإعمار والتنمية أعلن إنه  بيسعى حاليا بجدية لشراء حصص في عدد من الشركات المصرية ضمن برنامج الطروحات الحكومية.. وإن البنك مهتم بشكل كبير بشراء حصص في البنوك المصرية اللي هيتم طرحها ضمن برنامج الطروحات، وإن فيه حاليا  مناقشات  مع صندوق مصر السيادي لبحث إمكانية شراء حصة أقلية في المصرف المتحد وبنك القاهرة، لكن البنك منتظر الإعلان عن النسب أو الحصص اللي هيتم طرحها في الكيانين.

وكشف البنك الأوروبي إنه مستني إعلان الحكومة المصرية عن حجم حصتها في الأصول اللي ناوية تبيعها ضمن برنامج الطروحات، وشدد البنك على دعم برنامج الحكومة للخصخصة بشكل عام نظرا لأهميته في تحقيق معدلات نمو الاقتصاد المصري ودوره في زيادة التدفقات النقدية الأجنبية وزيادة الإيرادات.

وعلى فكرة البنك الأوربي ليه باع طويل في العمل بالسوق المصرية وهو حاليا بيتعاون مع صندوق مصر السيادي في برامج تقديم الدعم الفني للشركات في مشروعات الهيدروجين الأخضر وتحلية مياه البحر، وكمان لازم نعرف
إن البنك الأوروبي لإعادة الإعمار ليه أكتر من 13 بنك شريك في مصر تمثل بين 30 و 40% من إجمالي البنوك في مصر، كمان بيسعى الأوروبي لإعادة الاعمار إلى إضافة بنك أو اتنين إلى محفظة شركائه من البنوك المصرية في الفترة الجاية.

وبتحتل مصر المركز الأول كأكبر دولة لعمليات البنك الأوروبي لإعادة الإعمار في منطقة الشرق الأوسط وشمال إفريقيا، بمحفظة استثمارات تصل إلى 1.5 مليار دولار سنويا... وطبعا دخول البنك الأوروبي على خط الطروحات الحكومية هيسرع من وتيرة الصفقات وكمان هيجذب مستشثمرين جدد وهيكسر الاحتكار الخليجي على شراء جصص الشركات ودا في النهاية بيصب في خانة زيادة سعر الحصص المباعة من الشركات وفي النهاية أي تقدم في برنامج الطروحات بيصب في خانة زيادة الدولار في مصر وهيوجه ضربة كبيرة للسوق الموازية.