مصر عاصمة المال..خطوة مفاجئة من أكبر بنك أوروبي

 
البلد فيها امل وليها مستقبل واعد واللي يقول غير كده يبقي ملهوش في الاقتصاد.. لما اكبر بنك أوروبي وهو بنك الاستثمار الأوروبي EIB يختار القاهرة عشان تكون مركز إقليمي لأعماله بمنطقة الشرق الأوسط وشمال أفريقيا يبقي مصر ماشية في الطريق السليم ومكملة لأن بنك زي بتاع الاستثمار الأوروبي كل شغله مليارات ومشاريع مش هيختار دولة ضعيفة ولا ملهاش مستقبل اقتصادي ومالي ضخم في المنطقة.

من ايام البنك الأوروبي افتتح مركزه الجديد رسميًا بحضور رئيس الوزراء ووزيرة التعاون الدولي وبمشاركة أكثر من 150 شخصية مصرية وإقليمية ودولية من القادة السياسيين ورجال الأعمال والمصرفيين ودا بهدف تعزيز المشاركة والتعاون مع الشركاء من القطاعين العام والخاص بالمنطقة بالكامل.

وعلى فكرة نفس البنك الأوروبي دا قام بتمويل عشرات المشروعات داخل مصر باستثمارات 15 مليار يورو في الأربعين سنة الأخيرة ودلوقي بيستعد لتمويل كتير من المشروعات الجديدة خاصة بقطاع النقل والطاقة النظيفة وعشان نفهم أهمية البنك دا فهو عامل كده زي صندوق النقد الدولي لكن خاص باوروبا وبيمول مشروعات تنموية في الدول اللي مهمة بالنسبة للاتحاد الأوروبي وبتخدم مصالح حوض البحر المتوسط وعشان كده مصر  دايما في مقدمة حساباته