الملعقة السنبلة هتخليك مليونير!!..ليه المصريين عاوزين يغتنوا ببلاش؟!

أكتر بضاعة بتتباع بسرعة فى مصر هي الوهم.. زباينها جاهزين ومستعدين يصدقوا أي كلام.. جرب كده ييجي قدامك فيديو أو خبر بيقولك هتبقا مليونير لو عندك معلقة بسنبلة فى بيتك او هتعدي الفقر لو معاك تلفزيون قديم أو ساعة أبوك القديمة هتحققلك حلم الثراء هتجرى تفتح الفيديو أو تقرا الخبر وكلك أمل انك تتخلص من عيشة الفقر وتلم باقي محتويات مطبخ والدتك عشان تجمع أول مليون..و رغم ان الخبر ده حضرتك قريته 100 مرة وشفت فيديوهات كتير بتقول نفس الكلام الا انك عشان عاوز تصدق بتشوفها تاني.. فيا ترى ليه المصريين عاوزين يغتنوا ببلاش؟ وليه محدش عاوز يتعب ويشتغل عشان يوصل للي هو عاوزه؟ وازاى حد يصدق ان معلقة اتصنعت من عشرات السنين ومفيهاش اى حاجة مميزة ممكن تتباع بمبلغ ضخم زي اللى بنسمعوا؟ 
 

 
جرب كده تقول للناس الحقيقة وتواجههم بمشاكلهم الحقيقية وتقولهم يعملوا ايه عشان يحسنوا حياتهم محدش هيسمعك ولا هيقولك انت بتقول ايه.. لكن تعالى كده العب على مشاعرهم وذوق كلامك وقولهم كلام يريحهم ويخليهم يحسوا انهم هيبقوا مليونيرات فى غمضة عين هيقروا اخبارك ويشوفوا فيديوهاتك والريتش يزيد والدنيا تبقا تمام.. بس ده مش هدفنا أبدا فى بانكير 
هدفنا دايما على منصات بانكير المختلفة نقولك الحقيقة ونوضحلك حقيقة اى كلام بيتقال والسلام عشان محدش يستغلك ولا يضحك عليك بكلام معسول  
ولما من فترة انتشرت صفحات على مواقع التواصل الاجتماعي بتعلن إن أي حد معاه لسه في مطبخه أي ملاعق وشوك السنبلة القديمة هتشتريها مقابل مبالغ مالية بتوصل إلى 150 ألف جنيه.. طلعنا وكشفنا الحقيقة وقولنا ان الموضوع مش نصب ولا تسالي لكن مبالغ فيه جدا جدا.. وان زي ما فيه ناس هوايتها جمع الفلوس القديمة والانتيكات .. فيه ناس تانية هوايتها جمع ملاعق قديمة وشوك لكن بمواصفات معينة.. لكن الاسعار مش ضخمة اوى زي ما بيتقال يعنى ممكن حد يدقع 100 او 150 فى ملعقة ق\يمة عشان يرضى شغفه وهوايته فى جمع الأشياء القديمة لكن مفيش حد مجنون ممكن يدفع 150 الف جنيه فى ملعقة مفيهاش أى حاجة مميزة الا لو اعتبرنا رسمة السنبلة دي شفرة لفك كنز مثلا 
ولو حضرتك عندك النوع ده من المعالق اللى عليه رسمة السنبلة جرب تنزل بنفسك وتحاول تبيعها سواء فى الأماكن المخصصة لبيعها فى السواق الشعبية أو حتى على صفحات التواصل الاجتماعي وانت هتكتشف الحقيقة المرة وهتغرف ان كل اللى بيتقال فى الموضوع ده مجرد وهم كبير. 
مش بنقول الكلام ده عشان نحبطك او نقولك بلاش تستفيد من السعر الخرافي للمعلقة ولكن عشان تنزل على الأرض وتعرف ان الطريق الوحيد للاغتناء أنك تشتغل.. تشتغل فى التجارة تبيع وتشترى.. تشتغل فى الصناعة وتصنح حاجات.. أو حتى تعمل مشروع صغير وتكبره 
هي دي الطرق الشرعية لتحقيق الثروات .. غير كده يبقا بتضحك على نفسك وعاوز الناس تضحك عليك وللأسف انت اللى بتصدق