مصر قالت كلمتها وجيشها جاهز... إيه اللي حصل نهاردة في مجلس النواب
مصر عرفت المؤامرة بدري من سنة 2011 وقدر زعيمها يقرأ المستقبل كويس وعرف ايه اللي بيدبر لمصر واتحرك بأقصي سرعة عشان يوقف البلد على حيلها عشان وقت الجد تلاقي رجالة واقتصاد وجيش قوي واقف في وش العدا.. ايه اللي حصل نهاردة وإيه مناسبة الكلام دا وايه اللي قاله الدكتور مصطفي مدبولي النهاردة والسيسي عقب عليه
مصر كان ربنا رحيم بيها وهي المحروسة وهي الضهر والسند للعرب والمسلمين والضعفاء للمنطقة ودايما بيهيأ لها من الخطر النجاة والعودة بقوة وبيرد كل متآمر على البلد اللي أستقبلت المسيح وحمت المسيحية واللي كرمت رسول رسول الإسلام واللي عاش فيها يوسف الصديق وجعل خزاينها تحت إيد نبي.. وفي كل محنة بيظهر رجال من نوعية مختلفة يحموها وياخدو بإيديها لبر الأمان والمرة دي كان المشير عبد الفتاح السيسي رئيس الاستخبارات الحربية والاستطلاع واللي كان شايف وعايش الخطر اللي مصر بتواجه تحت وفوق الأرض.
لما اشتد الكرب الشعب استنجد بجيشه واللي لبى الندا في الحال والسيسي كان على قد الخطر والمسؤلية وقدر ينجو بمصر من كل حقوق الألغام والشر، ولكن محدش كان متخيل حجم التآمر اللي بيتعمل على البلد لتفكيكها واغراقها في صراعات دموية لا تنتهي.. النهاردة الدكتور مصطفي مدبولي رئيس الوزراء قال كلمة تاريخية في مجلس النواب عن المؤامرات اللي تم رسمها في الغرف المغلقة في عواصم كتير لاسقاط مصر بداية بأحداث 2011 ولغاية دلوقني وبدأت بأحداث السويس وانتهت بملف تهجير الفلسطنين.. لكن على مين دا مصر رئيسها راجل مخابرات محترف.
دلوقتي عرفنا ليه السيسي كان بيقول مفيش وقت وليه بدأ بتطوير وتحديث القوات المسلحة وليه كان ينزل الكلية الحربية الفجر وليه اشتري أحدث الأسلحة في العالم وليه أعاد انتشار القوات المسلحة على مستوى الجمهورية بقواعد عسكرية عملاقة حزمت البلد.. عشان حضرتك تقدر النهاردة تحمي سيناء وتردع أي محاولة لاستغلالها في تصفية القضية ولما تهدد بكلمة يبقي العدو عارف إن معاك قوة تقدر تنفذ بيها كلمتك ودا اللي لجم إسرائيل وخلاها تنسي ملف التهجير وخلى الولايات المتحدة تنصحها بعدم الكلام في الموضوع د اتاني وتتجنب غضب مصر.
نرجع للدكتور مدبولي النهاردة والكلام اللي قاله في جلسة مجلس النواب إن مصر منذ 2011 معروف ما هي الأجندة التي تُدبّر لها، والضغوط موجودة وستظل تتعرض لها، وبالتالي كانت رؤية القيادة السياسية، والتي لم نكن نفهم ما هي السرعة الرهيبة في المشروعات وبناء وتقوية الجيش فما يحدث حولنا على المستويين الدولي والإقليمي أصبحت الإجابة واضحة».. وقال كمان: إن مصر لن تسكت على هذه الممارسات وهو التصريح الأعنف من ساعة الأزمة وبيحمل عديد من المعاني منها استخدام القوة العسكرية لحماية الأمن القومي وحماية سيناء من ممارسات جيش الاحتلال.
ولأول مرة نشوف تعليق من رئيس الجمهورية على كلمة لرئيس البرلمان ودي رسالة تانية ذكية من السيسي وصلت بردوا لإسرائيل فورا وقال الرئيس تابعت باهتمام ببالغ الاهتمام بيان رئيس مجلس الوزراء أمام مجلس النواب والذي عبر خلاله عن ثوابت الدولة المصرية تجاه الأمن القومي المصري وتجاه القضية الفلسطينية الباقية في الضمير الوطني المصري دولة وشعبا.. وأكد الرئيس استمرار التزام مصر بكل أجهزتها في دعم القضية الفلسطنية.
