هو الاحتياطي من النقد الأجنبي راح في داهية فعلًأ؟ والمركزي قاعد بيتفرج ولا بيعمل اية؟

أكيد دايمًا بتسمع في الأخبار والتقارير التليفزيونية كلام كتير عن محاولات مصر المستمرة لزيادة الاحتياطي من النقد الأجنبي.. بس في ناس حتى الآن ماتعرفش يعني اية احتياطي أجنبي.. وبيتكون ازاي وبيستخدم في أية.. والنهاردة هانعرف كل التفاصيل عن الاحتياطي الاجنبي المصري وهل عندنا ما يكفي ولا لأ؟

طبعا .. احتياطي النقدي الأجنبي.. يعتبر من  اكتر المصطلحات اللي بنسمعها.. وهو مصطلح مفهوم لعدد كبير لكن الأفضل أن الناس كلها تعرف يعني اية احتياطي من النقد الأجنبي..

وببساطة شديدة كدا.. فالاحتياطي الأجنبي.. هو كل ما تمتلكه الدولة من عملات أجنبية واللي بتحتفظ بيه في بنكها المركزي..  وطبعًا أكثر العملات الأجنبية اللي بتكون في الاحتياطي.. هي العملات اللي بيتم تداولها بكثرة في مسألة التبادل التجاري.. وعلشان كدا.. قوائم الاحتياطي من النقد الأجنبي.. لازم تكون بالترتيب كدا.. أول عملة هي الدولار واليورو والجنيه الاسترليني والين الياباني.

وماينفعش يكون في دولة مالهاش احتياطي من النقد الأجنبي.. ودا لأن الاحتياطي هو عامل أساسي لاستقرار الاقتصاد.. وبيستخدم في تمويل الواردات من الخارج وتسديد الديون وله دور رئيسي في استقرار العملة المحلية.

وبمقدار 35.1 مليار دولار.. هو حجم صافي الاحتياطي النقدي الأجنبي من الدولار، ودا يعتبر أكبر حجم احتياطي يحققه المركزي من مايو 2022، ودا بعد ما تآكل الاحتياطي بسبب خروج نحو 20 مليار دولار من الأموال الساخنة نتيجة للحرب في أوكرانيا.

ولازم نفكر حضراتكم إن الاحتياطي من النقد الأجنبي كان بلغ في أواخر عصر الرئيس السابق محمد حسني مبارك 36.2 مليار دولار، وتقهقر وبدأ في التآكل لحد ما وصل إلى 13.2 مليار دولار في 2013.

السؤال هنا بقى.. البنك المركزي بيتعامل ازاي مع الاحتياطي الأجنبي؟؟

بص يا فندم.. بالرغم من أن الاحتياطي من النقد الأجنبي ارتفع خلال الفترة الماضية.. لكن برضوا البنك المركزي بيتعامل مع الدولار بسياسة صفرية.. مفادها أننا لسه في حاجة متزايدة للعملة الصعبة.

ومصر بتتبع السياسة دي بسبب ارتفاع فاتورة الاستيراد وارتفاع الدَّين الخارجي لمصر، واللي وصل إلى 164.728 مليار دولار بنهاية يونيو الماضي، بحسب موقع وزارة التخطيط والتنمية الاقتصادية المصرية استناداً إلى حسابات البنك المركزي المصري.

السؤال اللي لازم يكون على لسانك.. هو مصر بتدبر أو هاتدبر زيادة في الحصيلة من النقد الأجنبي ازاي

بص يا فندم.. الدولة بتتعامل مع الملف دا بمنهج ثابت.. وهو أن أي زيادة بتحصل في الاحتياطي الأجنبي بتكون نتيجة لتحسن موارد مصر من النقد الأجنبي خاصة إيرادات السياحة والصادرات وتحويلات العاملين بالخارج، وبرضوا مسألة إعادة تقييم أصول مكونات الاحتياطي.

وبقيادة البنك المركزي.. فالدولة بتحاول بشتى السبل أن ترفع من قيمة الاحتياطي ودا من خلال استثمار مقدار الاحتياطي في أذون وسندات الخزانة الأمريكية علشان تجيب عوائد بالإضافة إلى عدد من العملات الأخرى مثل الجنيه الاسترليني واليورو والين و اليوان الصيني.

وبالنسبة لدور الاحتياطي في تسديد الديون.. فلازم تكون عارف أن مصر حتى الآن لم تتخلف 
على مدار تاريخها في سداد الديون سواء محلية أو خارجية، وبالمناسبة الديون الخارجية في الحدود الآمنة وتبلغ 34% بالنسبة للناتج القومي.

وكل لما مصر ترفع من احتياطها من النقد الأجنبي.. فدي شهادة للمؤسسات الدولية والعالمية بقدرة الاقتصاد المصري على تسديد أي ديون والقدرة على الاقتراض.

لكن مصر بتحاول تنتج علشان تسد فجوة الاستيراد واللي مخلينا في احتياج مستمر للدولار.

وهانتكلم في الحلقة الجاية عن خطة مكتملة الاركان بتنتهجها الدولة علشان تتخلص نهائي من مسألة الديون.