لدغة السيسي تشل أطراف إسرائيل

متابعينا الكرام في كل مكان أهلا وسهلا بكم.. وجولة جديد لأهم التقارير اللي عرضتها وحدة أبحاث وتقارير بانكير النهاردة على منصاتها المختلفة النهاردة السبت 25 نوفمبر 2023..

البداية مع تقرير مهم بخصوص تطور مفاجيء في السوق السودا للدولا وتحركات المركزي قلبت الموازين..

كلنا عارفين إنه من يوم الخميس اللي فات آخر النهار ولحد دلوقتي فيه تطورات كبيرة بتحصل في السوق السودا للدولار وفيه تراجع ملحوظ لسعر العملة الخضراء في المضاربات على العملة وتقدر تقول كده تقريبا عمليات تنفيذ بيع وشراء الدولار تراجعت بشكل ملحوظ .. فيا ترى ليه سعر الدولار بيتراجع ..
من كام يوم رئيس الحكومة الدكتور مصطفى مدبولى طلع في تصريحات تلفزيونية وأكد إن أزمة العملة اللى بتمر بيها مصر في اخر كام شهر أزمة عابرة وهتنتهي خلال أيام وأكد ان اللى شاغل الدولة والحكومة ايه اللى هيحصل بعد نهاية أزمة شح الدولار وازاى الدولة هتوسع نشاط القطاع الخاص وهتزيد مساهمته في نسبة الناتج المحلي.

تصريحات مديولى كان ليها صدى واسع وتاثير واضح في السوق السودا للدولار وكتير من المحللين والخبراء بدأوا يتكلموا ن ايه اللى ممكن يحصل ويخلى مصر تتخلص من أزمة شح العملة والكلام اتحصر بين سيناريوهين اما ان مصر هتبيع كتير من أصولها ضمن برنامج الطروحات الحكومية اللى بتنفذه الدولة او إن البنك المركزي ههيعمل تخفيض لقيمة الجنيه وده هيخلى الفجوة بين السعر الرسمي للدولار وسعره في السوق السودا تتسد وبالتالي هنوصل لسعر عادل لقيمة الجنيه قدام العملات الأجنبية

التقرير التالي اللي قدمته منصات بانكير كان بخصوص  ضربة الرئيس السيسي اللي هزت إسرائيل واللي قبلت مصير القضية الفلسطينة وخلي النوم يطير من عيون نتيناهو..

الرئيس أدلى بتصريحات مهمة في مؤتمر صحفي مشترك بالقاهرة، مع رئيس الوزراء الإسباني بيدرو سانتشيز ورئيس الوزراء البلجيكي ألكسندر دي كرو وقبلها في ستاد القاهرة وقال فيها إن كل الشعب المصري ناصر وساهم في نصرة القضية الفلسطينية

لكن كلام الرئيس السيسي عن التهجير مش هو اللي رعب إسرائيل.. لكن فيه تصريح تاني مهم للرئيس السيسي هز الحكومة الإسرائيلية لما قال إن مسار حل الدولتين فكرة استنفدت وآن الأوان بالمجتمع الدولي الاعتراف  بالدولة الفلسطينية وإدخالها الأمم المتحدة"... ودي كانت قنبلة السيسي اللي هزت اسرائيل..

وزي ما احنا عارفين إن مفاوضات السلام اللي دخلتها اسرائيل من سنين طويلة مع الفلسطينيين بضغط دولي كان الهدف منها المماطلة وعدم حصول الفلسطينيين على دولتهم ويفضل حل الدولتين شعار سياسي بيظهر في الأزمات وبعدين يختفي لكن الرئيس السيسي في تصريحاته الأخيرة قفز فوق كل الحلول والثوابت واعاد الكرة في ملعب العالم وقال طالما حل الدولتين مات اكلنيكيا يبقي العالم يعترف بدولة فلسطين مباشرة وتبقي عضو في الأمم المتحدة ودي معناه نهاية كل خطط اسرائيل لدفن القضية الفلسطينية وإن السيسي ألهم العالم بفكرة تانية وغير تقليدية لإقامة الدولة الفلسطينية نتيناهو مكانش عامل حسابه عليها  والمقترح المصري بيغير بوصلة ومصير الصراع في الشرق الأوسط وبيعيد إحياء الدولة الفلسطينية من النسيان.
 

منصات بانكير قدمت تقرير مختلف النهاردة وكان محل جدا في وسائل التواصل وهو بخصوص بيع موانئ مصر للخلايجة.. والحقيقة كل شوية كده بتطلع اشاعات وأخبار مش معروف مصدرها بتقول إن مصر هتبيع بعض الموانئ بتاعتها لدول عربية وأجنبية والأكتر فيه ناس حددت دول بالاسم هتشترى عدد من الموانيء دي رغم ان لا الحكومة ولا اى بلد صرحت بحاجة زي كده.. بل بالعكس طول الوقت الحكومة المصرية بتعلن عكس الكلام ده وبتقول بشكل واضح ان موانئ مصر مشروع استراتيجي هي شغالة عليه وبتحاول تحقق من وراه أعلى استفادة.
وفى الساعات الخيرة قطع الفريق كامل وزير النقل الشك باليقين زي مابيقولوا واكد إن موانئ مصر مش للبيع ولا حتى للاستحواذ عليها من قبل شركات أو صناديق استثمار سواء عربية أو أجنبية وأعلن وزير النقيل ترحيب الحكومة بالاستثمار فى الإدارة والتشغيل الخاص بالموانئ. 

