أزمة الدولار بتخلص.. حكاية الـ 63 مليار دولار اللي جمعتهم الحكومة
يا ترى ايه حكاية ال 63 مليار دولار اللى جمعتهم الحكومة فى اخر 10 شهور؟ والدولارات دي راحت فين؟ وهل معنى كده ان أزمة الولار فى مصر خلاص بتنتهي؟ وليه رغم التحسن الملحوظ فى السيولة الدولارية لدى البنك المركزي وباقي البنوك العاملة فى القطاع المصرفي سعر الدولار فى السوق السودا بيزيد كل يوم عن التاني؟ وامتى ممكن الحكومة تنجح فى القضاء على السوق الموازية بشكل نهائي؟ وايه علاقة كل ده بالتخفيض المحتمل فى قيمة الجنيه بعد انتخابات الرئاسة زي ما كتير من مؤسسات التمويل الدولية بتتوقع؟
الشحات غتورى رئيس مصلحة الجمارك المصرية أعلن فى الساعات الأخيرة ان الحكومة نجحت خلال آخر 10 شهور فى الافراج عن بضايع بقيمة اجمالية وصلت الى 63 مليار دولار منها 16.6 مليار سلع استراتيجية، ومستلزمات إنتاج بحوالى 29.2 مليار دولار، وقال ان قيمة البضائع المفرج عنها خلال أكتوبر اللى فات بس بلغت نحو 6.7 مليار دولار منها 1.5 مليار دولار سلع استراتيجية، و3.1 مليار دولار مستلزمات إنتاج وخدمات تانية ، وأكد رئيس مصلحة الجمارك انه من أول شهر نوفمبر الحالى ولغاية نص الشهر بلغت قيمة البضائع المفرج عنها نحو 3 مليار دولار.. وده فى اطار توجيهات القيادة السياسية بالعمل المستمر على تسريع وتيرة الإفراج الجمركى من خلال التوظيف الأمثل للتكنولوجيا وتحديث وميكنة الإجراءات الجمركية.
الكلام اللى قالوا رئيس مصلحة الضرائب فى منتهى الأهمية وبيقول كلام كتير بين السطور وبيكشف عن جهود جبارة بتقوم بيها مؤسسات الدولة لحل واحدة من أخطر الأزمات اللى مصر بتعانى منها من شهر مارس 2022 ولحد دلوقتي.
طب ليه كلام رئيس مصلحة الضرائب مهم ؟
بص يا سيدي كل الكلام اللى بيتقال فى الفترة الاخيرة ان مصر عندها مشكلة كبيرة فى جذب حصيلة دولارية وانها هتواجه أزمة فى سداد التزاماتها لاخارجية بسبب ازمة شح الدولار.. ومن هنا بتيجي أهمية كلام رئيس مصلحة الضرايب وده لأن مفيش دولة بيتم التشكيك فى قدرتها على تعظيم حصيلتها الدولارية وتقدر فى 10 شهور بس تجمع 63 مليار دولار وتسيتخدمهم فى الافراج عن البضايع المستوردة من الخارج وطبعا فيهغير المبلغ ده فلوس تانية كتيرة بيتم استخدامها فى الوفاء بالتزمات مصر الخارجية فى اقساط وخدمة الدين.. والدولة اللى تقدر تجمع المبالغ دي في فترة صعبة بيعانى فيها العالم من مشكلات اقتصادية ضخمة عمرها ما تقع ولا تقدر أزمة زي أزمة نقص الدولار تاثر على مستقبلها او مسيرتها
حد ممكن يسأل ويقول ومصر جابت منين مليارات الدولارات دي كلها؟
مصر بلد كبيرة وموادها من العملة الأجنبية مش قليلة وفيه مصادر حصل فيه نمو كبير زي السياحة اللى بتسجل السنة دي أرقام تاريخية محصلتش قبل كده ووفقا لتوقعات المسئولين فالسياحة وحدها ممكن تدر دخل السنة دي بأكتر من 15 مليار فى ظل تحسن مؤشرات الوفود السسياحية ونسب اشغال الفنادق .. ده الى جانب ارتفاع عوائد قناة السويس وتحقيثقها فى الاشهر الاولى من 2023 عوايد تقدر ب 9 مليار دولار ومتوقع الرقم ده يتضاعف بعد زيادة رسوم العبور ورفعها بنسبة 15% .. والى جانب السياحة وقناة السويس فيه نمو ملحوظ فى الصادرات المصرية للخارج والدولة شغالة على خطة للوصول بحجم الصادرات المصرية الى 100 مليار دولار .. بالاضافة الى مصادر تانية غير تقليدية ومنها الطروحات الحكومية اللى مصر بتنفذها وكمان الاستثمارت الأجنبية المباشرة اللى دخلت الفترة اللى فاتت
طب هل معنى كده ان أزمة الدولار خلاص بتخلص؟
البنك المركزي والحكومة بالفعل شغالين بقوة على انهاء ازمة الدولار والقضاء على السوق السودا وده مش هيتم من غير ما البنوك تكون قادرة على توفير السيولة الدولارية المطلوبة سواء من الشركات او من المستوردين
يعنى كده فيه تعويم ولا مفيش ؟
كل التقارير الدولية بتقول ان الحكومة المصرية مجبرة على تخفيض جديد فى قيمة الجنيه وممكنده يحصل مرة واحدة كمان فى 2024 لكن بعد كده الأوضاع هتبدأ فى التحسن ومعاها الدولار هيرجع يتراجع والجنيه هيسترد جزء كبير من قوته المفقودة
