الذهب خرج عن السيطرة.. وتوقعات بوقف البيع والتعامل
متابعي منصات بانكير اهلا وسهلا بيكم ولايف جديد من بانكير لاهم مستجدات الأوضاع.. ومفيش حديث يعلوا عن حديث أسعار الدهب اللي خرجت عن السيطرة منتصف تعاملات اليوم الثلاثاء 21 نوفمبر.
وخلونا نقول لحضراتكم إن أسعار الدهب على مدار اليومين اللي فاتو ارتفعت بشكل كبير جدا وسط ارتباك الصاغة والأسواق والجهل باللي هيحصل في الأسواق الساعات الجاية.. الأسعار وصلت لكام وهل فيه احتمال لوقفت التداول والبيع في سوق الدهب بعد تجاوز الأسعار للخطوط الحمرا.
بالنسبة للأسعار فيي منتصف التعاملات فوصل سعر جرام الدهب عيار 21 وهو الأكثر مبيعا في مصر اليوم 2800 جنيها للجرام ولو ضفنا عليه المصنعية هيوصل 3 الاف جنيه وهو رقم غير مسبوق..
وصل سعر عيار 24 لحوالي 3200 جنيها.. ووصل سعر عيار 18 لحوالي 2400 جنيها... في نفس الوقت وصل سعر الجنيه الذهب 22400 جنيه ودا لأول مرة من سنين طويلة يرتفع فيها سعر الجنيه بالشكل دا.
طيب ايه أسباب ارتفاع الدهب في مصر الفترة الحالية وهل فعلا الأرقام دي حقيقية .. أهل الخبرة في شعبة الدهب هما اللي جاوبوا على السؤال دا وقالو إن الأسعار دي مفتعلة ومبالغ فيها وبتعتمد على أسعار الدولار في السوق السودا واللي بيحصل عليه مضاربات مزيفة وضرب في الأسعار، وكمان لأن عدد كبير من تجار الصاغة المتحكمين في السوق بيخزنوا الدهب لضمان استمرار أسعاره مرتفعة في نفس الوقت الطلب زاد مع نقص المعروض المتعمد وعشان كده الأسعار بتزيد بشكل كبير جدا.
وعشان كده سجلت أسعار الدهب في مصر ارتفاع كبير بالتزامن مع ارتفاع سعر الدولار في السوق الموازي المستخدم في تسعير الدولار، في الوقت اللي انفصل فيه تسعير الدهب المحلي حاليًا عن السعر في السوق العالمي ودي عادة السوق المصري اللي بيمشي عكس العالمي ومش بيتأثر بسهولة بااللي بيحصل بره ولو كان السوق ماشي مع القواعد كان الدهب هينزل لما الدولار يرفع والعكس صحيح لانهم ماشين عكس بعض.
طيب الأسعار دي هتستمر في الزيادة والحكومة فين وهتعمل إيه.. زي ماقلنا طول مافيه طلب كتير ومعروض قليل السعر هيفضل يطلع وهيكسر حاجز الـ3 الاف جنيه كمان لعيار 21 واللي المصريين يشتروه تحديدا ومعنى كده بردوا إن السوق هيخرج عن السيطرة لغاية مايحصل معجزة أو الحكومة تتدخل وتاخد قرارات عاجلة منها وقف التداول والبيع عن الدهب لحين استقرار الأسواق والاحتمال دا استبعده في الوقت الحالي أمير رزق الخبير في مجال الدهب وقال إنه مفيش قرار صدر بوقف بيع الدهب بمحال الصاغة بعد الصعود الكبير للأسعار ومايعتقدش إن قرار زي دا ممكن يصدر.. وأكد إن عمليات البيع جارية حاليا بجميع المحال ووصل سعر جرام الذهب عيار 21 بالأسواق حاليا إلى 2800 جنيه.
لكن خلينا نفكركم إنه في ديسمبر 2022 تم وقف ببيع الدهب في المحلات والصاغة بعد موجة ارتفاعات في الأسعار واضطراب الأسوق ودي بتكون الطريقة الاسلم لوقف الجنون في السوق، وفيه تجار بترجح وقف البيع لو استمرت الأسعار في منحى الصعود لأن فيه تجار كتير مش هتقدر تجاري الأسعار العالية دي ولا كمان المواطنين على المدى القصير.
عالميا الدهب ارتفع إلى أعلى مستوياته خلال أسبوعين بعد حصوله على الدعم من ضعف الدولار الأمريكي وانخفاض عوائد السندات الحكومية الأمريكية، في وقت الأسواق بتترقب محضر اجتماع البنك الاحتياطي الفيدرالي اللي هيصدر النهاردة في محاولة لمعرفة المزيد الإشارات عن مستقبل السياسة النقدية للبنك الفيدرالي.
وسجل الدهب الفوري ارتفاع خلال جلسة النهاردة وسجل أعلى مستوى منذ أكثر من أسبوعين عند 1994 دولار للأونصة.
بالنسبة لتوقيت البيع والشراء دلوقتي للمواطنين اللي راغبين في الاستثمار في الدهب كاستثمار طويل الأجل.. فطبعا العقل بيقول لو هتبيع ممكن تبيع دلوقتي والأسعار على أخرها ولأنه ممكن في أي وقت تطلع قرارات حكومية لضبط الأسواق زي فتح الاستيراد مثلا والدهب هينزل في أي ساعة، أما لو هتشتري فطبعا دا مش الوقت المناسب خالص بسبب إن الأسعار غالية جدا وهتشتري بالغالي وهتضطر تنتظر كتير عشان الأسعار دي تتعوض بعد كده.