وحدة بانكير قدمت النهاردة قراءة في حلول القضاء على أزمة نقص الدولار.. وعرض التقرير جهود الحكومة في الفترة الأخيرة لحل أزمة نقص العملة الأجنبية والقضاء على السوق السودا للدولار وإزاي الحكومة بدأت تشتغل صح وتطلق مبادرات وأفكار خارج الصندوق عشان تحل أزمة الدولار وتوفر سيولة من النقد الأجنبي بعيد عن المصادر التقليدية يعنى جنب السياحة والصادرات وقناة السويس بتدور على مصادر تانية لجذب العملة الأجنبية زي مثلا مبادرة سيارات المصريين في الخارج اللى من خلالها يقدر اى مصري مقيم في لاخارج انه يدخل مصر سيارة بدون جمارك ولا رسوم مقاب وديعة دولارية تتحط في حساب وزراة المالية لمدة 5 سنين وكمان مبادرة تسوية الموقف التجنيدي للمغتربين مقابل سداد مبلغ 5 الاف دولار

والجديد إن مجلس الوزراء أعلن امبارح خبر في غاية الأهمية وهيكون ليه دور كبير جدا في توفير سيولة دولارية لمصر تمكنها من حل أزمة نقص العملة اللى بنعانى منها من مارس 2022 ولحد دلوقتي.. والخبر بيقول ان الحكومة بتدرس طرح وحدات عقارية بالدولار للمصريين في الخارج أو الأجانب بالتعاون مع شركات التطوير العقاري من القطاع الخاص.. ورئيس الوزراء مصطفى مدبولي استعرض بنفسه  مبادرة مقترحة "لتعزيز صادرات العقار" باعتباره أحد المصادر المهمة للنقد الأجنبي.
والمبادرة هتشمل وحدات تابعة للمطورين العقاريين بالقطاع الخاص وهيتم تقديم عدد من المحفزات تسهم في نجاح المبادرة، خصوصا ان الحكومة بتعول كتير جدا على المبادرة دي في جمع حوالى 10 مليار دولار خلال الفترة الجاية
 

التقرير الأخير اللي عرضته وحدة بانكير كان بخصوص التصرفات الغريبة اللي بيعملها الفنان محمد رمضان واللي وصلت ساحات المحاكم في صراعه مع البنوك وزمايله في الوسط الفني . وكلنا عارفين إن رمضان دايما مادة دسمة في الإعلام ووسائل التواصل الاجتماعي بسبب مشاكله الكتيرة.

في ٣ يونيو سنة ٢٠٢١ طلع الفنان محمد رمضان وقال إنه تم التحفظ على أمواله من جانب أحد البنوك.. وإنه شايل فلوس احتياطي في البيت زي الصعايدة.. وأن العملية معاه مستورة.

وطبعا دا كان اتهام للبنك دون دليل.. واللي بعدها أوضح أنه ماتحفظش على فلوس محمد رمضان وأن اللي حصل هو تنفيذ حكم قضائي خاص بقضية الطيار الراحل أشرف أبواليسر الحاصل على حكم بالتعويض بلغ قيمته 6 ملايين جنيه.

ولو رجعنا بالزمن لورا هاتفتكر قصة محمد رمضان مع الطيار أشرف أبو اليسر.. والواقعة الشهيرة اللي حصلت  في شهر أكتوبر 2019 لما نشر رمضان مقطع فيديو عبر حساباته على مواقع التواصل الاجتماعي وهو يقود طائرة وبجواره الطيار أبو اليسر.

ونتيجة لمخالفة الصورة لقانون الطيران المدني.. وقعت وقتها  هيئة الطيران عقوبة على الطيار أشرف أبو اليسر.. وهي سحب رخصته مدى الحياة لانتهاكه معايير السلامة أثناء الطيران، بالإضافة إلى سحب رخصة مساعده لمدة عام.

المهم إن رمضان والمعروف عنه لسانه الطويل وإنه بيقول كلام من غير ما يحسبه كويس طلع زي ما قولنا واتهم الدولة والبنك وقتها بالتحفظ على أمواله بالرغم من أنه كان حكم محكمة بتعويض الطيار.

وعلشان كلام محمد رمضان كان اتهام باطل ومالوش أي أساس من الصحة.. البنك رفع هو كمان قضية على رمضان بتهمة الترويج إلى أخبار كاذبة.

وعلشان البنك عنده حق ورمضان قال كلام ماحصلش.. كان حكم محكمة جنح مستأنف الشيخ زايد المنعقدة بجنوب الجيزة، هو الحبس سنة «غيابي».

وزي ما قالت مصادر قضائية قرار تجميد أرصدة الفنان محمد رمضان بيرجع إلى تنفيذ حكم قضائي خاص بقضية الطيار الراحل أشرف أبواليسر الحاصل على حكم بالتعويض بلغ قيمته 6 ملايين جنيه، يعني ماكنش تجاوز من البنك ولا حاجة.

والخلاصة أن رمضان هنا لازم يبطل يقول كلام ماحصلش أو يخصص حد يتكلم مكانه بدقة في المعلومات