باقي شهور ومصر تفوق.. خيرات ومفاجآت في 2024
بقالنا شهور طويلة بنتكلم عن الأزمات الاقتصادية والتحديات والدولار والعملة والاسعار والتضخم والديون وتقارير وكالات التصنيف الائتماني الدولية ومفاوضات صندوق النقد الدولي والضغوط اللي على البلد والحروب الذكية والإلكترونية والمؤامرات.. دلوقتي جي الأوان بقي نتكلم بتفاؤل شوية عن اللي جاي واللي هيحصل بكرة وازاي مصر هتعدي كل الأزمات وتطلع منها قوية ونعرف إيه اللي هيحصل في 2024
كل خبراء الاقتصاد المصري وحتي الخبراء العالميين ومؤسسات المال والتمويل بتقول إن 2024 هيكون عام الاستقرار والاستثمار والانطلاق وعام التصنيع والزراعة وعام حصد ثمار المشروعات الكبرى وحل كل الأزمات المالية وإعادة الانطلاق.. ليه بتقول كده.. لأن دلوقتي مصر فيها كل يوم صناعة جديدة أو مستثمر أجنبي اول مرة يدخل السوق وفيها سنغافورة جديدة بتتعمل في منطقة اقتصادية قناة السويس وفيها استثمارات بمليارات الدولارات.
مصر انشأت بنية أساسية عالمية من موانئ وطرق وإنفاق وشبكة سكك حديد ومترو ومونوريل واستصلحت ملايين الأراضي ولسه الدلتا الجديدة وعملت وبتعمل حياة كريمة اكبر مشروع في تاريخ مصر بيخدم 60 مليون مواطن والاف المصانع وبقت موطن لكبرى البراندات العالمية ودخلت في صناعة ادوات الإنتاج والتصنيع المتطور والمدن الذكية واعادت استغلال موقعها الجغرافي الفريد في إنشاء أكبر شبكة تجارة دولية في المنطقة.
الكل اجمع إن سنة 2024 هي بداية جني ثمار البناء والتعمير في السنين اللي فاتت وأنها هتنطلق بقوة في آفاق اقتصادية جديدة مع البريكس واكتمال وانهاء المشروعات العملاقة يعني ببساطة البلد هتفوق من الأزمات وهتطلع اقوى من الاول مليون مرة لأن مصر استغلت الأزمة وزنقت نفسها واشتغلت على حلها واختارت الحل الاصعب والمكلف وهو توطين الصناعة وزيادة مساحة الزراعة وكان لازم نبدأ نصنع اللي بنستهلكه ونزرع اللي بناكله وبالتزامن مع خطة طموحة للتصدير ومع كل المشروعات دي الدولار مش هيكون ابدا أزمة تاني لا في 2024 ولا في اي وقت في المستقبل لأن الدولة حلت المشكلة من جذورها وهيكون الطلب عليه أقل بكتير من المعروض وسعره هيبقي في الأرض.
مصر بكل فخر هتبقي مركز عالمي للطاقة ومركز عالمي للطاقة النظيفة واللي هتبتدي تصدرها لاوروبا وهتبقي مركز عالمي للتجارة الدولية من خلال شبكة الطرق الجديدة في سيناء ومنطقة قناة السويس ومصر هتبقي مركز مالي عالمي للمنطقة زي ما أكد حسام هيبة الرئيس التنفيذي للهيئة العامة للاستثمار والمناطق الحرة، في كلمته في قمة رأس_المال - المخاطر، اللي نظمتها الجمعية المصرية للاستثمار المباشر ورأس المال المخاطر والوكالة الألمانية للتعاون الدولي وبنك التمويل الهولندي للدول النامية.
وقال إن الحكومة بتستهدف إن مركز القاهرةالمالي الدولي يكون المركز المالي الأهم والمنصة الأساسية لصناديق رأس المال المخاطر في منطقة الشرق الأوسط وشمال أفريقيا.
